បច្ចេកវិទ្យាកាន់តែដើរឆ្ពោះទៅមុខ ការបង្កើតគ្រឿងម៉ាស៊ីនដែលសម្រួលដល់ប្រសិទ្ធភាពការងារ ក៏ដូចជា ជីវភាពរស់នៅប្រចាំថ្ងៃកាន់តែមានច្រើនឡើងៗ។ ទោះបីជាការបង្កើតស្នាដៃជាច្រើនបានដាក់តាំងបង្ហាញនៅលើទីផ្សារ ប៉ុន្ដែតម្លៃហាក់ដូចជាខ្ពស់ដែលប្រជាពលរដ្ឋមួយចំនួនមិនអាចទិញជាកម្មសិទ្ធិផ្ទាល់ខ្លួនបាន។
ចំណែកការសិក្សា និងការធ្វើការតាមការិយាល័យមួយចំនួនវិញ ទាមទារឲ្យមានកំព្យូទ័រប្រើប្រាស់ក្នុងការបំពេញការងារ។ ជាពិសេស វាជាតម្រូវការមួយដែលមិនអាចខ្វះបានរបស់និស្សិត ដោយសារតែពួកគាត់ត្រូវការចំណាយពេលជាច្រើនម៉ោងនៅក្នុងការប្រើប្រាស់កំព្យូទ័រទាំងក្នុងការសិក្សា ស្រាវជ្រាវ ក៏ដូចជាការធ្វើកិច្ចការសាលាផងដែរ។
ដោយសង្កេតឃើញតម្លៃកំព្យូទ័រដែលដាក់លក់នៅលើទីផ្សារកម្ពុជា នាពេលបច្ចុប្បន្នមានតម្លៃខ្ពស់ ក្រុមផលិតករខ្មែរមួយក្រុម បានរួមគំនិតនិងបានបង្កើតកំព្យូទ័រយួរដៃដោយលក់ក្នុងតម្លៃសមរម្យដើម្បីឲ្យប្រជាជនខ្មែរ ក៏ដូចជាសិស្សនិស្សិតមានលទ្ធភាពទិញសំរាប់ប្រើប្រាស់។
គម្ពីរ (Koompi) ជាឈ្មោះកំព្យូទ័រយួរដៃមួយដែលត្រូវបានបង្កើតដោយកូនខ្មែរ ដែលបានស្ថាបនាជាសមិទ្ធផលថ្មីដំបូងគេបង្អស់ នៅក្នុងឆ្នាំ២០១៨។ គម្ពីរ នេះសំដៅទៅលើ សៀវភៅសម្រាប់ចំណេះដឹង ដែលអាចផ្ដល់ភាពងាយស្រួលនៅក្នុងការសិក្សា។ ហើយឡូហ្គូ ដែលមានទិស៤នេះ មានន័យថាផ្លូវ៤ បើកទូលាយឲ្យរៀនតាមចិត្ត ដែលបើកជាទម្រង់សៀវភៅ ដែលវាតំណាងឲ្យធនធាន និងប្រភពនៃចំណេះដឹង។
ស្ថាបនិកគម្ពីរ លោក ធុល រិទ្ធី បានប្រាប់វី.អូ.ឌី ឲ្យដឹងថាគំនិតដែលបង្កើត កុំព្យូទ័រយួរដៃ ដែលមានឈ្មោះថាគម្ពីរ ឡើងដោយសារតែមើលឃើញពីជំនាន់មុនរៀនដោយសៀវភៅតគ្នាពីមួយជំនាន់ទៅមួយជំនាន់ ហើយបច្ចុប្បន្ននេះបច្ចេកវិទ្យាបានវិវត្តទៅមុខហើយកុំព្យូទ័រអាចផ្ទុកឯកសារបានរាប់សិបម៉ឺន ព្រមទាំងអាចផ្ទុកទិន្នន័យមេរៀននៅក្នុងនោះបានផងដែរ។ ដូច្នេះ លោកក៏ចង់បង្កើតនូវកំព្យូទ័រមួយធូរថ្លៃដែលអាចបំពេញតម្រូវការប្រជាជនបានគ្រប់គ្នា។
