អ្នកមានជម្លោះដីធ្លីមកពីស្រុកស្នួល ខេត្តក្រចេះ អះអាងថា ពួកគេទទួលយកការសន្យាដោះស្រាយរបស់អាជ្ញាធរជាថ្មីទៀតទាំងបង្ខំចិត្ត ខណៈអាជ្ញាធរចុះទៅសម្របសម្រួលឲ្យពលរដ្ឋទាំងនោះ ដែលស្នាក់នៅក្នុងវត្តមួយនៅរាជធានីភ្នំពេញនោះ ឲ្យត្រឡប់ទៅភូមិស្រុករបស់ពួកគាត់វិញ។
ពលរដ្ឋប្រមាណជាង ១០០នាក់ ដែលកំពុងមានជម្លោះដីជាមួយក្រុមហ៊ុនចម្ការកៅស៊ូមេមត់ ស្ថិតក្នុងភូមិជើងក្លេរ ឃុំ២ធ្នូ កាលពីម្សិលមិញបានឡើងមកតវ៉ាមុខក្រសួងរៀបចំដែនដី និងបាននាំគ្នាបន្តស្នាក់នៅវត្តសាមគ្គរង្ស៊ី ដើម្បីរង់ចាំដំណោះស្រាយ ប៉ុន្តែ នៅថ្ងៃនេះ ពួកគេបានត្រឡប់ទៅស្រុកកំណើតវិញហើយ ក្រោយពីអាជ្ញាធរខេត្តក្រចេះ បានចុះទៅទទូចឲ្យពួកគេត្រឡប់ទៅវិញ។
លោ ភិន ធា ដែលអះអាងថា ជាតំណាងពលរដ្ឋប្រាប់វីអូឌីថា ក្រុមអ្នកភូមិមិនចង់ត្រឡប់ទៅវិញនោះទេ ដោយថា អាជ្ញាធរខេត្តក្រចេះបានសន្យាជាច្រើនដងហើយថា ដោះស្រាយបញ្ចប់ឲ្យពួកគេ ប៉ុន្តែ រហូតមកដល់ពេលនេះ មិនទទួលបានដំណោះស្រាយឡើយ។
លោ ភិន ធា ដែលអះអាងថា ជាតំណាងពលរដ្ឋ
ប្រធានមន្ទីររៀបចំដែនដីខេត្តក្រចេះ លោក កៅ ម៉ាឌីឡែន មានប្រសាសន៍ថា ទាំងអាជ្ញាធរថ្នាក់ស្រុក និងខេត្តកំពុងដំណើរដោះស្រាយករណីវិវាទដីធ្លីនេះតាមនីតិវិធីច្បាប់ ហើយថា នឹងជួបប្រជុំជាមួយភាគីពាក់ព័ន្ធ និងក្រុមពលរដ្ឋនៅថ្ងៃស្អែកម្តងទៀតមុនឈានទៅដល់ការវាស់វែងជូនពលរដ្ឋទាំងនោះ។
ប្រធានមន្ទីររៀបចំដែនដីខេត្តក្រចេះ លោក កៅ ម៉ាឌីឡែន
ប្រធានមន្ទីររៀបចំដែនដីរូបនេះ បន្តថា ពលរដ្ឋអាចទទួលបានដី ១ហិកតាកន្លះក្នុង ១គ្រួសារ ខណៈពលរដ្ឋខ្លះមិនពេញចិត្តចំពោះការផ្តល់ដំណោះស្រាយនេះទេ។
ពលរដ្ឋម្នាក់ លោក ស៊ីវ រី និយាយថា ក្រុមអ្នកភូមិមិនអាចទទួលយកបានទេចំពោះការដោះស្រាយដោយផ្តល់ដីឲ្យពួកគាត់ត្រឹមតែ ១ហិកតាកន្លះនោះ ដោយថា ចំនួននេះតិចតួចពេកមិនអាចបង្កបង្កើនផលចិញ្ចឹមជីវិតរស់នៅបាន។
លោកបន្តថា ចំពោះមុខនេះ ក្រុមពលរដ្ឋស្នើទៅអាជ្ញាធរជួយអន្តរាគមន៍ឲ្យក្រុមហ៊ុនបញ្ឈប់សកម្មភាពឈួសឆាយ ដោយរង់ចាំ ការដោះស្រាយជូនពលរដ្ឋសិន។
ពលរដ្ឋម្នាក់ លោក ស៊ីវ រី
កាលឆ្នាំមុន លោកនាយករដ្ឋមន្រ្តី ហ៊ុន សែន ស្តីបន្ទោសខ្លាំងៗទៅលើមន្រ្តីក្រោមឱវាទរបស់ខ្លួនដែលមិនព្រមដោះស្រាយបញ្ចប់វិវាទដីធ្លីជូនពលរដ្ឋ។
លោកនាយករដ្ឋមន្រ្តី ហ៊ុន សែន
ក្រុមអ្នកភូមិបានទាមទារដីមកវិញ ២ហិកតាកន្លះសម្រាប់១គ្រួសារ ខណៈពួកគេចោទក្រុមហ៊ុនចម្ការកៅស៊ូមេមត់ថា បានរំលោភយកដីធ្លីទំហំពី ៣ ទៅ ៤ហិកតាក្នុងមួយគ្រួសារ និងបំផ្លាញដំណាំ ផ្ទះសម្បែង ព្រមទាំងប្រើអំពើហិង្សាទៅលើពលរដ្ឋទៀតផង។
កាលពីថ្ងៃទី០៨ ខែមីនា អ្នកភូមិជាច្រើននាក់បានរងរបួសនៅពេលប៉ះទង្គិចគ្នាជាមួយក្រុមសមត្ថកិច្ចចម្រុះប្រដាប់ដោយកាំភ្លើងដែលចុះការពារគ្រឿងចក្រក្រុមហ៊ុន ខណៈពលរដ្ឋទាំងនោះបានតវ៉ាបិទផ្លូវជាតិលេខ ៧៦A។
ប្រធានមន្ទីររៀបចំដែនដីខេត្តក្រចេះលោក កៅ ម៉ាឌីឡែន ឲ្យដឹងថា មានពលរដ្ឋ១៦០០គ្រួសារដែលអាជ្ញាធរកំពុងរៀបចំដោះស្រាយដីធ្លីជូននៅក្នុងឃុំ២ធ្នូ ស្រុកស្នួល៕
