ក្រុមព្រះសង្ឃនៅក្រៅប្រទេសរួមមានបារាំង អូស្ត្រាលី និងអាមេរិក បដិសេធមិនទទួលស្គាល់ការបោះឆ្នោត ការប្រកាសលទ្ធផល និងរដ្ឋាភិបាលអាណត្តិទី៦។ នេះបើតាមសេចក្តីថ្លែងការណ៍រួមមួយរបស់ក្រុមព្រះសង្ឃខ្មែរដែលបានធ្វើឡើងនៅវត្តធម្មរង្សី ទីក្រុងបារីស ប្រទេសបារាំងនៅថ្ងៃនេះ។
សេចក្តីថ្លែងការដដែលឲ្យដឹងថា ក្រុមព្រះសង្ឃខ្មែរនៅបរទេសដែលតំណាងឲ្យ១៧វត្ត សមាគម និងអង្គការក្រៅ រដ្ឋាភិបាល បានសម្តែងការមិនទទួលស្គាល់លទ្ធផលបោះឆ្នោតដែលកើតក្រោយថ្ងៃទី២៩ ខែកក្កដា ឆ្នាំ២០១៨ ដោយថាជាការបោះឆ្នោតមិនស្របតាមលទ្ធិប្រជាធិបតេយ្យ។ សេចក្តីថ្លែងការណ៍បន្តថា ព្រះសង្ឃនិងពុទ្ធបរិស័ទសូមធ្វើមោឃភាពទាំងការបោះឆ្នោត លទ្ធផលបោះឆ្នោត និងរដ្ឋាភិបាលថ្មីដែលបង្កើតឡើងដោយឯកបក្ស។
សេចក្តីថ្លែងការណ៍ក៏បានស្នើទៅសហគមន៍អឺរ៉ុប អង្គការសហប្រជាជាតិ និងសហរដ្ឋអាមេរិកជាដើម ជួយធ្វើអន្តគមន៍សម្រួបសម្រួលបញ្ហានយោបាយនៅកម្ពុជា និងរៀបចំការបោះឆ្នោតជាថ្មីដោយមានវត្តមានអតីតគណបក្ស សង្គ្រោះជាតិ៕