កងរាជអាវុធហត្ថខេត្តកំពង់ធំបានឃាត់ខ្លួនអតីតនាយទាហាននៃកងរាជអាវុធហត្ថម្នាក់កាលពីម្សិលមិញ បន្ទាប់ពីបានបង្ហោះព័ត៌មានតាមបណ្តាញសង្គម ដោយអះអាងថាខ្លួនបាត់បង់ដំណែងក្នុងកងរាជអាវុធហត្ថទាំងអយុត្តិធម៌ ដោយសារការបង្ក្រាបគ្រឿងញៀនបុគ្គលមានឥទ្ធិពល។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានប្រាប់វី.អូ.ឌីតាមទូរសព្ទនៅថ្ងៃនេះថា កងរាជអាវុធហត្ថបានឃាត់ខ្លួនបុរសឈ្មោះ សន សំនៀង ជាម្ចាស់គណនីហ្វេសប៊ុក យមរាជ លោកីយ៍ កាលពីល្ងាចថ្ងៃទី១៥ ខែកក្កដា ឆ្នាំ២០១៨ បន្ទាប់ពីបុគ្គលនេះបានបង្ហោះព័ត៌មានមិនពិតដែលធ្វើឲ្យខូចកិត្តិយសកងរាជអាវុធហត្ថខេត្ដ។
នៅក្នុងបណ្ដាញសង្គមឈ្មោះ «យមរាជលោកិយ៍» ដែលត្រូវបានចែកចាយតគ្នា ឈ្មោះ សន សំនៀង បានផ្សាយផ្ទាល់ជាបន្តបន្ទាប់ថាខ្លួនត្រូវបានបាត់បង់ដំណែងក្នុងកងរាជអាវុធហត្ថទាំងអយុត្តិធម៌ ដោយសារការបង្ក្រាបបទល្មើសគ្រឿងញៀន ១៧២ គីឡូក្រាម កាលពីឆ្នាំ ២០១៣ ដែលលោកថាជារបស់បុគ្គលមានឥទ្ធិពល។
កងរាជអាវុធហត្ថលើផ្ទៃប្រទេស នៅថ្ងៃទី១៥ កក្កដា ឆ្នាំ២០១៨ បានចេញសេចក្តីថ្លែងការណ៍ដោយ ច្រានចោល ការបង្ហោះព័ត៌មាននេះ ហើយអះអាថា សន សំនៀង ត្រូវបានលុបឈ្មោះចេញពីក្របខណ្ឌកងរាជអាវុធហត្ថ ក្នុងឆ្នាំ២០១៧ដោយសារតែការប្រព្រឹត្តកំហុសឆ្គងជាបន្ដបន្ទាប់រួមមាន បង្កគ្រោះថ្នាក់ចរាចរបណ្ដាលឲ្យមនុស្សស្លាប់ម្នាក់នៅនឹងកន្លែង ការបាញ់បោះសេរី និងប្រើប្រាស់អំពើហិង្សា។
លោក អេង ហ៊ី បានបន្ថែមថាបមន្ត្រីកងរាជអាវុធហត្ថខេត្តកំពង់ធំ កំពុងសាកសួរជនសង្ស័យ និងចាត់ការតាមនិតិវិធី។