គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានចេញសេចក្ដីថ្លែងការណ៍ថា ថ្នាក់ដឹកនាំទាំង ៩រូបរបស់ស្ថាប័នរៀបចំការបោះឆ្នោតនេះ ត្រូវបានព្យួរសិទ្ធិបោះឆ្នោតសម្រាប់ការបោះឆ្នោតជ្រើសរើសតំណាងរាស្ត្រនៅចុងខែនេះ។
ក្នុងសេចក្ដីប្រកាសព័ត៌មានកាលពី ២ថ្ងៃ គ.ជ.ប បានប្រកាសថា គ.ជ.ប. បានសម្រេចព្យួរសិទ្ធិបោះឆ្នោតប្រធាន គ.ជ.ប លោក ស៊ិក ប៊ុនហុក អនុប្រធាន គ.ជ.ប លោក នុត សុខុម និងសមាជិក គ.ជ.ប លោក មាន សាទិ លោក ឌឹម សុវណ្ណារុំ លោក ឌុច សន លោក ហ៊ីង ធីឫទ្ធិ លោក ឯម សូផាត លោក ហ៊ែល សារ៉ាត់ និងលោក ហង្ស ពុទ្ធា។
មាត្រា ៨ នៃច្បាប់ស្ដីពីការរៀបចំ និងការប្រព្រឹត្តទៅនៃ គ.ជ.ប ឆ្នាំ២០១៥ បានកំណត់ថា ប្រធាន អនុប្រធាន និងសមាជិក គ.ជ.ប ត្រូវបានព្យួរសិទ្ធិបោះឆ្នោតជាបណ្ដោះអាសន្នរហូតដល់ថ្ងៃបញ្ចប់មុខតំណែង៕