គណៈកម្មាធិការជាតិគ្រប់គ្រងគ្រោះមហន្តរាយនៃប្រទេសកម្ពុជា និងកម្មវិធីអភិវឌ្ឍន៍សហប្រជាជាតិ (UNDP) នៅម្សិលមិញ បានរៀបចំការពិគ្រោះយោបល់គ្នាស្តីពីយុទ្ធសាស្រ្តសម្រាប់កាត់បន្ថយហានិភ័យគ្រោះមហន្តរាយនៅប្រទេសកម្ពុជា។
យោងទៅតាមសេចក្តីប្រកាសព័ត៌មានរបស់កម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជាចុះនៅថ្ងៃទី២០ខែកក្កដា គណៈកម្មាធិការជាតិគ្រប់គ្រងគ្រោះមហន្តរាយ រួមជាមួយ UNDP និងដៃគូដទៃទៀត កំពុងអនុវត្តការបណ្តុះបណ្តាល អំពីការវាយតម្លៃលើតម្រូវការបន្ទាប់ពីគ្រោះមហន្តរាយ ដែលជាផ្នែកមួយនៃការត្រៀមបង្ការរបស់ប្រទេសកម្ពុជាសម្រាប់យុទ្ធសាស្រ្តស្តារឡើងវិញ។
តាមប្រភពដដែល UNDP មានគោលដៅជួយរដ្ឋាភិបាលកម្ពុជា ដើម្បីពង្រីកការវិភាគរៀបចំផែនទីហានិភ័យ យុទ្ធសាស្រ្តជាតិក្នុងការតាមដាន និងរាយការណ៍អំពីវឌ្ឍនភាពជាតិក្នុងការសម្រេចក្របខ័ណ្ឌសែនដាយ SFDRR សម្រាប់កាត់បន្ថយហានិភ័យគ្រោះមហន្តរាយ ឆ្នាំ ២០១៥-២០៣០។
សេចក្តីប្រកាសព័ត៌មានដដែលនេះ កាលឆ្នាំ ២០១៣ ទឹកជំនន់បានប៉ះពាល់ដល់ខេត្តចំនួន ២០ ក្នុងចំណោមខេត្តទាំង២៥ របស់ប្រទេសកម្ពុជា ដែលបណ្តាលឲ្យបាត់បង់ជីវិតមនុស្ស ១៨០នាក់ និងបង្កការខូចខាតគិតជាទឹកប្រាក់ច្រើនជាង ១,៧លានដុល្លា។