គណបក្សហ៊្វុនស៊ិនប៉ិចតែងតាំងបុត្រាច្បងសម្តេចក្រុមព្រះនរោត្តម រណឫទ្ធិ ជាប្រធានបក្សស្តីទីគណបក្សនេះដោយសារតែសម្ដេចក្រុមព្រះកំពុងសម្រាកព្យាបាលជំងឺ។
សេចក្តីសម្រេចកាលពីថ្ងៃទី៨ សីហា ២០១៨ ប្រធានគណបក្សហ៊្វុនស៊ិនប៉ិច សម្តេចក្រុមព្រះ នរោត្តម រណឫទ្ធិ បានតែតាំង ព្រះអង្គម្ចាស់ នរោត្តម ចក្រាវុឌ្ឍ ជាព្រះប្រធានស្ដីទីគណបក្សហ៊្វុនស៊ិនប៉ិច។
សេចក្តីសម្រេចដដែលផ្តល់សិទ្ធិឲ្យព្រះអង្គម្ចាស់ នរោត្តម ចក្រាវុឌ្ឍ ដឹកនាំ ចាត់ចែងរាល់ការងាររបស់គណបក្សហ៊្វុនស៊ិនប៉ិចទាំងអស់។
អ្នកនាំពាក្យគណបក្សហ៊្វុនស៊ីនប៉ិច លោក ញ៉េប ប៊ុនជិន ប្រាប់ VOD បន្ថែមថា ព្រះអង្គម្ចាស់ នរោត្តម ចក្រាវុឌ្ឍ គឺជាបុត្រាច្បងរបស់សម្តេចក្រុមព្រះជាមួយនឹងអ្នកម្នាង មារី។ លោកឲ្យដឹងទៀតថា ព្រះអង្គម្ចាស់ នរោត្តម ចក្រាវុឌ្ឍ មានព្រះជន្មជាង៤០វស្សា ធ្លាប់ដង្ហែតាមអតីតព្រះមហាក្សត្រនិងសម្តេចក្រុមព្រះកាលតស៊ូនៅតាមព្រំដែនកម្ពុជាថៃកន្លងមក។
សូមរម្លឹកដែរថា សម្តេចក្រុមព្រះ នរោត្តម រណឫទ្ធិ បានជួបគ្រោះថ្នាក់ចរាចរណ៍កាលពីថ្ងៃទី១៧ខែមិថុនាកន្លងទៅ ខណៈដែលទ្រង់យាងទៅជួបសំណេះសំណាលជាមួយប្រជាពលរដ្ឋនៅខេត្តព្រះសីហនុ៕
