តុលាការថៃ បានចេញដីការចាប់ខ្លួនមនុស្សពីរនាក់ដែលជាប់ទាក់ទងនឹងករណីនាវាទេសចរណ៍ដែលដឹកភ្ញៀវទេសចរចិនលិចនៅភូកេត។
យោងតាមការចុះផ្សាយរបស់សារព័ត៌មានឌឹណេសិនរបស់ថៃ តុលាការខេត្តភូកេតកាលពីថ្ងៃទី១២កន្លងទៅ ប្រទេសថៃបានចេញដីការចាប់ខ្លួនមនុស្សពីរនាក់ ដែលក្នុងនោះរួមមាន ម្ចាស់នាវាទេសចរណ៍ និងប្រធានវិស្វករសម្រាប់នាវានេះ។ ពួកគេទាំងពីរនាក់ត្រូវបានតុលាការប្រឈមមុខនឹងការចោទពីបទធ្វេសប្រហែសដែលបណ្ដាលអោយបាត់បង់អាយុជីវិតនិងបង្កររបួសស្នាមដល់អ្នកដទៃ។
តាមប្រភពដដែលនេះ ប្រសិនបើពួកគេត្រូវបានតុលាការរកឃើញថាមានទោសដូចបានបញ្ជាក់ខាងលើនេះមែន ពួកគេប្រឈមនឹងការជាប់ពន្ធនាគាររយៈពេល១០ឆ្នាំ។
កាលពីយប់ថ្ងៃទី៤ ខែកក្កដានេះ ភ្ញៀវទេសចរចិនចំនួន៩៣នាក់រួមជាមួយក្រុមនាវឹកនិងមគ្គុទេស ទេសចរណ៍ ជាជនជាតិថៃ១២នាក់ផ្សេងទៀត បានជិះនាវាកំសាន្តនៅសមុទ្រនៅខេត្តភូកេតរបស់ថៃ ខណៈពេលនោះពួកគេបានជួបព្យុះបក់បោកដែលមានរលកកម្ពស់៥ម៉ែត្រ ជាហេតុបណ្ដាលឲ្យនាវារបស់ពួកគេលិចនៅពេលនោះ។ គ្រោះថ្នាក់បានបណ្ដាលអោយមនុស្សចំនួន៥៧នាក់បាត់បង់ជីវិត។