សហគមន៍អឺរ៉ុប បានអំពាវនាវអោយប្រទេសមហាអំណាចធំៗរួមគ្នាធ្វើកំណែទម្រង់អង្គពាណិជ្ជកម្មពិភពលោក។
ប្រធានក្រុមប្រឹក្សាសហមន៍អឺរ៉ុប លោក ដូណាល់ ថាស់ បានស្នើឲ្យប្រទេសចិន អាមេរិក និងរុស្ស៊ី រួមគ្នាជាមួយអឺរ៉ុបក្នុងការធ្វើការកែប្រែលើលក្ខខណ្ឌមួយចំនួនរបស់អង្គការពាណិជ្ជកម្មពិភពលោក។ យោងតាមសេចក្តីប្រកាសព័ត៌មានដែលចេញដោយផ្សាយដោយក្រុមប្រឹក្សាសហគមន៍អឺរ៉ុប ការអំពាវនាវរបស់មេដឹកអឺរ៉ុបលោក ដូណាល់ ថាស់ ធ្វើឡើងក្នុងជំនួបកំពូលលើកទី២០រវាងមេដឹកនាំអឺរ៉ុបនិងចិននាទីក្រុងប៉េកាំងកាលពីថ្ងៃទី១៦ខែកក្កដាកន្លងទៅ។
ក្នុងសេចក្តីប្រកាសព័ត៌មានដដែលនោះ លោក ដូណាល់ ថាស់ បានជម្រុញឲ្យប្រទេសទាំងអស់នោះរួមគ្នាធ្វើកំណែទម្រង់អង្គការពាណិជ្ជកម្មពិភពលោកទៅលើច្បាប់មួយចំនួនរបស់ស្ថាប័ននេះ ដែលរួមមានច្បាប់ស្តីពីការផ្ដល់ប្រាក់ទំនុកបម្រុងដែលរដ្ឋាភិបាលជួយដល់វិស័យឧស្សាហកម្មរបស់ខ្លួន ច្បាប់កម្មសិទ្ធិបញ្ញា ការកាត់បន្ថយតម្លៃការធ្វើពាណិជ្ជកម្ម ក៏ដូចជាការអភិវឌ្ឍជាយុទ្ធសាស្រ្តក្នុងការដោះស្រាយជម្លោះពាណិជ្ជកម្មឲ្យមានប្រសិទ្ធភាពជាងមុនជាដើម។
លោក ដូណាល់ ថាស់ បាននិយាយថាវាជាកាតព្វកិច្ចរបស់អឺរ៉ុប និង ចិន ក៏ដូចជាអាមេរិកនិងរុស្ស៊ីក្នុងការថែរក្សាស្ថិរភាពនិងធ្វើឲ្យពិភពលោកមានការរីកចម្រើន ប៉ុន្តែមិនមែនចាប់ផ្ដើមដោយការធ្វើសង្រ្គាមពាណិជ្ជកម្មជាមួយគ្នានោះទេ។ លោកបន្ថែមថាប្រទេសនីមួយៗត្រួវតែមានភាពក្លាហាននិងទទួលខុសត្រូវក្នុងការធ្វើកំណែទម្រង់មួយដែលយកគោលការណ៍សណ្ដាប់ធ្នាប់ពិភពលោកជាគោល។
អ្នកនាំពាក្យក្រសួងការបរទេសចិន លោកស្រី ហួរ ឈុនយីង បានឆ្លើយទៅកាន់អ្នកសារព័ត៌មានក្នុងសន្និសីទការសែតមួយដែលធ្វើឡើងកាលពីថ្ងៃទី១៧ ខែកក្កដាម្សិលមិញនេះថា ចិននិងអឺរ៉ុបជាកម្លាំងពីរដ៏សំខាន់ដែលធ្វើពិភពលោកមានស្ថិរភាព។
អ្នកស្រីបន្តថាចិននឹងធ្វើការជាមួយអឺរ៉ុបបន្តទៀត ក្នុងការបង្កើនទំនាក់ទំនងជាយុទ្ធសាស្រ្តនិងកិច្ចសហការគ្នាដើម្បីគាំទ្រការធ្វើពាណិជ្ជកម្មពហុភាគីដោយសេរីរវាងប្រទេសនានាដោយឈរលើមូលដ្ឋានច្បាប់ បង្កើនសេរីភាវូបនីយកម្មនៃការវិនិយោគ និង ពាណិជ្ជកម្ម ដើម្បីធ្វើឲ្យសេដ្ឋកិច្ចពិភពលោកមានការប្រសើរឡើង ក៏ដូចជានាំមកនូវសន្តិភាព ស្ថិរភាព និងការអភិវឌ្ឍសម្រាប់សកលលោកទាំងមូល។
ការអំពាវនាវរបស់ប្រធានក្រុមប្រឹក្សាសហគមន៍អឺរ៉ុបលោកដូណាល់ ថាស់ បានធ្វើឡើង ស្របពេលដែលមេដឹកនាំអាមេរិកលោក ត្រាំ និងមេដឹកនាំរុស្ស៊ីលោក ពូទីន ក៏មានជំនួបជាមួយគ្នាដែរនៅប្រទេសហូឡង់។
ក្នុងរយៈពេលប៉ុន្មានខែចុងក្រោយនេះ ប្រទេសមហាអំណាចសេដ្ឋកិច្ចធំៗមួយចំនួនមានដូចជា អឺរ៉ុប កាណាដា និងចិនជាដើម ចាប់ផ្ដើមមើលមុខគ្នាលែងត្រង់ជាមួយសហរដ្ឋអាមេរិកដោយសារតែការតម្លើងពន្ធគយរបស់អាមេរិក។ អឺរ៉ុប និងកាណាដាបានខកចិត្តជាខ្លាំងជាមួយនឹងអាមេរិកដែលជាសម្ព័ន្ធមិត្តដ៏ល្អរបស់ខ្លួនជាយូរមកហើយ ដោយសារតែអាមេរិកបានតម្លើងពន្ធដែកនិងអាលុយមីញ៉ូមដែលនាំចូលពីប្រទេសទាំងនេះ។
ជាមួយគ្នានេះ អាមេរិកក៏បានតម្លើងពន្ធលើទំនិញជាច្រើនរយមុខរបស់ចិនផងដែរដែលបានចាប់ផ្ដើមនាដើមខែនេះ។ ប្រទេសដែលរងផលប៉ះពាល់ដោយការដំឡើងពន្ធនាំចូលទឹកដីអាមេរិកទាំងនោះក៏មិនទុកឲ្យអាមេរិកធ្វើអ្វីតាមអំពើចិត្តដែរ។ ក្រុមប្រទេសទាំងនោះក៏បានធ្វើការសងសឹកវិញដោយការដំឡើងពន្ធគយលើទំនិញដែលនាំចូលពីអាមេរិកដូចគ្នាទៅនឹងអ្វីដែលអាមេរិកធ្វើមកខ្លួន។
