ស្ថានទូតចិនប្រចាំនៅកម្ពុជា បានស្នើទៅអាជ្ញាធរខេត្តព្រះសីហនុឲ្យជួយការពារសន្តិសុខសុវត្ថិភាពដល់អ្នកវិនិយោគចិន ខណៈខេត្តមួយនេះត្រូវបានគេមើលឃើញថា កើតឡើងបទល្មើសច្រើនដែលបង្កដោយជនជាតិចិនកំពុងរស់នៅទីនោះ។
សាលាខេត្តព្រះសីហនុបានផ្សាយលើទំព័រហ្វេសប៊ុករបស់ខ្លួនថា កាលពីថ្ងៃច័ន្ទ គណៈប្រតិភូនៃស្ថានទូតចិនប្រចាំកម្ពុជាដឹកនាំ ដោយលោក Li Jie បានជួបជាមួយអភិបាលខេត្តព្រះសីហនុ លោក យន្ត មីន ដើម្បីពិភាក្សាលើកិច្ចការពារចំពោះអ្នករកស៊ីនិងជនជាតិចិនកំពុងស្នាក់នៅក្នុងខេត្តនេះ។
សាលាខេត្តបានបញ្ជាក់ថា ក្នុងជំនួបនោះ លោក Li Jie បានស្នើទៅ លោកយន្ត មីន ជួយការពារសន្តិសុខសុវត្តិភាពដល់អ្នកវិនិយោគចិន និងត្រូវផ្តល់ដំណឹងដល់ស្ថានទូតផងដែរ ប្រសិនបើមានជនជាតិចិនណាបង្កបញ្ហាក្នុងខេត្តព្រះសីហនុ ដោយថា ដើម្បីដោះស្រាយធ្វើយ៉ាងណាឲ្យសាធារណៈជនទូទៅមានទំនុកចិត្ត។
អភិបាលខេត្តព្រះសីហនុ លោក យន្ត មីន មានប្រសាសន៍ថា ក្នុងនាមអាជ្ញាធរដែនដីលោកបានត្រៀមរួចជាស្រេចក្នុងការការពារសន្តិសុខសុវត្តិភាពជូនប្រជាពលរដ្ឋគ្រប់ជាតិសាសន៍ដែលមកលេងកំសាន្ត មករកស៊ី និងស្នាក់នៅជាដើម ដោយមិនប្រកាន់ពូជសាសន៍ឡើយ។
អភិបាលខេត្តព្រះសីហនុ លោក យន្ត មីន
បើតាមសាលាខេត្តព្រះសីហនុ ក្រៅពីប្រតិភូពីស្ថានទូតចិនក៏មានប្រតិភូចិនមកពីខេត្តណាននីង ដែលដឹកនាំដោយ លោក Liu Xoing អនុប្រធានគណៈកម្មាធិការអចិន្ត្រៃយ៏ នៃសភាប្រជាជនក្រុងណាននីង បានជួបពិភាក្សាជាមួយអាជ្ញាធរខេត្តព្រះសីហនុកាលពីថ្ងៃទី២៣ ខែកក្កដានោះដែរ។
សាលាខេត្តបញ្ជាក់ថា ក្នុងជំនួបរវាង លោក Liu Xoing និងលោក យន្ត មីន គឺមានគោលបំណងសំខាន់ជូនដំណឹងអំពី ដំណើរការសាងសង់សួនច្បារមិត្តភាពព្រះសីហនុ ណាននីង និងអញ្ជើញអភិបាលខេត្តព្រះសីហនុរូបនេះ ឲ្យចូលរួមក្នុងកម្មវិធីពិពរណ៏ចិន អាស៊ាន (China-AseanExpo) និងពិពរណ៏សួនច្បារអន្តរជាតិ (GardenExpo) នៅទីក្រុងណាននីងនៅខែកញ្ញាខាងមុខនេះដែរ។
លោក យន្ត មីន អះអាងថា ខេត្តព្រះសីហនុបច្ចុប្បន្នមានក្រុមហ៊ុនមកវិនិយោគច្រើន ក្នុងនោះក្រុមហ៊ុនមកប្រទេសចិនច្រើនជាងគេមានប្រមាណពី៦០%ទៅ៧០%។
ស្នងការខេត្តព្រះសីហនុ លោក ជួន ណារិន ប្រាប់ការសែតភ្នំពេញប៉ុសិ៍ថា បច្ចុប្បន្នជនជាតិចិនដែលមករស់នៅខេត្តព្រះសីហនុរយៈពេលវែង និងខ្លីមានប្រហែល៤ម៉ឺននាក់ ក្នុងនោះមានអ្នកវិនិយោគ២ម៉ឺននាក់។
កន្លងមកសារព័ត៌មានបានចុះផ្សាយជាច្រើន អំពីបទល្មើសកើតឡើងក្នុងខេត្តព្រះសីហនុ ដែលបង្កដោយជនជាតិចិនរស់នៅទីនោះ ហើយកាលពីចុងខែមករា អភិបាលខេត្តព្រះសីហនុលោក យន្ត មីន ក៏បានផ្ញើរបាយការណ៍មួយទៅក្រសួងមហាផ្ទៃដោយបារម្ភពីបញ្ហាសន្តិសុខដោយកំណើនជនបរទេសច្រើន៕