ព្រះមហាក្សត្រ សម្តេចនរោត្តម សីហមុនី បានត្រាស់បង្គាប់ឲ្យតុលាការលើកលែងទោសដល់សកម្មជនដីធ្លីតំបន់បឹងកក់ អ្នកស្រី ទេព វន្នី និងសកម្មជនដីធ្លី៣នាក់ផ្សេងទៀត តាមសំណើរបស់លោកនាយករដ្ឋមន្ដ្រី ហ៊ុន សែន។
បើតាមព្រះរាជក្រឹត្យរបស់ព្រះមហាក្សត្រ ដែលចេញផ្សាយនៅថ្ងៃនេះ បានលើកលែងទោសដល់ អ្នកស្រីទេព វន្នី និង សកម្មជនដីធ្លី ៣នាក់ផ្សេងទៀតនោះ រួមមាន អ្នកស្រី ហេង មុំ អ្នកស្រី បូ ឆវី និងអ្នកស្រី គង់ ចន្ថា។
សកម្មជនដីធ្លីតំបន់បឹងកក់ម្នាក់ គឺកញ្ញា សុង ស្រីលាភ ឲ្យដឹងថា អ្នកស្រី ទេព វន្នី បានចាកចេញពីពន្ធនាគារ ហើយត្រឡប់ដល់ផ្ទះហើយនៅយប់ថ្ងៃចន្ទនេះ។