មេដឹកនាំបក្សកាន់អំណាចនិងជាបេក្ខភាពនាយករដ្ឋមន្ត្រី លោក ហ៊ុន សែន ប្រកាសការពារលទ្ធផលឆ្នោត ខណៈក្រុមប្រទេសលោកសេរីបង្ហាញជំហរមិនគាំទ្រការបោះឆ្នោតដ៏ចម្រូងចម្រាសនៅអាណត្តិថ្មីនេះ។
ក្រោយការបោះឆ្នោតមួយថ្ងៃ គ.ជ.ប បានបង្ហាញរបាយការណ៍បឋមថា គណបក្សប្រជាជនកម្ពុជា បាននាំមុខគេក្នុងចំណោមគណបក្ស១៩ទៀត ដែលបានចូលរួមប្រកួត ខណៈអតីតគណបក្សសង្គ្រោះជាតិត្រូវបានតុលាការកំពូលររំលាយមុនការបោះឆ្នោតមកដល់ ។
ប៉ុន្តែ សហរដ្ឋអាមេរិក បារាំង អង់គ្លេស អាលឺម៉ង់ សហភាពអឺរ៉ុប និងជប៉ុនជាដើម បានបង្ហាញជំហរមិនទទួលស្គាល់លទ្ធផលបោះឆ្នោតនេះ និងបានជំរុញឲ្យបក្សកាន់អំណាច ជួបចរចាជាមួយអតីតបក្សប្រឆាំង ស្វែងរកដំណោះស្រាយនយោបាយ ឈានទៅស្តារប្រជាធិបតេយ្យឡើងវិញ។
លោក ហ៊ុន សែន ក្នុងពិធីជួបកម្មករនៅខេត្តកំពង់ស្ពឺ ថ្ងៃពុធនេះ ថ្លែងរំឭកពីវីរភាពរបស់លោក ដែលថាបានចូលបម្រើកងទ័ព រហូតផ្តួលរំលំរបប ប៉ុល ពត រំដោះប្រទេសចេញពីវាលពិឃាត វិលមករកការអភិវឌ្ឍ ។
មេដឹកនាំរូបនេះ ថ្លែងទៀតថា ការខំប្រឹងប្រែងនេះបង្ហាញថា សន្តិភាពរបស់កម្ពុជា បានមកដោយកម្រ។ លោកថា សំឡេងឆ្នោតគាំទ្រគណបក្សប្រជាជនកម្ពុជា ជាមោទនភាពមួយទៀត ជំរុញទ្វេដងដល់វិធានការការពារសន្តិភាពបន្តទៀត។
លោកនាយករដ្ឋមន្ត្រី ហ៊ុន សែន
អ្នកវិភាគនយោបាយ លោក ឯម សុវណ្ណារ៉ា យល់ថា បើស្ថានការណ៍នយោបាយ មិនវិលទៅស្តារប្រជាធិបតេយ្យឡើងវិញ ដូចដែលប្រទេសលោកសេរីចង់បាននោះ លោកវិភាគថា រដ្ឋាភិបាលថ្មី អាចប្រឈមទៅនឹងវិបត្តិសេដ្ឋកិច្ចធ្ងន់ធរ ដោយសារតែប្រទេសលោកសេរីមិនទទួលស្គាល់រដ្ឋាភិបាលថ្មីកើតក្រោយបោះឆ្នោត។
អ្នកវិភាគនយោបាយ លោក ឯម សុវណ្ណារ៉ា
ការបោះឆ្នោតអាណត្តិទី៥ ឆ្នាំ២០១៣ គណបក្សប្រជាជនកម្ពុជា ទទួលបាន៦៨អាសនៈ អតីតគណបក្សសង្គ្រោះជាតិទទួលបាន៥៥អាសនៈ ក្នុងចំណោមអាសនៈសរុប១២៣ក្នុងសភា។
ប៉ុន្តែក្រោយពីគណបក្សប្រឆាំងត្រូវបានគេផាត់ចេញពីឆាកនយោបាយ លទ្ធផលបឋមនៃការបោះឆ្នោតនៅអាណត្តិទី៦នេះ អ្នកនាំពាក្យគណបក្សកាន់អំណាចបង្ហើបថា គណបក្សប្រជាជនកម្ពុជារបស់លោក ហ៊ុន សែន អាចនឹង គ្រប់គ្រងអាសនៈទាំងអស់ក្នុងសភាចំនួន១២៥។
ទោះជាយ៉ាងណា អ្នកសិក្សាពីការអភិវឌ្ឍសង្គម លោក បណ្ឌិត មាស នី យល់ថា បើអ្នកនយោបាយខ្មែរ នៅតែចាត់ទុកគ្នាជាសត្រូវ សង្គមជាតិមួយនេះនឹងឈានទៅរកការហែកហួរគ្នាគ្មានទីបញ្ចប់ និងទីបំផុតកូនខ្មែរជំនាន់ក្រោយអាចនឹងរកដីនៅគ្មាន។