រដ្ឋាករស្វយ័តដឹកជញ្ជូនសាធារណៈ កំពុងដំឡើងដាក់ឲ្យប្រើប្រាស់នូវសេវាកម្មអ៊ីនធឺណិតនៅតាមរថយន្តក្រុងដែលអាចឲ្យអ្នកដំណើរប្រើប្រាស់ដោយសេរីនិងឥតគិតថ្លៃ។
អ្នកនាំពាក្យសាលាក្រុង លោក ម៉េត មាសភក្តី បានប្រាប់វីអូឌីនៅថ្ងៃនេះថា ការដាក់អោយប្រើប្រាស់ប្រព័ន្ធអ៊ីនធឺណិតដោយឥតគិតថ្លៃនៅតាមរថយន្តក្រុងសាធារណៈ ធ្វើឡើងក្នុងគោលបំណងផ្តល់ការពេញចិត្តនិងភាពសប្បាយរីករាយបន្ថែមមួយកំរិតទៀតទៅដល់អ្នកដំណើរដែលបានប្រើប្រាស់សេវារថយន្ត។
លោកបានបន្តថា បើគិតត្រឹមម្សិលមិញនេះ រដ្ឋាករស្វយ័តដឹកជញ្ជូនបានបំពាក់និងដាក់អោយប្រើប្រាស់បានចំនួនប្រមាណ ៨០គ្រឿងហើយ ហើយកំពុងតែបន្តបំពាក់រហូតដល់គ្រប់រថយន្តក្រុងទាំងអស់។
បើតាមលោក ម៉េត មាសភក្តី ចំនួនអ្នកដំណើរដែលប្រើប្រាស់ឡាននៅពេលបច្ចុប្បន្ននេះមានចំនួនប្រមាណ២ម៉ឺននាក់ជារៀងរាល់ថ្ងៃ។