ខុសពីការប្រកួតមុនដែលលាភ សំណាង មកពីក្លិបទីបញ្ជាការកងពលតូចលេខ៧០ តែងតែមានសំណាងដូចឈ្មោះរបស់ខ្លួន សម្រាប់ការប្រកួតកាលពីថ្ងៃទី១៤ កក្កដា នៅក្នុងព្រឹត្តិការណ៍ TV5 Boxing Knock out Series(K-Cement) ដែលជាការប្រកួតជម្រុះជើងឯកដ៏សំខាន់ក្នុងប្រភេទទម្ងន់៦០គីឡូក្រាម គេបែរជាស៊យស្ទួនៗទៅវិញ។ មិនត្រឹមតែរងការអាម៉ាស និងធ្លាក់ហាលអាវប៉ុណ្ណោះទេ ប៉ុន្តែក៏បែករយះក្បាលហូរឈាមជូតឡើងជោគសំឡីពិបាកភ្នែកផងដែរ។
ការប្រកួតដែលបានធ្វើឡើងនៅលើសង្វៀនប៉ុស្ដិ៍លេខ៥នៅព្រែកកំពិសនេះ គឺជាការបើកឆាកប្រដាល់ដែលប៉ុស្ដិ៍លេខ៥បានប្ដូរម៉ោងពេលប្រកួត ខណៈដែលកាលពីមុនសង្វៀននេះបើកប្រកួតរៀងរាល់ថ្ងៃសៅរ៍វេលាម៉ោង៥ដល់ម៉ោង៧ តែប៉ុន្តែលើកនេះបានប្ដូរទៅម៉ោង៦រហូតដល់ម៉ោង៨វិញ ដោយរក្សាទុកនៅថ្ងៃដដែល។
អ្នករៀបចំការប្រកួតបានអះអាងថា ហេតុផលនៃការប្ដូរម៉ោងពេលប្រកួត គឺដោយសារតែប៉ុស្ដិ៍លេខ៥យល់ថា បើការប្រកួតរំកិលទៅយប់បន្តិច គឺងាយស្រួលកម្មករកម្មការិនីចេញធ្វើការចូលមកទស្សនា។
បើទោះជាការយល់ឃើញនេះគឺខុសពីការលើកឡើងរបស់អ្នកទស្សនាមួយចំនួនដែលថាទីតាំងនោះបើប្រកួតយប់ពេកនឹងពិបាក ក៏អ្នករៀបចំការប្រកួតនៅតែយល់ថាការផ្លាស់ប្ដូរម៉ោងពេលនឹងល្អសម្រាប់ព្រឹត្តិការណ៍របស់ខ្លួន។
ការប្រកួតនៅក្នុងថ្ងៃនោះ កីឡាករ លាភ សំណាង ត្រូវគេមើលឃើញថាមិនមានយីអ៊ុនដូចមុនទៀតទេ ខណៈដែលកាលពី រដូវកាលមុនលោកគឺជាកីឡាករដែលមានសំណាងបានឈ្នះ និងបានឡើងទៅវគ្គជម្រុះជុំទី២ទី៣ ប៉ុន្តែក្រោយពេលធ្លាក់ហាលអាវកាលពីមុនរួចទៅហើយ បែរជាមកធ្លាក់ក្នុងជុំទី១សម្រាប់ព្រឹត្តិការណ៍ថ្មីនេះ។ ម្នាក់ៗមានការភ្ញាក់ផ្អើល ដែលការប្រកួតលើកនេះ គេស៊យមិនដូចមុន ដោយក្រៅពីត្រូវអ្នកគាំទ្ររិះគន់ថា ជាកីឡាករជើងចាស់មានបទពិសោធន៍ច្រើនមកចាញ់ជើងថ្មីហើយ ក៏ត្រូវអស់ឱកាសឡើងទៅប្រកួតនៅវគ្គបន្តទាំងក្នុងជុំដំបូងខុសពីការបង្ហាញខ្លួនមុនៗ។
ការប្រកួតដែលជាជម្រុះរវាងកីឡាករ៣២រូប យកតែ១៦នាក់នេះ កីឡាករ លាភ សំណាង ទទួលបានលទ្ធផលផ្ទុយពីឈ្មោះតែម្ដង នៅពេលដែលប៉ះជាមួយកីឡាករបង្គោលខៀវ កូយ ឡាយ ហើយត្រូវកីឡាករបង្គោលខៀវរូបនេះ វាយកែងដល់ថ្នាក់បែករយះពីលើថ្ងាសឡើងហូរឈាមដល់ថ្នាក់ធ្វើអោយប៉ះការប្រកួតរបស់លោកនោះផង ទើបធ្វើអោយគេមិនអាចទៅមុខរួច ដោយសារតែត្រូវជូតឈាមបណ្ដើរប្រកួតបណ្ដើរ។
យ៉ាងណាមិញ កីឡាកររូបនេះ មិនមានប្រតិកម្ម ឬតវ៉ា ថាការហាលអាវរបស់ខ្លួនជារឿងមិនសមនោះទេ ដោយបានទាំងទទួលស្គាល់ថា បណ្ដាលមកពីថ្វីដៃរបស់កីឡាករ កូយ ឡាយ ល្អជាងខ្លួន ទើបធ្វើអោយខ្លួនបរាជ័យទាំងអស់ចិត្ត។ ប៉ុន្តែកែងរបស់ កូយ ឡាយ មិនត្រឹមតែធ្វើអោយ លាភ សំណាង បាត់លាភ បាត់សំណាង និងធ្លាក់ហាលអាវប៉ុណ្ណោះទេ ប៉ុន្តែក៏បែករយះពេលក្បាលផ្នែកខាងមុខ មិនក្រោម៣ទៅ៥ថ្នេរផងដែរ៕