មន្ត្រីជាន់ខ្ពស់រដ្ឋាភិបាលថ្លែងក្នុងពេលចុះបេសកកម្មទៅសហភាពអឺរ៉ុបថា អន្តរជាតិហាក់បានផ្តល់ភាពអយុត្តិធម៌ដល់កម្ពុជា លើការវិនិច្ឆ័យនិងដាក់សម្ពាធផ្អែកលើស្ថានភាពនយោបាយបច្ចុប្បន្ន។
ក្នុងសុន្ទរកថាទៅកាន់វិទ្យាស្ថានអឺរ៉ុបដើម្បីសិក្សាពីអាស៊ីនៅទីក្រុងប្រ៊ុចសែល កាលពីថ្ងៃទី២៨ មិថុនា ដែលក្រសួងការបរទេសទើបបានផ្សព្វផ្សាយកាលពីម្សិលមិញឲ្យដឹងថា រដ្ឋលេខាធិការក្រសួងការបរទេសលោក លុយ ដាវីត បានថ្លែងថា ប្រជាជនអឺរ៉ុបកំពុងយល់ខុសពីស្ថានភាពបច្ចុប្បន្នរបស់ប្រទេសកម្ពុជា ហើយកម្ពុជាត្រូវរងគ្រោះជាបន្តបន្ទាប់ពីអន្តរជាតិ និងអឺរ៉ុបដោយសារការវាយតម្លៃមិនត្រឹមត្រូវទាំងនោះ។
លោកបានបញ្ជាក់ថា ការរំលាយបក្សប្រឆាំង ការបិទNGOsមួយចំនួន និងកាសែតCambodia Daily គឺជាការអនុវត្តច្បាប់សុទ្ធសាត ហើយបើកើតមាននៅប្រទេសប្រជាធិបតេយ្យផ្សេងទៀតក៏គេនឹងអនុវត្តន៍ដូចគ្នាដែរ។ លោកបន្ថែមថា ប្រទេសទាំងនោះ មើលឃើញតែមួយជ្រុងតូចតែពុំបានក្រឡេកមើលរឿងល្អៗជាច្រើនរបស់កម្ពុជានោះទេ។
ខណៈបេសកកម្មរបស់លោកគឺដើម្បីព្យាយាមប្រាប់អឺរ៉ុបពីស្ថានការកម្ពុជាដើម្បីកុំឲ្យអឺរ៉ុបព្យូរប្រព័ន្ធអនុគ្រោះពន្ធEBA នោះ លោក លុយ ដាវីត បញ្ជាក់ថា ប្រសិនជាមានការព្យូរការលើកលែងពន្ធEBA ចំពោះកម្ពុជាពិតមែនគឺអឺរ៉ុបគ្មានភាពស្មោះត្រង់ និងកំពុងប្រើស្តង់ដារពីរមកកាន់កម្ពុជា ហើយវាពុំមានឥទ្ធិពលដល់ការផ្លាស់ប្តូរការតាំងចិត្តរបស់រដ្ឋាភិបាលកម្ពុជានោះទេ។
រដ្ឋលេខាធិការក្រសួងការបរទេសលោក លុយ ដាវីត
លោកលុយ ដាវីតបន្ថែមទៀតថា ភាពរងគ្រោះរបស់កម្ពុជានេះ គឺកើតពីការប្រកួតប្រជែងភូមិសាស្ត្រនយោបាយរវាងលោកសេរី ជាមួយចិនប៉ុណ្ណោះមិនមែនជាបញ្ហាសិទ្ធិមនុស្ស ឬប្រជាធិបតេយ្យនោះទេ។
អ្នកតាមដានបញ្ហានយោបាយកម្ពុជាលោក ឯម សុវណ្ណារ៉ា យល់ស្របចំពោះការលើកឡើងរបស់លោក លុយ ដារីត តែលោកថាវាមិនដូចអ្វីដែលមន្ត្រីរដ្ឋាភិបាលលើកឡើងទាំងស្រុងនោះទេ ព្រោះសហគមន៍អន្តរជាតិត្រូវបានចងភ្ជាប់ជាមួយកម្ពុជាដោយសារសន្ធិសញ្ញាសន្តិភាពទីក្រុងប៉ារីស ដែលប្រទេសទាំងនោះត្រូវមានកាតព្វកិច្ចពិនិត្យមើលពីបញ្ហាសិទ្ធិមនុស្ស និងប្រជាធិបតេយ្យកម្ពុជា។
