រដ្ឋាភិបាលវៀតណាម បានប្រកាសសាទរលោក ហ៊ុន សែន បន្ទាប់ពីប្រធានគណបក្សកាន់អំណាចរូបនេះ ត្រូវបានព្រះមហាក្សត្រត្រាស់បង្គាប់ចាត់តាំងជានាយករដ្ឋមន្ដ្រីកម្ពុជាម្ដងទៀតកាលពី ៣ថ្ងៃមុន។
សារព័ត៌មាន Viet Nam News បានដកស្រង់សម្ដីអ្នកនាំពាក្យក្រសួងការបរទេសវៀតណាម លោកស្រី Lê Thị Thu Hằng មកចុះផ្សាយថា រដ្ឋាភិបាលវៀតណាមចូលរួមអបអរសាទរប្រធានគណបក្សប្រជាជនកម្ពុជា លោក ហ៊ុន សែន ដែលត្រូវបានតែងតាំងឲ្យធ្វើជានាយករដ្ឋមន្ដ្រីកម្ពុជា សម្រាប់រដ្ឋសភានីតិកាលទី៦នេះ។
បើតាមសារព័ត៌មានដដែល លោកស្រី Lê Thị Thu Hằng មានប្រសាសន៍ថា រដ្ឋាភិបាលថ្មីរបស់កម្ពុជា នឹងបន្ដដឹកនាំប្រទេសនេះឆ្ពោះទៅរកសន្ដិភាព និងស្ថិរភាព កិច្ចសហប្រតិបត្តិការ និងការអភិវឌ្ឍក្នុងតំបន់ និងពិភពលោកទាំងមូល។
យោងតាមព្រះរាជ្យក្រឹត្យចុះថ្ងៃទី១៧ខែសីហាឆ្នាំ២០១៨ ព្រះបាទព្រះបរមនាថ នរោត្តម សីហមុនី បានត្រាស់បង្គាប់ចាត់តាំងលោក ហ៊ុន សែន ជានាយករដ្ឋមន្រ្តីជាថ្មីម្ដងទៀត ហើយលោកហ៊ុន សែន មានភារកិច្ចរៀបចំសមាសភាពរាជរដ្ឋាភិបាលកម្ពុជា ដើម្បីសុំសេចក្តីអនុម័តទុកចិត្តពីរដ្ឋសភា។
គណបក្សកាន់អំណាច បានត្រូវបានគណៈកម្មាធិការជាតិរៀបចំការបោះឆ្នោតប្រកាសថា បានឈ្នះអាសនៈទាំង ១២៥ នៅក្នុងការបោះឆ្នោតជម្រើសរើសតំណាងរាស្ត្រកាលពីចុងខែកក្កដាកន្លងមក ដែលពុំមានវត្តមានចូលរួមរបស់អតីតគណបក្សសង្គ្រោះជាតិ ដែលជាបក្សប្រឆាំងដ៏ធំនៅកម្ពុជា៕
