សហភាពសហព័ន្ធអ្នកសារព័ត៌មានកម្ពុជា ហៅកាត់ ស.ស.ស.ក វាយតម្លៃថា អ្នកសារព័ត៌មានជាតិនិងអន្ដរជាតិ បានបំពេញតួនាទីត្រឹមត្រូវ និងទទួលបានសេរីភាពពេញលេញក្នុងកំឡុងពេលការបោះឆ្នោតជ្រើសរើសតំណាងរាស្រ្ដនីតិកាលទី៦។
យោងតាមសេចក្ដីថ្លែងការណ៍របស់សហភាពសហព័ន្ធអ្នកសារព័ត៌មានកម្ពុជា ចុះផ្សាយនៅថ្ងៃនេះបានឲ្យដឹងថា អ្នកសារព័ត៌មានជាតិនិងអន្ដរជាតិដែលមានវត្តមាននៅក្នុងប្រទេសកម្ពុជាកាលពីថ្ងៃបោះឆ្នោតទទួលបានសេរីភាពពេញលេញ ហើយគ្មានអ្នកសារព័ត៌មានណាម្នាក់ត្រូវបានរារាំងសិទ្ធិមិនឲ្យចូលយកព័ត៌មាននៅក្នុងពេលឃោសនារបស់គណបក្សនយោបាយឡើយ។
សេចក្ដីថ្លែងការណ៍ដដែលបានលើកឡើងថា ប្រជាធិបតេយ្យនៅកម្ពុជាកាន់តែមានភាពចាស់ទុំ ដែលឆ្លុះបញ្ចាំងនៃការបោះឆ្នោតប្រព្រឹត្តទៅដោយ គ្មានអំពើហិង្សា គ្មានការបំភិតបំភ័យ និងគ្មានប្រជាជនសូម្បីតែម្នាក់ទទួលរងរបួសនោះឡើយ។
ប៉ុន្តែជាក់ស្ដែងគេហទំព័រប្រព័ន្ធផ្សព្វផ្សាយជាងដប់ ត្រូវបានរដ្ឋាភិបាលបិទរយៈពេល៤៨ម៉ោងក្នុងថ្ងៃស និងថ្ងៃបោះឆ្នោត ។ គេហទំព័ររបស់ស្ថាប័នទាំងនោះ បានបើកឲ្យដំណើរការវិញធម្មតាវិញ ក្រោយការបោះឆ្នោតបានចប់សព្វគ្រប់៕
