អគ្គនាយកដ្ឋានគយប្រកាសថា ក្នុងរយៈពេល៦ខែនៃឆ្នាំ២០១៨នេះប្រមូលពន្ធនាំចេញនាំចូលបានជាង១ពាន់លានដុល្លារដែលកើនឡើងលើសឆ្នាំមុនប្រមាណ២៧ភាគរយ។
យោងតាមការចុះផ្សាយរបស់អគ្គនាយកដ្ឋានគយកាលពីម្សិលមិញឲ្យដឹងថាក្នុងឆមាសទី១ ឆ្នាំ២០១៨ នេះ ចំណូលសរុប ដែលប្រមូលបាន មានប្រមាណ ៤ ៧៣៦ប៊ីលានរៀល ឬប្រមាណជា ១ ១៧២លានដុល្លារអាមេរិក។ ចំនូននេះបើធៀបនឹងឆមាសទី១ ឆ្នាំ២០១៧ មានការកើនឡើងប្រមាណ ២៧,៨% ដែលក្នុងនោះ ចំណូលពីមុខទំនិញយានយន្តមានកំណើន ៤០,៥%, ប្រេងនិងថាមពលកើនឡើង ១០,៥%, គ្រឿងសំណង់កើនឡើង ២៦,៦% និងមុខទំនិញចម្រុះផ្សេងទៀតមានកំណើន ២៧%។
អគ្គនាយកដ្ឋានគយក៏បានឲ្យដឹងផងដែរថា តួលេខបណ្ដោះអាសន្ននៃទំហំពាណិជ្ជកម្មអន្តរជាតិក្នុងឆមាសទី១ ឆ្នាំ២០១៨ មានការកើនឡើងតម្លៃនាំចូលសរុប ១៧% ហើយតម្លៃនាំចេញសរុបមានកំណើនជាង ៧% ក្នុងនោះតម្លៃផលិតផលកាត់ដេរនាំចេញកើនឡើងជិត ១៣% និងតម្លៃផលិតផលស្រូវនិងអង្ករកើនឡើង ៥៣%។
បើតាមអគ្គនាយកដ្ឋានគយ ប្រភពចំណូលពន្ធ និងអាករសំខាន់ៗរបស់កម្ពុជាមាន យានយន្តនិងគ្រឿងចក្រ (ប្រមាណជា៤២%នៃចំណូលសរុប) ប្រេងឥន្ធនៈ និងថាមពល (ត្រូវជាប្រមាណ ២០%នៃចំណូលសរុប) ទំនិញចម្រុះនិងគ្រឿងសំណង់។
ក្នុងឆ្នាំ២០១៧ ចំណូលពន្ធគយសម្រេចបានជាង ១ ៩០០ លានដុល្លារអាមេរិក ដែលកើនលើសឆ្នាំ២០១៦ប្រមាណ១០ភាគរយ៕