របាយការណ៍ក្រសួងកសិកម្មដែលចេញផ្សាយកាលពីថ្ងៃទី២៨ខែមិថុនា បានឲ្យដឹងថានៅឆមាសទី១ឆ្នាំ២០១៨នេះ ការអនុវត្តការដាំដំណាំស្រូវបានចំនួន ១លាន ៦៦៤៣១៦ហិកតា ស្មើនឹង៦៦.២០% នៃផែនការចំនួន ២លាន ៥១៣៨៩៥ហិកតា លឿនជាងផែនការឆ្នាំមុនចំនួន ២១មឺុន ២០៤៩ហិកតា ។
អគ្គនាយកនៃអគ្គនាយកដ្ឋានក្រសួងកសិកម្ម លោក ហ៊ាន វណ្ណហន បានប្រាប់វី.អូ.ឌីតាមទូរស័ព្ទនៅម្សិលមិញថា នៅក្នុងឆ្នាំនេះ ការបង្កបង្កើនផលស្រូវបានលឿនជាងឆ្នាំមុន ប៉ុន្ដែក៏ជួបប្រទះបញ្ហាមួយចំនួនដែរ ដូចជាតំបន់ខ្លះមានការផលិតយឺត និងលឿនជាងផែនការ និងតំបន់មួយចំនួនជួបប្រទះការរាំងស្ងួត។
របាយការណ៍ក្រសួងកសិកម្មដដែលនេះ ក៏បង្ហាញដែរថាខេត្តដែលអនុវត្តការដាំដុះស្រូវបានច្រើនជាងគេក្នុងឆមាសទី១ឆ្នាំ២០១៨នេះគឺ ខេត្តពោធិ៍សាត់ កំពង់ធំ និងឧត្តរមានជ័យ ដោយក្នុងនោះ ខេត្តពោធិ៍សាត់បានអនុវត្តលើសពីផែនការបានចំនួន ៣.៨៣% នៃផែនការ១០មឺុន៣០០០ហិកតា។ ចំពោះខេត្តបាត់ដំបង បច្ចុប្បន្នកំពុងប្រឈមនឹងការរាំងស្ងួត ធ្វើឲ្យដំណាំស្រូវប៉ះពាល់ចំនួន ២មឺុន ៧៣៣៤ហិកតា ប៉ុន្ដែសង្រ្គោះបាន ១មឺុន៩៩៣៥ហិកតា។
បើតាមលោក ហ៊ាន វណ្ណហន ប្រទេសកម្ពុជាបានផលិតដំណាំស្រូវបានចំនួន ១០លានតោននៅក្នុងមួយឆ្នាំ និងបាននាំអង្ករទៅក្រៅប្រទេសចំនួន ៦៣៥ពាន់៦៧៩តោន ដែលប្រទេសចិនជាប្រទេសលេខមួួយក្នុងចំណោមប្រទេសទាំង១០ដែលកម្ពុជានាំចេញទៅច្រើនជាងគេ។
