មន្ត្រីជាន់ខ្ពស់គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា ប្រជាពលរដ្ឋដែលរងផលប៉ះពាល់ដោយសារជំនន់ទឹកភ្លៀងមានចំនួនជាង ៨០០០ គ្រួសារ ក្នុងរយៈពេល ៥ ថ្ងៃដែលគិតចាប់ពីថ្ងៃទី១៧ដល់២១កក្កដា។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី ប្រាប់វីអូឌីនៅថ្ងៃនេះថា ខេត្តដែលរងផលប៉ះពាល់ដោយសារ ជំនន់ទឹកភ្លៀង មានចំនួន ៩ ខេត្ត មានដូចជា ខេត្តកោះកុង កំពត កែប ព្រះសីហនុ បាត់ដំបង កំពង់ស្ពឺ តាកែវ កណ្ដាល និងរាជធានីភ្នំពេញ ដោយប៉ះពាល់ដល់ប្រជាពលរដ្ឋចំនួន ៨៩៧០ គ្រួសារ ។ លោកបន្ថែមថាជំនន់នេះក៏បណ្ដាលឲ្យខូចខាតដំណាំស្រូវ ៩៥៨២ ម៉ឺនហិកតា ក្នុងនោះដំណាំស្រូវដែលខូចខាតទាំងស្រុងចំនួន ៥២ ហិកតា។
លោកបន្តថា ពលរដ្ឋ១៣២២ គ្រួសារ ក្នុងចំណោមខេត្តចំនួន ៩ មានដូចជា ខេត្តកោះកុង កំពត ព្រះសីហនុ បាត់ដំបង កំពង់ស្ពឺ ត្រូវបានអាជ្ញាធរជម្លៀសទៅទីទួលសុវត្តិភាព បន្ទាប់ពីទឹកជន់លិចផ្ទះ។
កាលថ្ងៃទី២៦ ខែមេសា ឆ្នាំ២០៨ ក្រសួងធនធានទឹកនិងឧតុនិយមបានចេញសេចក្ដីប្រកាសព័ត៌មានមួយថា កម្ពុជាអាចប្រឈមនឹងជំនន់ទឹកភ្លៀងខ្ពស់ជាង២០១៧ ជាពិសេស នៅខែសីហានិងខែកញ្ញា ដោយសារ នៅក្នុងខែទាំងពីរនេះ អាចមានបាតុភូតធម្មជាតិកើតឡើងបណ្ដាលឲ្យមានភ្លៀងធ្លាក់ច្រើន។