រដ្ឋបាលប្រធានាធិបតីអាមេរិក លោក ដូណាល់ ត្រាំ បានសម្រេចតែងតាំងឯកអគ្គរដ្ឋទូតថ្មីប្រចាំកម្ពុជា ដើម្បីជំនួសឯកអគ្គរដ្ឋទូតបច្ចុប្បន្ន ដែលនឹងផុតអាណត្តិនាពេលខាងមុខនេះ។
យោងតាមសេចក្ដីប្រកាសព័ត៌មានរបស់សេតវិមានអាមេរិក ដែលចេញផ្សាយកាលពីថ្ងៃទី១០ សីហា (ត្រូវនឹងល្ងាចថ្ងៃទី១១ ខែសីហា ម៉ោងនៅកម្ពុជា) បានឲ្យដឹងថា រដ្ឋបាលលោក ដូណាល់ ត្រាំ បានស្នើតែងតាំងឧបការីរងនៃក្រសួងការបរទេស លោក Patrick Murphy ជាឯកអគ្គរដ្ឋទូតថ្មីប្រចាំនៅកម្ពុជា ខណៈសព្វថ្ងៃ តំណែងនេះកំពុងកាន់ដោយលោក William Heidt ដែលនឹងត្រូវផុតអាណត្តិក្នុងពេលឆាប់ៗខាងមុខ។
យ៉ាងណាក៏ដោយ សេចក្ដីប្រកាសព័ត៌មានរបស់សេតវិមាន បានឲ្យដឹងថា ប្រសិនបើសំណើនេះ ត្រូវបានយល់ព្រមដោយព្រឹទ្ធសភាសហរដ្ឋអាមេរិក លោក Patrick Murphy នឹងចូលមកជំនួសតំណែងឯកអគ្គរដ្ឋទូតបច្ចុប្បន្នរបស់លោក William Heidt។
បើតាមសេចក្ដីប្រកាសព័ត៌មានដដែល លោក Murphy មានដើមកំណើតនៅរដ្ឋ Vermont សហរដ្ឋអាមេរិក ហើយលោកបានបម្រើការងារក្នុងវិស័យការទូតអស់រយៈពេលជាង ២៥ឆ្នាំមកហើយ។ ក្នុងអំឡុងពេលបម្រើការងារ លោកមានតួនាទីសំខាន់ៗមួយចំនួន ដូចជា ធ្វើជាឧបការីរងរដ្ឋមន្ត្រីការបរទេសទទួលបន្ទុកកិច្ចការអាស៊ីអាគ្នេយ៍ និងប៉ាស៊ីហ្វិក ចាប់ពីឆ្នាំ២០១៦ ដល់ឆ្នាំ២០១៨ ជាអនុប្រធានបេសកកម្ម និងភារធារីនៅស្ថានទូតនៅទីក្រុងបាងកក ប្រទេសថៃ ចាប់ពីឆ្នាំ២០១៣ ដល់២០១៦ និងធ្វើជាអ្នកតំណាងស្ដីទីពិសេស និងជាអ្នកសម្របសម្រួលផ្នែកគោលនយោបាយនៅស្ថានទូតនៅប្រទេសភូមា ពីឆ្នាំ២០១២ដល់ឆ្នាំ២០១៣ ជាដើម៕