ស្ថាបនិកគម្ពីរ លោក ធុល រិទ្ធី
គំនិតនៃការបង្កើតគម្ពីរនេះត្រូវបានចាប់ផ្ដើមឡើងនៅឆ្នាំ២០១២ និងចាប់ផ្ដើមបង្កើត System នៅឆ្នាំ២០១៧ ដោយសារតែនៅក្នុងកំឡុងពេល២០១២ ដល់២០១៤ ជារយៈពេលនៃការស្រាវជ្រាវនិងជាការអភិវឌ្ឍន៍នៃគម្រោងមួយនេះ។
ជុំវិញការបង្កើតកំព្យូរទ័រនេះឡើងមានការជួបប្រទះនូវបញ្ហាជាច្រើន ដោយសារតែមានអ្នកយល់ច្បាស់ពីគម្រោងនេះមានតែ៣នាក់ប៉ុណ្ណោះ។ ក្រៅពីនោះ អ្នកផ្សេងៗទៀត គ្រាន់តែជួយទំនុកបំរុង និងផ្ដល់ជាគំនិតប៉ុណ្ណោះ។ ហើយនៅក្នុងគម្រោងនេះដែរ មិនមាន អ្នកវិនិយោគណាមកចូលរួមនោះឡើយ ដោយមានត្រឹមតែការចូលរួមពី Smallworld ប៉ុណ្ណោះ។
ស្ថាបនិកគម្ពីរ លោក ធុល រិទ្ធី
លោក ធុល រិទ្ធី បានបន្ថែមថា មូលហេតុចំបងដែលជម្រុញឲ្យស្ថាបនិកកំព្យូទ័របង្កើតស្នាដៃនេះឡើង ដោយសារតែលោកចង់ប្រើប្រាស់វាសម្រាប់ជាប្រយោជន៍ឲ្យវិស្វករបច្ចេកវិទ្យាជំនាន់ក្រោយ ដើម្បីជាអ្នកដោះស្រាយបញ្ហា អ្នកសិក្សាស្រាវជ្រាវ ដែលទស្សនៈវិស័យរបស់លោកចង់ឲ្យអ្នកប្រើប្រាស់សម្មិតផលនេះចេះផលិតនូវសមិទ្ធផលថ្មីដែលកាន់ប្រសើរឡើងជាងគាត់។
លោកបានបន្ថែមថា៖ “គោលដៅរបស់ពួកយើងគឺមនុស្សអាយុក្រោម២៥ឆ្នាំ អាចប្រើកុំព្យូទ័រនេះ ទៅហើយរៀនប្រើឲ្យចេះ ហើយជួយជំនាន់ក្រោយឲ្យមានគំនិតកាន់តែច្រើន ហើយអាចជម្រុញឲ្យមានការស្រាវជ្រាវឲ្យកាន់តែច្រើនទៀត វាគ្រាន់បើជាងប្រើរបស់គេ”។
គម្ពីរ កំព្យូទ័រ មានរូបរាងស្ដើងស្រាល ទម្ងន់ ១.៤គីឡូក្រាម អាចកាន់ថ្មបានរយៈពេលយូររហូតដល់៧ម៉ោង និងមានល្បឿនលឿន។ ចំពោះក្ដារឆ្នួន (keyboard) ក៏ជាស្នាដៃរបស់កូនខ្មែរជាអ្នកបង្កើតផងដែរ ដោយkoompi បានសហការណ៍គ្នាជាមួយក្រុមខ្មែររីស៊ិម “Khmerism”។ Koompi បានសហការ ជាមួយក្រុមហ៊ុនមួយនៅប្រទេសចិនដើម្បីតម្លើងកុំព្យូទ័រ។
