គណគម្មាធិការជាតិរៀបចំការបោះឆ្នោត ហៅកាត់ គ.ជ.ប បានរម្លឹកទៅគណបក្សនយោបាយដែលកំពុងធ្វើយុទ្ធនាការឃោសនារកសំឡេងឆ្នោតសម្រាប់អាណត្តិទី៦នេះ ឲ្យគោរពក្រមសីលធម៌ ដោយថា កុំយកព្រះមហាក្សត្រមកឃោសនា។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ប្រាប់VODនៅព្រឹកនេះថា នេះគឺការរម្លឹករួមដើម្បីឲ្យយុទ្ធនាការកាន់មានភាពល្អប្រសើរបន្ថែមទៀត។
អ្នកនាំពាក្យ គ.ជ.ប លោក ហង្ស ពុទ្ធា
អគ្គលេខាធិការរង នៃគណបក្សហ្វ៊ុនស៊ិនប៉ិច លោក ផន ចន្ថា មានប្រសាសន៍ការរម្លឹកនេះជាការត្រឹមត្រូវ។ លោកបន្តថាគណបក្សលោកមិនបានយកព្រះមហាក្សត្រមកឃោសនាទេ។
អគ្គលេខាធិការរង នៃគណបក្សហ្វ៊ុនស៊ិនប៉ិច លោក ផន ចន្ថា
អគ្គលេខាធិការរង នៃគណបក្សខ្មែររួបរួមជាតិ លោក ភិន ផុន គាំទ្រចំពោះការរម្លឹករបស់ គ.ជ.ប និងទទួលយកបាន។
លោក ភិន ផុនលើកឡើងថា៖ «ដោយសារគ្រប់គណបក្សនយោបាយតែងតែមានអំពើល្អ និងអំពើអាក្រក់ តែបើយើងយកព្រះកិត្តិនាមព្រះមហាក្សត្រទាំងព្រះបរមរតនកោដិ និងព្រះមហាក្សត្របច្ចុប្បន្នមកឃោសនា យើងធ្វើឲ្យអាប់អោនដល់ព្រះកិត្តិយសរបស់ព្រះអង្គបាទ! នេះជាការយល់ឃើញរបស់គណបក្សខ្មែររួបរួមជាតិយើងខ្ញុំ»។
ទោះយ៉ាងណា លោក ភិន ផុន ថាគណបក្សលោកគ្រាន់តែលើកពីការតស៊ូរបស់ស្ថាបនិកគណបក្សលោកជាមួយអតីតព្រះមហាក្សត្រតែបន្តិចប៉ុណ្ណោះ។
សម្រាប់អ្នកនាំពាក្យ គណបក្សប្រជាធិបតេ្យមូលដ្ឋាន លោក សាម អ៊ីន មានប្រសាសន៍ថា លោកគាំទ្រគ.ជ.ប និងបានរិះគន់ដល់ មេដឹកនាំអតីតគណបក្សប្រឆាំងដែលភ្ជាប់ព្រះមហាក្សត្រទៅនឹងការអំពាវនាវកុំឲ្យពលរដ្ឋទៅបោះឆ្នោត។
សម្រាប់អ្នកនាំពាក្យ គណបក្សប្រជាធិបតេ្យមូលដ្ឋាន លោក សាម អ៊ីន
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា លោកឯកភាពកុំឲ្យយកព្រះមហាក្សត្រមកពាក់ព័ន្ធជាមួយរឿងនយោបាយ។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស
នៅសល់តែ៧ថ្ងៃទៀតប៉ុណ្ណោះ យុទ្ធនាការឃោសនាបោះឆ្នោតនឹងត្រូវបញ្ចប់។ ការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងប្រព្រឹត្តទៅនៅថ្ងៃអាទិត្យ ទី២៩ខែកក្កដា ឆ្នាំ២០១៨ ដោយមានគណបក្សចំនួន២០ ចូលរួមប្រកួត។
