ប្រធានគណបក្សសំបុកឃ្មុំសង្គមប្រជាធិបតេយ្យថា លោកនឹងពិចារណាដកឃ្លាពីឆាកនយោបាយកម្ពុជាបន្ទាប់ពីលោកខកចិត្តនឹងលទ្ធផលបោះឆ្នោតជ្រើសតាំងតំណាងរាស្ត្រអាណត្តិទី៦ឆ្នាំ២០១៨នេះ។
លទ្ធផលបឋមនៃការបោះឆ្នោតជ្រើសតាំងតំណាងរាស្ត្រអាណត្តិទី៦ ចេញផ្សាយដោយគ.ជ.ប កាលពីម្សិលមិញបង្ហាញថាគណបក្សសំបុកឃ្មុំដែលដឹកនាំដោយអ្នកនយោបាយចាស់វស្សាម្នាក់គឺលោកម៉ម សូណង់ដូ បានទទួលការគាំទ្រពីពលរដ្ឋទូទាំងប្រទេសតែជាង៥ម៉ឺនសំឡេងប៉ុណ្ណោះ។
ថ្លែងប្រាប់ VOD នៅថ្ងៃនេះប្រធានបក្សសំបុកឃ្មុំសង្គមប្រជាធិបតេយ្យលោក ម៉ម សូណង់ដូ ថាលទ្ធផលនៃការបោះឆ្នោតឆ្នាំ២០១៨នេះធ្វើឲ្យលោកខកចិត្តជាខ្លាំង នឹងមានអារម្មណ៍ថាខ្មាសខ្លួនឯង ខណៈដែលលោកខំប្រឹងពន្យល់ពលរដ្ឋពីបញ្ហានឹងដំណោះស្រាយសំរាប់ពួកគេបែរជាមិនត្រូវបានពលរដ្ឋពិចារណា ដែលធ្វើឲ្យលោកចង់ដកឃ្លាពីឆាកនយោបាយកម្ពុជា។
ប្រធានបក្សសំបុកឃ្មុំសង្គមប្រជាធិបតេយ្យលោក ម៉ម សូណង់ដូ
ស្របពេលដែលលោកខកចិត្តនឹងលទ្ធផលឆ្នោតអាណត្តិនេះលោកម៉ម សូណង់ដូ ក៏បានឲ្យដឹងដែរថាគណបក្សលោកនឹងពិចារណាពីការមិនរួមការបោះឆ្នោតអាណត្តិខាងមុខផងដែរ ខណៈនៅពេលនេះការចុះមូលដ្ឋានជួបពលរដ្ឋត្រូវបានផ្អាកនោះ។
លោកម៉ម សូណង់ដូ មានអាយុ៧៨ឆ្នាំ បានប្រលូកចូលឆាកនយោបាយកម្ពុជាដោយបានបង្កើតគណបក្សសំបុកឃ្មុំសង្គមប្រជាធិបតេយ្យចូលរួមការបោះឆ្នោតនៅឆ្នាំ១៩៩៨ និងបានរំលាយបក្សនេះវិញបន្ទាប់ពីបរាជ័យក្នុងការបោះឆ្នោត ក្នុងឆ្នាំ២០១៤លោកបានបង្កើតបក្សនេះឡើងវិញ នៅឆ្នាំ២០១៧លោកធ្លាប់ប្រកាសឈប់ធ្វើនយោបាយម្តងទៀតបន្ទាប់ពីបក្សលោកទទួលបរាជ័យក្នុងការបោះឆ្នោតឃុំសង្កាត់។
ប្រធានក្រុមអ្នកវិភាគវ័យក្មេងលោក ហង្ស វិទូ មានប្រសាសន៍ថាការសម្រេចចិត្តបន្ត ឬឈប់គឺជាសិទ្ធិរបស់អ្នកនយោបាយផ្ទាល់ខ្លួន តែលោកឲ្យជាយោបល់ថាចៀសវាងការបះបង់ចោល អ្នកនយោបាយគួរតែចងសម្ព័ន្ធជាមួយបក្សផ្សេងៗដើម្បីឲ្យមានសំឡេងធំដើម្បីប្រកួតប្រជែងការបោះឆ្នោតនោះជាការល្អ។
ប្រធានក្រុមអ្នកវិភាគវ័យក្មេងលោក ហង្ស វិទូ
លោក ម៉ម សូណង់ដូ ត្រូវបានគេស្គាល់លោកតាមរយៈការផ្សាយសំឡេងរបស់វិទ្យុសំបុកឃ្មុំ ការធ្វើបទសម្ភាសន៍ទាក់ទិននឹងព្រឹត្តិការណ៍នយោបាយ បញ្ហាទំនាស់ដីធ្លី និងបញ្ហាព្រំដែនជាដើម ជាពិសេស តាមរយៈកំណាព្យរបស់លោកដែលមានចំណងជើងថា “តើខ្ញុំអាចរស់បានដល់ពេលណា?“។ លោកត្រូវបានតុលាការចាប់ដាក់ពន្ធនាគារចំនួន ៣ដងរួចមកហើយ ក្នុងសំណុំរឿងកុប្បកម្មប្រឆាំងថៃនៅកម្ពុជាអំឡុងឆ្នាំ២០០៣ សំណុំរឿងសន្ធិសញ្ញាព្រំដែនបំពេញបន្ថែមឆ្នាំ២០០៥ និងចុងក្រោយ គឺសំណុំរឿងតំបន់អប្បគមន៍នៅឃុំប្រម៉ាក្នុងខេត្តក្រចេះ៕