បច្ចុប្បន្ននេះ Koompi បានដាក់ឲ្យបញ្ជាទិញនៅតាមវេបសាយរបស់ខ្លួនគឺ koompi.com ចាប់តាំងពីដើមខែកក្កដានេះ រហូតដល់ចុងខែវិច្ឆកានេះ។ មកទល់ពេលនេះKoompi ត្រូវបានទទួលបញ្ជាទិញជាង១០០គ្រឿងមកហើយ។ នៅចុងឆ្នាំ២០១៨នេះ Koompi នឹងយកមកប្រគល់ជូនដល់អ្នកបញ្ជាទិញទាំងអស់។
អតិថិជនគម្ពីរម្នាក់ លោក សុខ លីម បានបញ្ជាទិញកុំព្យូទ័រចំនួន១០គ្រឿង ព្រោះលោកចង់គាំទ្រស្នាដៃកូនខ្មែរ និងមានសេចក្ដីរីករាយចំពោះបច្ចេកវិទ្យាថ្មីនេះ។
លោកបានបញ្ជាទិញកុំព្យូទ័រ សំរាប់លើកទឹកចិត្តដល់សិស្សប្រលងជាប់មធ្យមសិក្សាទុតិយភូមិដោយទទួលបានពិន្ទុខ្ពស់ក្នុង និទ្ទេសA ចំនួន១០នាក់។
អតិថិជនគម្ពីរម្នាក់ លោក សុខ លីម
និស្សិតវិទ្យាស្ថានបច្ចេកវិទ្យាកម្ពុជា លោក លឹម ប្រសើរ បានសម្ដែងការពេញចិត្តចំពោះការផលិតកុំព្យូរទ័រថ្មីនេះ ប៉ុន្ដែទន្ទឹមនឹងការសាទរចំពោះស្នាដៃរបស់កូនខ្មែរនេះ លោក ក៏មានការព្រួយបារម្ភចំពោះគុណភាពរបស់កុំព្យូទ័រនេះផងដែរ ដោយសារតែវាជាការបង្កើតលើកដំបូងរបស់ខ្មែរ។
និស្សិតវិទ្យាស្ថានបច្ចេកវិទ្យាកម្ពុជា លោក លឹម ប្រសើរ
លោកបានបន្ថែមថា ប្រសិនបើគាត់មិនទាន់ទិញកុំព្យូទ័រ ដែលគាត់កំពុងប្រើរាល់ថ្ងៃ គាត់នឹងទិញគម្ពីរនេះមកប្រើប្រសិនបើវាមានគុណភាព និងតម្លៃប្រហាក់ប្រហែលគ្នាបើធៀបទៅនឹងកុំព្យូទ័របរទេស ពីព្រោះគាត់ចង់លើទឹកចិត្ត គំនិតជាតិនិយមខ្មែរត្រូវគាំទ្រខ្មែរ ដែលអាចជម្រុញឲ្យគាត់មានគំនិតច្នៃប្រឌិត ដើម្បីឲ្យមានភាពប្រសើរឡើង។
ក្រៅពីការបង្កើតកំព្យូទ័រ កូនខ្មែរ ក៏ធ្លាប់ផលិតបានរថយន្ដដែលជាសម្មិតផលស្នាដៃរបស់ខ្មែរផងដែរ។ លោក ញាន ផល្លិត ផលិតកររថយន្ដអង្គរ បានបង្កើតរថយន្ដដើរដោយពន្លឺព្រះអាទិត្យ ដែលបានផលិតជាច្រើនសេរីរួចមកហើយ។ ក្នុងឆ្នាំ២០១៧កន្លងមកនេះក៏បានបញ្ចេញសេរីថ្មីទៅកាន់ទីផ្សារផងដែរ ដែលមានតម្លៃក្រោម១ម៉ឺនដុល្លារ។