មន្ត្រីការទូតចិនប្រចាំកម្ពុជា បានបង្ហាញជំហជាសាធារណៈថា សហភាពអឺរ៉ុបមិនគួរផ្តាច់ប្រព័ន្ធអនុគ្រោះពន្ធ ពីកម្ពុជាវិញ ដោយសារតែបញ្ហានយោបាយនោះទេ។
របត់នយោបាយនៅកម្ពុជាពេលនេះ ត្រូវបានក្រុមប្រទេសលោកសេរី វាយតម្លៃថាកំពុងដើរចេញពីគន្លងប្រជាធិបតេយ្យ ក្រោយពីមានការចាប់ឃុំខ្លួនអតីតមេដឹកនាំបក្សប្រឆាំងលោក កឹម សុខា រំលាយគណបក្សសង្គ្រោះជាតិ បិទប្រព័ន្ធផ្សព្វផ្សាយឯករាជ្យ និងចោទអង្គការសង្គមស៊ីវិលមួយចំនួនថា ជាក្រុមបដិវត្តពណ៌ប្រឆាំងរដ្ឋាភិបាល ។
បញ្ហានេះបានជំរុញសភាពអឺរ៉ុប ព្រមានជាថ្មីទៀតពីវិធាននៃការផ្តាច់ប្រព័ន្ធអនុគ្រោះពន្ធពីកម្ពុជា ប្រសិនបើការប្រឹងប្រែង ជំរុញលទ្ធិប្រជាធិបតេយ្យនៅកម្ពុជាត្រូវបានបរាជ័យនោះ។
សហភាពអឺរ៉ុប បានកំណត់មិនយកពន្ធលើផលិតផលគ្រប់យ៉ាងលើកលែងតែអាវុធ ដែលកម្ពុជានាំទៅលក់នៅទីផ្សាររបស់ខ្លួន។
ហើយប្រព័ន្ធអនុគ្រោះពន្ធ EBA ធ្វើឲ្យសហភាពអឺរ៉ុបក្លាយជាទីផ្សារដ៏ធំមួយ សម្រាប់កម្ពុជានាំផលិតផលកាត់ដេរ និងកសិកម្មទៅលក់នៅទីនោះដោយរួចពន្ធ។
រដ្ឋមន្ត្រីក្រសួងពាណិជ្ជកម្មបានប្រាប់នាយករដ្ឋមន្ត្រីថា ប្រាក់ដែលកម្ពុជាចំណេញពីការរួចពន្ធ រាល់មុខទំនិញនាំទៅលក់នៅផ្សារអឺរ៉ុបនៅឆ្នាំ២០១៦ មាន៦៧៦លានដុល្លារ។
ដោយឡែក របាយការណ៍របស់គណកម្មការអឺរ៉ុបដែលបានចេញផ្សាយកាលពីខែមេសាកន្លងទៅ ថាកម្ពុជាបាននាំចេញទំនិញទៅសហគមន៍អឺរ៉ុបក្នុងឆ្នាំ២០១៧ មានទំហំជាសាច់ប្រាក់ជាង៦ពាន់លានដុល្លា។ ទំនិញដែលកម្ពុជានាំចេញទៅសហគមន៍អឺរ៉ុប ភាគច្រើនគឺផលិតផលវាយនភណ្ឌកាត់ដេរ និងកសិកម្ម។
ទោះជាអឺរ៉ុបបានផ្តល់ទីផ្សារឲ្យកម្ពុជារកប្រាក់ចំណូលបានរាប់រយលានក្នុង១ឆ្នាំៗបែបនេះក៏ដោយ ប៉ុន្តែគេសង្កេតឃើញជិតកន្លះឆ្នាំមកនេះ សម្ពាធនៃប្រទេសលោកសេរី រួមទាំងសហភាពអឺរ៉ុបផង មិនអាចជំរុញឲ្យរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា ផ្លាស់ប្តូរការសម្រេចចិត្តរបស់ខ្លួនទេ ពោលគឺការបោះឆ្នោតដែលខ្វះតែមួយសប្តាហ៍ទៀតនឹងចូលមកដល់នេះ គ្មានវត្តមានអតីតបក្សប្រឆាំងចូលរួម ដូចនូវអ្វីដែលប្លុកលោកសេរីចង់ឃើញនោះទេ។
ភាពចម្រូងចម្រាសនេះ ធ្វើឲ្យអ្នកតាមខ្លះដាក់ការព្រួយបារម្ភថា ប្រព័ន្ធអនុគ្រោះពន្ធ របស់សហភាពអឺរ៉ុបកំពុងតែស្ថិតក្នុងភាពផុយស្រួយ ។ ចំណែកឯកអគ្គរដ្ឋទូតចិនប្រចាំកម្ពុជា លោក Xiong Bo ថ្លែងក្នុងពិធីមួយ ក្នុងរាជធានីភ្នំពេញ នាថ្ងៃទី១៧ខែកក្កដានេះថា៖
តើមានមូលហេតុអ្វីបានចិនចេញមុខរំឭកអឺរ៉ុបពីបញ្ហានេះ?
