ព័ត៌មាននៃការជាប់គាំងក្នុងរូងភ្នំរបស់ក្រុមកីឡាករបាល់ទាត់ក្មេងៗទាំង១២នាក់និងគ្រូបង្វឹករបស់ពួកគេ ត្រូវបានតាមដានយ៉ាងយកចិត្តទុកដាក់ពីមហាជនជាច្រើននៅលើពិភពលោកក្នុងរយៈពេល២សប្តាហ៍ចុងក្រោយនេះ។ ប្រតិបត្តិការនៃការជួយសង្រ្គោះក្រុមមនុស្សទាំង១៣នាក់នេះបានបញ្ចប់ទៅដោយជោគជ័យកាលពីថ្ងៃអង្គារកន្លងទៅ។
ការនាំចេញមកវិញដោយជោគជ័យនៃក្រុមកីឡាករបាល់ទាត់ក្មេងៗទាំង១២នាក់និងគ្រូបង្វឹករបស់ពួកគេ បានធ្វើឲ្យសារណៈជនទូទៅទូទាំងពិភពលោកជាពិសេសប្រជាពលរដ្ឋរបស់ថៃសប្បាយរីករាយជាខ្លាំង នៅពេលដែលឃើញពួកគេទាំងនោះអាចចេញមកវិញបានដោយសុវត្ថិភាព។
តើជោគជ័យក្នុងការជួយសង្រ្គោះក្រុមកីឡាករបាល់ទាត់ក្មេងៗទាំង១២នាក់ និងគ្រូបង្វឹករបស់ពួកគេចេញពីរូងភ្នំអាចបង្កើនប្រជាប្រិយភាពរដ្ឋាភិបាលយោធាថៃ ខណរយៈពេលចុងក្រោយនេះពួកគេត្រូវបានសាធារណៈជនថៃរិះគន់យ៉ាងខ្លាំងពីរឿងលើកពេលនៃការបោះឆ្នោតម្ដងហើយម្ដងទៀត?
កាលពីថ្ងៃទី២៩ខែមិថុនាកន្លងទៅ មេដឹកនាំរដ្ឋាភិបាលយោធាថៃសព្វថ្ងៃ លោកប្រាយុទ្ធ ចាន់អូចា បានទៅដល់រូងភ្នំដែលក្មេងទាំងនោះជាប់គាំង។ យោងតាមការចុះផ្សាយរបស់ភ្នាក់ងារសារព័ត៌មាន AP លោក ប្រាយុទ្ធ បានប្រាប់ក្រុមគ្រួសារក្មេងៗទាំងនោះនិងប្រជាពលរដ្ឋថៃទូទៅថៃថាត្រូវតែមានជំនឿទៅលើសកម្មភាពមន្ត្រីរដ្ឋាភិបាល ហើយលោកជឿជាក់ថាអ្វីៗនឹងត្រលប់មកធម្មតាវិញ។
ការចូលដល់ទីតាំងដល់កន្លែងកើតហេតុរបស់នាយករដ្ឋមន្រ្តីរូបនេះ ត្រូវបានអ្នកតាមដាននយោបាយថៃមួយចំនួនយល់ថា លោក ប្រាយុទ្ធ បានប្រើឱកាសនេះដើម្បីបង្កើនប្រជាប្រិយភាពរបស់ខ្លួន។ លោក Andrew MacGregor Marshall សាស្រ្តាចារ្យសារព័ត៌មាននៃសាកលវិទ្យាល័យ Edinburgh Napier ថ្លែងប្រាប់ទីភ្នាក់ងារសារព័ត៌មាន DW របស់អាឡឺម៉ង់ ថាលោក ប្រាយុទ្ធ បានប្រើប្រាស់ប្រព័ន្ធផ្សព្វផ្សាយសង្គមដើម្បីអួតអាងពីភាពខ្លាំងពូកែរបស់ខ្លួនទៅវិញទេក្នុងកំឡុងពេលនោះ។
