អតីតគណបក្សប្រឆាំងបានថ្កោលទោសគណបក្សកាន់អំណាច ដោយថា បានប្រើប្រាស់ស្ថាប័នព្រះមហាក្សត្រតែងតាំងនាយករដ្ឋមន្ត្រី រំលោភបំពានលើច្បាប់រដ្ឋធម្មនុញ្ញ។
ក្នុងសេចក្តីថ្លែងការណ៍របស់ខ្លួននៅថ្ងៃនេះ អតីតគណបក្សសង្គ្រោះជាតិ បានលើកឡើងថា លោក ហ៊ុន សែន បានប្រើប្រាស់ស្ថាប័នព្រះមហាក្សត្រចាត់តាំងរូបលោកធ្វើជានាយករដ្ឋមន្ត្រី ក្នុងខណៈដែលលោក ហ៊ុន សែន មិនទាន់ទទួលបានសុពលភាពជាតំណាងរាស្ត្រស្របច្បាប់នៅឡើយ។
អតីតបក្សប្រឆាំង បានចាត់ទុកករណីនេះថា ត្រូវបានធ្វើឡើងផ្ទុយនឹងមាត្រា ១១៨ថ្មី នៃរដ្ឋធម្មនុញ្ញ ដែលតម្រូវឲ្យព្រះមហាក្សត្រចាត់តាំងវរជនមួយរូបជា «តំណាងរាស្ត្រ»មកពីគណបក្សឈ្នះឆ្នោត ជានាយករដ្ឋមន្ត្រី។
សេចក្តីថ្លែងការណ៍បញ្ជាក់ថា លោក ហ៊ុន សែន កំពុងអនុវត្តច្បាប់ព្រៃ ដោយប្រើអំណាចបុគ្គលរំលាយប្រជាធិបតេយ្យនៅកម្ពុជា ឈានទៅរករបបផ្តាច់ការ ផ្ទុយនឹងកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣តុលា ឆ្នាំ១៩៩១ជាដើម។
អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា គណបក្សកាន់អំណាចស្នើទៅព្រះមហាក្សត្រចាត់តាំងលោក ហ៊ុន សែន ឲ្យធ្វើជានាយករដ្ឋមន្ត្រីមុនបង្កើតក្បាលម៉ាស៊ីនសភា និងរដ្ឋាភិបាលមិនរំលោភមាត្រា ១១៨ថ្មី នៃរដ្ឋធម្មនុញ្ញនោះទេ ដោយថា បើយោងតាមមាត្រា ៤នៃរដ្ឋធម្មនុញ្ញបន្ថែម។
អ្នកនាំពាក្យគណបក្សប្រជាជនកម្ពុជាលោក សុខ ឥសាន
មាត្រា ៤នៃរដ្ឋធម្មនុញ្ញបន្ថែម ក្នុងវាក្យខ័ណ្ឌ ២ បានចែងថា ព្រះមហាក្សត្រនឹងចាត់តាំងវរជនមួយរូបនៅក្នុងចំណោមតំណាងរាស្ត្រនៃគណបក្សនយោបាយដែលឈ្នះឆ្នោត ឲ្យបង្កើតរដ្ឋាភិបាល តាមរយៈការស្នើសុំពីព្រឹទ្ធសមាជិកសភា។
ប៉ុន្តែ លោកមេធាវី សុក សំអឿន ពន្យល់ថា ការស្នើសុំចាត់តាំងនាយករដ្ឋមន្ត្រីថ្មីមុនបង្កើតក្បាលម៉ាស៊ីនរដ្ឋសភា និងរដ្ឋាភិបាលឲ្យស្របតាមច្បាប់រដ្ឋធម្មនុញ្ញបន្ថែមបាន លុះត្រាតែមានភាពចម្រូងចម្រាស់ក្នុងការបង្កើតរដ្ឋាភិបាលថ្មី។
លោក ឯម សុវណ្ណារ៉ា វិភាគថា តាមរដ្ឋធម្មនុញ្ញបច្ចុប្បន្ន រដ្ឋាភិបាលថ្មីត្រូវកើតក្រោយក្បាលមាស៊ីនដឹកនាំសភា ប៉ុន្តែ លោកថា ការចុះហត្ថលេខាតែងតាំងរដ្ឋាភិបាលមុនបង្កើតក្បាលមាស៊ីនរដ្ឋសភា ជាគន្លឹះមួយទប់ស្កាត់មិនឲ្យមានអ្នកនយោបាយណាមួយប្រកែកបានទេ។
លោក ឯម សុវណ្ណរា ជាសាស្ត្រាចារ្យផ្នែកវិទ្យាសាស្ត្រនយោបាយ
មាត្រាចំនួន ៧ នៃរដ្ឋធម្មនុញ្ញបន្ថែមនេះ ត្រូវបានបង្កើតឡើងកាលពីខែកក្កដាឆ្នាំ២០០៤ បន្ទាប់ពីការជាប់គាំងនយោបាយកាលពីឆ្នាំ២០០៣ រវាងបក្សចំនួនបី រួមមាន បក្សប្រជាជនកម្ពុជា បក្សសម រង្ស៊ី និងបក្សហ៊្វុនស៊ិនប៉ិច។
រដ្ឋាភិបាលចាំផ្ទះជាងមួយឆ្នាំ ដែលដឹកនាំដោយបក្សកាន់អំណាចបច្ចុប្បន្ន បានបង្កើតច្បាប់ដ៏ចម្រូងចម្រាសនេះឡើង ដើម្បីដោះស្រាយវិបត្តនយោបាយនៅពេលនោះ បន្ទាប់មកទៀតក៏បង្កើតបានជារដ្ឋាភិបាលចម្រុះរវាងបក្សប្រជាជនកម្ពុជា និងគណបក្សហ៊្វុនស៊ិនប៉ិច៕