ពលរដ្ឋនៅស្រុកគីរីសាគរ ខេត្តកោះកុង ដែលថាមានជម្លោះដីធ្លីជាមួយក្រុមហ៊ុន លោក លី យ៉ុងផាត់ ជំរុញទៅអាជ្ញាធរនិងក្រុមហ៊ុនពន្លឿនដោះស្រាយបញ្ចប់វិវាទដីធ្លីរបស់គាត់ឲ្យបានមុនបោះឆ្នោត។
ពលរដ្ឋម្នាក់អ្នកស្រី ម៉ៃ ពៅ ប្រាប់វីអូឌីថា នៅថ្ងៃនេះអ្នកភូមិ២២គ្រួសារនៅឃុំព្រែកខ្សាច់ ស្រុកគីរីសាគរ ដែលមិនទាន់ទទួលបានដំណោះស្រាយរឿងវិវាទដីធ្លីបានប្រមូលផ្តុំគ្នាបោះទីតាំងខាងលើដែលមានជម្លោះ ខណៈអាជ្ញាធរខេត្ត និងភាគីក្រុមហ៊ុនពន្យារពេលដោះស្រាយបញ្ចប់វិវាទ។
អ្នកស្រីបន្តថា ក្រុមអ្នកភូមិទាមទារទៅភាគីពាក់ព័ន្ធដោះស្រាយសំណងជូនឲ្យបានមុនថ្ងៃបោះឆ្នោត ដោយបារម្ភខ្លាចពេលបោះឆ្នោតរួចអាជ្ញាធរមិនដោះស្រាយឲ្យពួកគាត់។
ពលរដ្ឋម្នាក់អ្នកស្រី ម៉ៃ ពៅ
ស្រ្តីរូបនេះបន្តថា ក្រោយតវ៉ាជាង១០ឆ្នាំមិនទទួលបានដំណោះស្រាយ ក្រុមអ្នកភូមិបានប្តូរជំហរទាមទារសំណង ដោយកាលពីពេលមុខ ពលរដ្ឋទាមទារសំណងជាដីធ្លីត្រឡប់មកវិញ ប៉ុន្តែពេលនេះពួកគាត់ទាមទារជាប្រាក់វិញ គឺក្នុងមួយគ្រួសារ ១២លានរៀល ខណៈក្រុមហ៊ុនបានបោះរបងហ៊ុមព័ទ្ធដីរបស់ពួកគាត់រួចអស់ហើយនោះ។
វីអូឌីមិនអាចសុំការឆ្លើយតបពីអភិបាលខេត្តកោះកុង លោកស្រី មិថុនា ភូថង បានជុំវិញបញ្ហានេះទេ។
តំណាងក្រុមហ៊ុនដែលប្រាប់ថា ឈ្មោះ ស៊ីថា អះអាងថា ក្រុមហ៊ុនមិនបានព្រងើយកន្តើយក្នុងការដោះស្រាយនោះទេ ប៉ុន្តែសុំឲ្យពលរដ្ឋបង្ហាញឯកសារ កាន់កាប់ឲ្យបានច្បាស់លាស់ជាមុនសិន និងត្រូវបង្ហាញចំនួនប្រជាពលរដ្ឋឲ្យបានច្បាស់លាស់។
លោកបន្តថា ករណីក្រុមពលរដ្ឋទាមទារដោះស្រាយឲ្យបានមុនថ្ងៃបោះឆ្នោតនោះគឺមិនអាចធ្វើបាននោះទេ ព្រោះក្រុមហ៊ុនត្រូវស្រាវ ជ្រាវរកភាពច្បាស់លាស់នៃការកាន់កាប់ដីធ្លីរបស់ពលរដ្ឋទាំងនោះសិន។
តំណាងក្រុមហ៊ុនដែលប្រាប់ថា ឈ្មោះ ស៊ីថា
ប្រធានផ្នែកស៊ើបអង្កេតនៃអង្គការលីកាដូ លោក អំ សំអាត មានប្រសាសន៍ថា មួយរយៈចុងក្រោយនេះលោកសង្កេតឃើញរដ្ឋាភិបាលដោះស្រាយបញ្ចប់វិវាទដីធ្លីបានច្រើន ។
ប្រធានផ្នែកស៊ើបអង្កេតនៃអង្គការលីកាដូ លោក អំ សំអាត
កាលពីខែមុខ ពលរដ្ឋជាង៥០នាក់តំណាងឲ្យពលរដ្ឋ២១០គ្រួសារមកពីស្រុកគីរីសាគរ ខេត្តកោះកុង មានបញ្ហាជម្លោះដីជាមួយក្រុមហ៊ុនញ៉ូញៀន របស់ចិន និងក្រុមហ៊ុន SEZ របស់លោក លីយ៉ុងផាត់ តាំងពីឆ្នាំ ២០០៨ បានប្រមូលផ្តុំគ្នាតវ៉ាមុខ ក្រសួងបរិស្ថានខណៈវិវាទនោះអូសបន្លាយ១០ឆ្នាំពុំមានដំណោះស្រាយពីអាជ្ញាធរថ្នាក់ក្រោម។ ក្រោយការតវ៉ានេះ អាជ្ញាធរបានសម្របសម្រួសជាមួយភាគីក្រុមហ៊ុនដោះស្រាយសំណងជូនពលរដ្ឋបានមួយភាគធំ ដោយសល់ពលរដ្ឋតិចតួចប៉ុណ្ណោះមិនទាន់ដោះស្រាយចប់៕