ចាប់តាំងពីពេលដែលក្រុមកុមារទាំងនោះបាត់ខ្លួន រដ្ឋាភិបាលយោធាថៃតែងតែសន្យានិងធ្វើសកម្មភាពយ៉ាងសកម្មក្នុងការជួយពួកគេ។ កំឡុងនៃការជួយសង្រ្គោះ មន្រ្តីគ្រប់ជាន់ថ្នាក់របស់ថៃបានរួមគ្នាធ្វើការយ៉ាងសស្រាក់សស្រាំក្នុងប្រតិបត្តិការនេះ។ ប៉ុន្តែតួអង្គដែលសំខាន់និងត្រូវបានមហាជនទូទៅចាប់អារម្មណ៍ជាងគេនោះគឺក្រុមកងទ័ពជើងទឹកថៃ។
ក្រុមកងទ័ពជើងទឹកទាំងនោះដើរតួនាទីសំខាន់ជាងគេរឿងនេះ ដោយសារតែពួកគេត្រូវចូលរួមជាមួយក្រុមមុជទឹកមកពីប្រទេសដទៃទៀតក្នុងការជួយសង្រ្គោះក្រុមកុមារទាំងនោះ។ អ្នកមុជទឹកម្នាក់ដែលមកពីក្រុមកងទ័ពជើងទឹកថៃ បានបាត់បង់ជីវិតក្នុងប្រតិបត្តិការជួយសង្រ្គោះនេះ។ អតីតមន្ត្រីយោធារូបនេះត្រូវបានប្រជាជនថៃទូទៅចាត់ទុកជាវីរៈបុរសរបស់ពួកគេ។
ដូច្នេះជោគជ័យនៃប្រតិបត្តការនៃការជួយសង្រ្គោះនេះជាគុណសម្បត្តិមួយរបស់ក្រុមយោធាថៃដែលគេមិនអាចមើលរំលងបាន។ ការសម្រេចបាននូវភារកិច្ចរបស់ក្រុមអ្នកជួយសង្រ្គោះនេះ ក៏ឆ្លើយតបទៅនឹងអ្វីដែលនាយករដ្ឋមន្រ្តីយោធាបច្ចុប្បន្នសន្យាថាឲ្យជឿជាក់លើមន្រ្តីរដ្ឋាភិបាលខ្លួនផងដែរថាពួកគេនឹងអាចធ្វើបាន។
ជារួមជោគជ័យនេះតិចឬច្រើន វាបានរួមចំណែកឲ្យប្រជាជនថៃមើលឃើញពីសមត្ថភាពក្រុមយោធាក៏ដូចជារដ្ឋាភិបាលយោធាដែលកំពុងគ្រប់គ្រងប្រទេសថៃសព្វថ្ងៃផងដែរ។
ប្រជាជនថៃ និង សហគមន៍អន្តរជាតិ តែងតែជម្រុញឲ្យមេដឹកយោធាសព្វថ្ងៃ រៀបចំអោយមានការបោះឆ្នោតឲ្យបានឆាប់។ ប៉ុន្តែមេដឹកនាំថៃសព្វថ្ងៃតែងតែលើកពេលម្ដងហើយម្តងទៀតក្រោមហេតុផលផ្សេងៗ ដែលជាហេតុធ្វើឲ្យប្រជាជនថៃជាច្រើនមិនពេញ។
ពេលវេលាបោះឆ្នោតដែលរដ្ឋាភិបាលយោធាថៃបានកំណត់ចុងក្រោយគឺនៅថ្ងៃទី២៩ខែកុម្ភៈឆ្នាំ២០១៩ ប៉ុន្តែកាលពីខែមិថុនាកន្លងទៅរដ្ឋាភិបាលលោកប្រាយុទ្ធបានប្រកាសលើកពេលបោះឆ្នោតម្តងទៀត ដោយលើកហេតុផលថារដ្ឋាភិបាលត្រូវរៀបចំពិធីឡើងគ្រងរាជសម្បត្តិរបស់ព្រះមហាក្សត្រខ្លួនជាមុខសិន។