ចាងហ្វាងកាសែតម្នាក់នៅសៀមរាបត្រូវឃាត់ខ្លួន​ករណីប្រើអាវុធបាញ់មន្ត្រីយោធា

សមត្ថកិច្ចខេត្តសៀមរាប បានឃាត់ខ្លួនចាងហ្វាងកាសែតមួយ ឈ្មោះកាសែត«ដំណឹងកម្ពុជា» ដោយចោទថា ជាប់ពាក់ព័ន្ធការប្រើប្រាស់អាវុធខុសច្បាប់ បាញ់ប្រហារលើមន្ត្រីយោធា។​

អធិការស្រុកស្វាយលើលោក ស៊ុន អេង ឲ្យដឹងថា កាលពីរសៀលថ្ងៃអង្គារម្សិលមិញ ជនសង្ស័យឈ្មោះ ឆោម ស៊ីថា ជាចាងហ្វាងកាសែត មានជម្លោះនិងប្រើប្រាស់កាំភ្លើងខ្លីម៉ាកK54បាញ់មន្ត្រីយោធាឈ្មោះ ម៉ី ស៊ូ ប៉ុន្តែមិនបង្កគ្រោះថ្នាក់ទេដោយសារមន្ត្រីយោធា បើករថយន្តគេចខ្លួនទាន់។​

លោក ស៊ុន អេង ឲ្យដឹងទៀតថា នៅព្រឹកថ្ងៃពុធនេះ សមត្ថកិច្ចកំពុងតែរៀបចំសំណុំរឿង ដើម្បីបញ្ជូនទៅថ្នាក់ខេត្តឲ្យបន្តនីតិវិធីផ្លូវច្បាប់។​