គណបក្សប្រជាធិបតេយ្យមូលដ្ឋាន ហៅកាត់ថា គ.ប.ម ព្រមានដកខ្លួន ចេញពីការបោះឆ្នោតជ្រើសតាំងតំណាងរាស្ដ្រនាចុងខែកក្កដានេះ ក្រោយអះអាងថាអាជ្ញាធរមួយចំនួន មិនជួយសម្រួលក្បួនឃោសនាបោះឆ្នោត និងមានការគំរាមកំហែងសកម្មជនបក្សខ្លួន។
អ្នកនាំពាក្យ គ.ប.ម លោក សាម អ៊ីន មានប្រសាសន៍ថា កាលពីថ្ងៃទី១០ ខែកក្កដា ចំថ្ងៃឃាតកម្មសម្លាប់លោក កែម ឡី គឺគណបក្សរបស់លោកបានដឹកនាំសកម្មជនហែរក្បួនឃោសនារកសំឡេងឆ្នោត នៅក្នុងរាជធានីភ្នំពេញ ប៉ុន្តែអាជ្ញាធរមិនជួយសម្របសម្រួលក្បួនឃោសនាដូចបក្សនយោបាយទេ ខណៈនៅខេត្តមណ្ឌគិរី និងខេត្តបាត់ដំបងមានការគំរាមកំហែងសកម្មជនចែកខិត្តប័ណ្ណ និងថាមានជនមិនស្គាល់អត្តសញ្ញាណហែកផ្ទាំងបដាគណបក្សដែលបិតលើដើមឈើទៀតផង។
អ្នកនាំពាក្យរូបនោះ ព្រមានថា បើអាជ្ញាធរ និង គ.ជ.ប មិនជួយសម្រួលដល់គណបក្សនយោបាយដែលហែរក្បួនទេ គណបក្សនេះនឹងពិចារណាដកខ្លួនចេញពីការប្រកួតប្រជែងបោះឆ្នោត នាចុងខែកក្កដាខាមុខនេះ។
អ្នកនាំពាក្យ (គ.ប.ម) លោក សាម អ៊ីន
ទោះជាយ៉ាងណា លោក សាម អ៊ីន បញ្ជាក់ថា គ.ប.ម មិនទាន់មានគម្រោងប្តឹងទៅ គ.ជ.ប នៅឡើយ ដោយថាទុកពេលឲ្យអាជ្ញាធរ និង គ.ជ.ប ថ្នាក់រាជធានី/ខេត្ត ធ្វើកិច្ចការនេះជាមួយមន្ត្រីថ្នាក់ក្រោម ដើម្បីកុំឲ្យមានភាពមិនប្រក្រតីកើតឡើងទៀត។
អគ្គលេខាធិការរង គ.ជ.ប លោក សោម សូរីដា មានប្រសាសន៍ថា អំឡុងពេលឃោសនាបោះឆ្នោតចំនួន៩ថ្ងៃកន្លងទៅនេះ គ.ជ.ប ទទួលបានបណ្តឹងចំនួន៧។
ទោះជាបែបនេះក្តី មន្ត្រី គ.ជ.ប រូបនោះ បានលើកទឹកចិត្តឲ្យគណបក្សនយោបាយ ដែលជួបបញ្ហាប្រឈមក្នុងអំឡុងពេលឃោសនារកសំឡេងឆ្នោត ត្រូវដាក់ពាក្យប្តឹងទៅការិយាល័យ គ.ជ.ប រាជធានី/ខេត្ត ដើម្បីជួយសម្រួលដល់បក្សនយោបាយនោះ ឲ្យបានទាន់ពេលវេលា។
អគ្គលេខាធិការរង គ.ជ.ប លោក សោម សូរីដា
ក្រសួងមហាផ្ទៃកាលពីម្សិលមិញបានចេញសេចក្ដីណែនាំមួយទៅមន្រ្តីរាជការ អាជ្ញាធរគ្រប់លំដាប់ថ្នាក់ ឬមន្រ្តីនគរបាល ថា ពួកគេអាចចូលរួមសកម្មភាពឃោសនារបស់បក្សនយោបាយបាន នៅក្រៅម៉ោងធ្វើការ ឬថ្ងៃឈប់សម្រាកការងារដែលកំណត់ដោយរដ្ឋ តែពេលចូលរួមសកម្មភាពឃោសនាមិនត្រូវពាក់ឯកសណ្ឋាន និងមិនត្រូវធ្វើអ្វីដេលនាំឲ្យមានការគំរាមកំហែងឡើយ។
អ្នកស្រាវជ្រាវពីការអភិវឌ្ឍន៍សង្គម លោក មាស នី មានប្រសាសន៍ថា បើមានការរារាំង គំរាមកំហែងសកម្មជនគាំទ្របក្សតូចៗគណបក្សនយោបាយដែលរងគ្រោះ ត្រូវក្លាហានក្នុងការតស៊ូមតិ ឬដាក់ពាក្យប្តឹងទៅ គ.ជ.ប ស្របតាមច្បាប់បោះឆ្នោត ដោយថាកុំឲ្យបក្សកាន់អំណាចជិះសេះលែងដៃ។
អ្នកស្រាវជ្រាវពីការអភិវឌ្ឍន៍សង្គម លោក មាស នី
ក្នុងប្រតិទិនរបស់ គ.ជ.ប បានឲ្យដឹងថា យុទ្ធនាការឃោសនារកសំឡេងឆ្នោតថ្នាក់ជាតិ មានរយៈពេល២០ថ្ងៃ ដោយចាប់ផ្តើមពីថ្ងៃទី៧ ដល់ថ្ងៃទី២៧ ខែកក្កដា ឆ្នាំ២០១៨នេះ ខណៈការបោះឆ្នោតថ្នាក់ជាតិអាណត្តិនេះ មានបក្សនយោបាយចំនួន២០ចូលរួមប្រកួតប្រជែង៕