បណ្ឌិតវិទ្យាសាស្ត្រនយោបាយ និងជាប្រធានរាជ្យបណ្ឌិត្យសភាកម្ពុជា លោក សុខ ទូច វិភាគថាមានទិដ្ឋភាពបីដែលចិនចេញ មុខការពារចំណាត់ការរបស់រដ្ឋាភិបាល។
បើតាមលោកសុខ ទូច ទីមួយ ដោយសារតែកម្ពុជា ធ្លាប់ជួយចិនពីបញ្ហាជម្លោះសមុទ្រចិនខាងត្បូង នៅពេលដែលកម្ពុជាធ្វើជាម្ចាស់នៃកិច្ចប្រជុំអាស៊ាន។ លោកថាករណីនេះប្រទេសជាសមាជិកអាស៊ានច្រើនទៀត គ្មាននរណាចេញមុខជួយចិន ដូចកម្ពុជាទេ។
ទី២ចិនចង់បង្ហាញថាទំនាក់ទំនងពាណិជ្ជកម្មមហាអំណាចចិនមិនដែលភ្ជាប់ទៅនឹងបញ្ហានយោបាយដូចប្រទេសលោកសេរីនោះទេ និងទី៣ចិនទំនងជាដឹងមុខថា បើអឺរ៉ុបផ្តាច់ប្រព័ន្ធអនុគ្រោះពន្ធនេះ ពីកម្ពុជា អ្នកវិនិយោគរបស់ខ្លួនក៏ប៉ះពាល់ដែរ។
បណ្ឌិតវិទ្យាសាស្ត្រនយោបាយ និងជាប្រធានរាជ្យបណ្ឌិត្យសភាកម្ពុជា លោក សុខ ទូច
អ្នកជំនាញសេដ្ឋកិច្ចលោក ង៉ែត ជូ លើកឡើងថាប្រព័ន្ធអនុគ្រោះពន្ធនេះ បានផ្តល់អត្រាកំណើតសេដ្ឋកិច្ចដល់ទៅ៤០% និងផ្តល់ឱកាសដល់អ្នកវិនិយោគផ្នែកវិស័យកាត់ដេរ មានលទ្ធភាពប្រកួតប្រជែងជាមួយប្រទេសជិតខាង និងស្រូបយកកម្លាំងពលកម្មក្នុងស្រុកដល់ជាង៨០ម៉ឺននាក់ ។
អ្នកជំនាញសេដ្ឋកិច្ចរូបនេះ ពន្យល់ថា ប្រព័ន្ធអនុគ្រោះពន្ធរបស់អឺរ៉ុបនេះ បានផ្តល់ប្រយោជនទាំងអ្នកវិនិយោគ ទាំងរដ្ឋាភិបាលកម្ពុជា ក្នុងការបង្កើតការងារ ដើម្បីទប់ស្កាត់ចំណាកស្រុក។
អ្នកជំនាញសេដ្ឋកិច្ចលោក ង៉ែត ជូ
អ្នកវិភាគនយោបាយ លោក ឯម សុវណ្ណារ៉ា វិភាគថា ការដែលឯកអគ្គរដ្ឋទូតចិនចេញមុខ រំឭកអឺរ៉ុបបែបនេះ អាចថា ចិនមើលឃើញពីផលប៉ះពាល់ដល់អ្នកវិនិយោគ របស់ខ្លួននៅកម្ពុជាផង និងអាចជាសារបង្ហាញថា ចិននឹងមិនឈរឱបដៃមើលកម្ពុជា ដែលកំពុងរកសម្ពាធពីប្រទេសលោកសេរីនោះទេ ។
អ្នកវិភាគនយោបាយ លោក ឯម សុវណ្ណារ៉ា
សរុបជារួមអ្នកវិភាគថា ការថ្លែងរបស់មន្ត្រីជាន់ខ្ពស់ចិន នៅពេលនេះ បង្ហាញថារដ្ឋាភិបាលចិន កំពុងប្រើឥទ្ធិពលរបស់ខ្លួន ទប់ស្កាត់ វិធានការនានា របស់ក្រុមប្រទេសលោកសេរីតាមដែលអាចធ្វើទៅបាន ដើម្បីលើកទឹកចិត្តដល់អ្នកវិនិយោគ ចិននៅកម្ពុជា និងរដ្ឋាភិបាលកម្ពុជាផងដែរ បើទោះបីចិនថា ការតតាំងរបស់ខ្លួន គ្មានឥទ្ធិពលអ្វីទៅលើសហភាពអឺរ៉ុបក៏ដោយ៕