អ្នកតាមដានបញ្ហានយោបាយកម្ពុជាលោក ឯម សុវណ្ណារ៉ា
រដ្ឋមន្ត្រីក្រសួងពាណិជ្ជកម្ម លោក ប៉ាន សូស័ក្តិ កាលពីឆ្នាំមុន បានរាយការណ៍ ប្រាប់នាយករដ្ឋមន្ត្រីថា នៅឆ្នាំ២០១៦កន្លងមក កម្ពុជាបានចំណេញប្រាក់ ៦៧៦លានដុល្លារ ពីប្រព័ន្ធអនុគ្រោះរបស់សហភាពអឺរ៉ុបនេះ។
ខណៈពេលដែលសហភាពអឺរ៉ុបបញ្ជូនប្រតិភូរបស់ខ្លួនមកកម្ពុជា ដើម្បីស្វែងរកការពិតមុនការពិចារណាពីការព្យូរប្រព័ន្ធ អនុគ្រោះពន្ធ EBA ដែលនឹងបញ្ចប់នៅថ្ងៃនេះនោះ អ្នកតាមដានយល់ថារដ្ឋាភិបាលគួរតែពិចារណាពីដំណោះស្រាយនយោបាយបែបណាមួយដែលធ្វើឲ្យបរទេសអាចទុកចិត្តពីដំណើរការប្រជាធិបតេយ្យនៅកម្ពុជានេះ។
ថ្លែងប្រាប់វីអូឌីកាលពីថ្ងៃច័ន្ទ អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី លើកឡើងថា ប្រព័ន្ធអនុគ្រោះពន្ធ EBA របស់សហភាពអឺរ៉ុប បានផ្តល់ឱកាសឲ្យអ្នកវិនិយោគនៅកម្ពុជា ពិសេសវិស័យកាត់ដេរ អាចមានលទ្ធភាពប្រកួតប្រជែងជាមួយប្រទេសជិតខាងបាន។
លោកបន្ថែមថា គន្លឹះនៃការទប់ស្កាត់កុំឲ្យថវិកាជាតិរាប់លានដុល្លារក្នុងមួយឆ្នាំៗ បានពីប្រព័ន្ធអនុគ្រោះពន្ធនេះ បាត់បង់ រដ្ឋាភិបាលត្រូវពិនិត្យមើលឡើងវិញ ពីការគោរពរដ្ឋធម្មនុញ្ញ ជំរុញឲ្យមានលំហរសេរីភាពបញ្ចេញមតិ លើកកម្ពស់សិទ្ធិមនុស្ស សិទ្ធិធ្វើនយោបាយពិតប្រាកដមួយ អាចទទួលយកបានទាំងសហគមន៍ជាតិ និងអន្តរជាតិជាតិ ចៀសវាងបង្កើតប្រព័ន្ធប្រជាធិបតេយ្យមួយ ទទួលស្គាល់ត្រឹមតែពីមន្ត្រីរដ្ឋាភិបាលនោះ។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី
អឺរ៉ុបបានបញ្ជូនគណៈប្រតិភូរបស់ខ្លួនមកកម្ពុជារយៈពេល ៧ថ្ងៃ គឺចាប់ពីថ្ងៃទី៥ ដល់ថ្ងៃទី១១ខែកក្កដានេះ ជាអ្វីដែលក្រុមប្លុកលោកសេរីមួយនេះហៅថា បេសកកម្មពិសេសដើម្បីស្វែងរកការពិតថា តើរដ្ឋាភិបាលកម្ពុជាពិតជាបានរំលោភសិទ្ធិមនុស្ស សិទ្ធិធ្វើនយោបាយដូចការលើកឡើងមែនឬទេ មុនខ្លួនសម្រេចកាត់ផ្តាច់ប្រព័ន្ធអនុគ្រោះពន្ធពីកម្ពុជាវិញ៕