សមត្ថកិច្ចបញ្ជាឲ្យបិទទីតាំងហាងម៉ាស្សាចិនដែលចែកខិតប័ណ្ណមានរូបអាសអាភាស

អាជ្ញាធររាជធានីភ្នំពេញ បានបញ្ជាមន្រ្តីរបស់ខ្លួនឲ្យបិទទីតាំងហាងម៉ាស្សារបស់ជនជាតិចិនមួយកន្លែង បន្ទាប់ពីមានការរិះគន់ពីការចែកចាយខិតប័ណ្ណរបស់ហាងម៉ាស្សានោះ។

អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានប្រាប់ VOD នៅសៀលនេះថា អភិបាលរាជធានីភ្នំពេញ បានបញ្ជាឲ្យបិទទីតាំងម៉ាស្សានេះនិងស្វែងរកចាប់ខ្លួនអ្នកចែកខិត្តប័ណ្ណ ដោយថាជាការផ្សព្វផ្សាយមិនប្រក្រតី។

នាយិកាអង្គសីលការ អ្នកស្រី ធីតា ឃិះ មានយោបល់ចំពោះករណីនេះថា ជារឿងខុសច្បាប់ និងសូមឲ្យអាជ្ញាធរអនុវត្តន៍ច្បាប់ ដោយបិទសេវានេះមិនឲ្យបើកតែម្តង។

សម្រាប់អ្នកស្រាវជ្រាវផ្នែកទស្សនវិជ្ជានិងការអភិវឌ្ឍ លោក ប៉ា ច័ន្ទរឿន គាំទ្រចំពោះចំណាត់ការរបស់សមត្ថកិច្ច និងថាលោកមិនពេញចិត្តចំពោះសកម្មភាពប្រកបអាជីវកម្មរបស់ក្រុមហ៊ុនចិននេះទេ។

កាលពីសប្តាហ៍មុន បុរសជនជាតិចិន ៦នាក់ ត្រូវបានអាជ្ញាធរខេត្តព្រះសីហនុ ចាប់ខ្លួនរួមជាមួយខិតប័ណ្ណជាច្រើនសន្លឹក ដោយសមត្ថកិច្ចសង្ស័យថា ក្រុមជនជាតិចិនទាំងនោះ បង្កប់សេវាកម្មជួញដូរផ្លូវភេទនៅក្នុងសេវាម៉ាស្សា។ សមត្ថកិច្ចបានធ្វើការអប់រំ និងបានឲ្យបុរសជនជាតិចិនទាំង ៦នាក់ ធ្វើកិច្ចសន្យាបញ្ឈប់សកម្មភាពផ្សព្វផ្សាយនេះតទៅទៀត៕