ក្រុមហ៊ុនវារីអគ្គិសនីចិន ស៊ីណូហាដ្រូកំចាយ បានបើកទ្វាទឹក២ ខណៈដែលភ្លៀងនៅតែបន្ដធ្លាក់ខ្លាំង ហើយអាជ្ញាធរខេត្តកំពតបានប្រាប់ឲ្យប្រជាពលរដ្ឋមានការប្រុងប្រយ័ត្ន។
អភិបាលរងខេត្តកំពត លោក ស៊ីម វុទ្ធា បានប្រាប់វីអូឌីតាមទូរសព្ទនៅថ្ងៃនេះថា ទំនប់វារីអគ្គិសនីកំចាយ បានបើកទ្វារទឹកទី២ កាលពីថ្ងៃទី១៥ ខែកក្កដា ឆ្នាំ២០១៨ ក្រោយពេលភ្លៀងធ្លាក់ខ្លំាងបន្តបន្ទាប់ ដែលធ្វើឲ្យអាងស្តុកទឹកពេញ។ក្រុមហ៊ុនបានបើកទ្វារទឹកដើម្បីបញ្ជៀសការបាក់ទំនប់វារីអគ្គិសនី និងអាចបង្កគ្រោះថ្នាក់ដល់ប្រជាពលរដ្ឋនៅក្បែរនោះ។
លោក វុទ្ធា បានមានប្រសាសន៍ថា មុនបើកទ្វារទឹកខាងក្រុមហ៊ុន និងអាជ្ញាធរខេត្តបានជូនដំណឹងដល់អាជ្ញាធរមូលដ្ឋានក៏ដូចជា ប្រជាពលរដ្ឋឲ្យមានការប្រុងប្រយ័ត្ន។ កម្លាំងសមត្ថកិច្ចខេត្ត និង គណកម្មាធិការគ្រប់គ្រងគ្រោះមហន្ដរាយខេត្ត បានត្រៀមខ្លួនរួចជាស្រេចដើម្បីជួយដល់ប្រជាពលរដ្ឋឲ្យបានទាន់ពេលវេលា និងបន្តតាមដានស្ថានភាពទឹក ប៉ុន្តែមកដល់រសៀលថ្ងៃចន្ទនេះពុំមានលិចល់ងផ្ទះប្រជាពលរដ្ឋនោះទេ។
លោក វុទ្ធា បានបន្ថែមថា ក្រុមហ៊ុនវារីអគ្គិសនីចិន ស៊ីណូហាដ្រូកំចាយ នឹងបើកទ្វារទឹកទី៣និងទី៤ បន្ថែមទៀត ប្រសិនបើភ្លៀងបន្តធា្លក់ខ្លាំង។
ក្រុមហ៊ុនវារីអគ្គិសនីចិន ស៊ីណូហាដ្រូកំចាយ បានបើកទ្វារទឹកទី១ កាលពីល្ងាចថ្ងៃទី១២ ខែកក្កដា ឆ្នាំ២០១៨បន្ទាប់ពីភ្លៀងធ្លាក់ពេញអាង។
ទំនប់វារីអគ្គិសនីកំចាយ ត្រូវបានបើកបង្ហូរទឹកម្ដងរួចមកហើយកាលពីឆ្នាំ២០១៥កន្លងមក បន្ទាប់ពីមានភ្លៀងធ្លាក់ខ្លាំងជាប់ៗគ្នារយៈពេល ២ថ្ងៃ ដែលបង្កឲ្យជន់លិចឃុំចំនួន ៣ នៅក្នុងស្រុកទឹកឈូរ និងជន់លិចផ្ទះសម្បែងពលរដ្ឋជិត ២ពាន់គ្រួសារ។
ទំនប់វារីអគ្គិសនីកំចាយ ត្រូវបានដាក់ឲ្យប្រើប្រាស់នៅចុងឆ្នាំ២០១១ ដែលផលិតថាមពលបាន ១៩៣,២មេហ្គាវ៉ាត់៕
