គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសឲ្យមានភ្ញៀវពិសេសជាបរទេស ចូលពិនិត្យមើលការបោះឆ្នោតនៅកម្ពុជា ខណៈប្រទេសលោកសេរីមួយចំនួនបានរិះគន់ថា ការបោះឆ្នោតខាងមុខនេះមិនមានតម្លាភាព។
អ្នកនាំពាក្យ គ.ជ.ប លោក ហង្ស ពុទ្ធា ប្រាប់វីអូឌីនៅថ្ងៃនេះថា ការអនុញ្ញាតឲ្យមានភ្ញៀវពិសេសបរទេសចូលពិនិត្យមើលការបោះឆ្នោតនេះ ដើម្បីបញ្ជាក់ថា កម្ពុជាពិតជាបានបោះឆ្នោតពិតប្រាកដមែន។ លោកបន្តថា ភ្ញៀវពិសេសបរទេសដែលចូលពិនិត្យមើលដំណើរការបោះឆ្នោតខាងមុខនេះ គឺមានគ្រប់ប្រទេសឲ្យតែពួកគេចង់ចូលមើលការបោះឆ្នោតខាងមុខនេះ។
អ្នកនាំពាក្យ គ.ជ.ប លោក ហង្ស ពុទ្ធា
អ្នកជំនាញផ្នែកបោះឆ្នោត លោក យឿង សុធារ៉ា មើលឃើញថា ការបើកឲ្យភ្ញៀវបរទេសចូលពិនិត្យមើលដំណើរការបោះឆ្នោតខាងមុខនេះ វាជារឿងមួយ ប៉ុន្តែ អ្វីដែលសំខាន់នោះ លោកថា គ.ជ.ប ត្រូវរៀបចំប្រព័ន្ធបោះឆ្នោតឲ្យប្រជាពលរដ្ឋ និងសហគមន៍អន្តរជាតិជឿជាក់បានថាដំណើរការបោះឆ្នោតនឹងប្រព្រឹត្តទៅតាមគន្លងប្រជាធិបតេយ្យ។
អ្នកជំនាញផ្នែកបោះឆ្នោត លោក យឿង សុធារ៉ា
អ្នកនាំពាក្យ គ.ជ.ប រូបនេះ បានឲ្យដឹងថា រហូតមកដល់ថ្ងៃនេះ ចំនួនអ្នកចុះឈ្មោះអង្កេតការណ៍បោះឆ្នោតសម្រាប់អាណត្តិទី៦ មានជាង ៧ម៉ឺននាក់ មកពីស្ថាប័នចំនួន ១០៦ផ្សេងគ្នា ខណៈដែលអាណត្តិទី៥កន្លងទៅចំនួនអ្នកសង្កេតការណ៍បោះឆ្នោតមានតែជាង៤ម៉ឺននាក់ប៉ុណ្ណោះ។
ទោះជាយ៉ាងណា អង្គការសង្គមស៊ីវិលក្នុងស្រុកមួយចំនួន បានប្រកាសមិនដាក់អ្នកអង្កេតការណ៍បោះឆ្នោតឡើយ ដោយសារតែបញ្ហាស្ថានភាពនយោបាយមិនល្អ និងការភ័យខ្លាចមានការចោទប្រកាន់ផ្សេងៗ។
ចំណែកប្រទេសលោកសេរីមួយចំនួន រួមមាន សហរដ្ឋអាមេរិក សហភាពអឺរ៉ុប និងប្រទេសចំនួន ៤៥ នៅក្រុមប្រឹក្សាសិទ្ធិមនុស្សអង្គការសហប្រជាជាតិ បានព្រមានថា ការបោះឆ្នោតខាងមុខពុំអាចទទួលយកបានឡើយ បើគ្មានគណបក្សប្រឆាំង។
ថ្មីៗនេះ តំណាងបេសកម្មជប៉ុនប្រចាំក្រុមប្រឹក្សាសិទ្ធិមនុស្សអង្គការសហប្រជាជាតិក៏បានជំរុញឲ្យគណបក្សនយោបាយធំៗនៅកម្ពុជា ចរចារនយោបាយឡើងវិញ នៅមុនការបោះឆ្នោតនៅចុងខែនេះផងដែរ៕