អ្នកជំនាញវិស័យអចលនទ្រព្យអាស៊ានមានជំនឿលើការរីកចម្រើននៃអចលនទ្រព្យនៅកម្ពុជា បើទោះបីបញ្ហានយោបាយរវាងកម្ពុជា និងអន្តរជាតិធ្វើឲ្យពួកគេបារម្ភបន្តិចក៏ដោយ។
អ្នកជំនាញផ្នែកវិស័យអចលនទ្រព្យជាច្រើនមកពីប្រទេសនានានៅតំបន់អាស៊ានបានចូលរួមក្នុងសន្និបាតអចលនទ្រព្យ និងពិព័ណ៌សមាគមអចលនទ្រព្យអាស៊ានធ្វើនៅរាជធានីភ្នំពេញកាលពីម្សិលមិញ បានលើកឡើងដោយមានជំនឿលើវិស័យអចលនទ្រព្យកម្ពុជានឹងមានតម្លៃកាន់តែខ្ពស់នាពេលខាងមុខ។
លើកឡើងប្រាប់អ្នកសារព័ត៌មានVOD អគ្គលេខាធិការសមាគមអចលនទ្រព្យអាស៊ាន និងជាម្ចាស់ក្រុមហ៊ុនអចលនទ្រព្យមួយនៅប្រទេសម៉ាឡេស៊ី លោក ស៊ូម៉ា សាន់ត្រាំ មានប្រសាសន៍ថាវិស័យអចលនទ្រព្យកម្ពុជាកំពុងផ្តល់ឱកាសល្អដល់អ្នកវិនិយោគដែលអាចទទួលបានផលចំណេញច្រើន ខណៈដែលលោកថាមិនចាប់អារម្មណ៍ទៅលើបញ្ហានយោបាយនោះទេ។
អគ្គលេខាធិការសមាគមអចលនទ្រព្យអាស៊ាន និងជាម្ចាស់ក្រុមហ៊ុនអចលនទ្រព្យមួយនៅប្រទេសម៉ាឡេស៊ី លោក ស៊ូម៉ា សាន់ត្រាំ
សមាជិកនៃសមាគម និងជាអ្នកបង្កើតក្រុមហ៊ុនអចលនទ្រព្យមួយនៅប្រទេសថៃលោក សោភ័ណ ប្រឈប់ឆៃ មានប្រសាសន៍ថាប្រទេសកម្ពុជាមានការរីកចំរើនច្រើន ជាពិសេសវិស័យអចលនទ្រព្យ ខណៈលោកចាត់ទុកថាប្រទេសកម្ពុជាជាប្រទេសមួយដែលមានការរីកចម្រើនខ្លាំងជាងគេក្នុងតំបន់អាស៊ានលើវិស័យនេះ។ សម្រាប់បញ្ហាដែលនយោបាយកម្ពុជាលោកថាគ្រាន់ជារឿងមួយភ្លែតប៉ុណ្ណោះដែលអាចដោះស្រាយបាន។
សមាជិកនៃសមាគម និងជាអ្នកបង្កើតក្រុមហ៊ុនអចលនទ្រព្យមួយនៅប្រទេសថៃលោក សោភ័ណ ប្រឈប់ឆៃ
ប្រធានសមាគមអចលនទ្រព្យភីលីពីនលោក វីល្លាម លី ហ្វរ៉េស្តា ឲ្យដឹងថា ក្រុមហ៊ុនលោកកំពុងរៀបចំគម្រោងសាងសង់ខុនដូរមួយនៅខេត្តព្រះសីហនុ។ លោកថា ពេលបច្ចុប្បន្នលោកមិនអាចធ្វើការទស្សន៍បាន តែលោកមានជំនឿថានាថ្ងៃអនាគតវិស័យអចលនទ្រព្យកម្ពុជាកាន់តែមានតម្លៃកាន់តែថ្លៃ។
ប្រធានសមាគមអចលនទ្រព្យភីលីពីនលោក វីល្លាម លី ហ្វរ៉េស្តា
ទោះជាយ៉ាងណាសម្រាប់អ្នកធ្វើការវិស័យអចលនទ្រព្យមកពីសហរដ្ឋអាមេរិកវិញអ្នកស្រី ម៉ាស្យា ខូលលីនម៉ូស មានប្រសាសន៍ថា ក៏ជឿជាក់ថាបញ្ហានយោបាយជះឥទ្ធិពលលើវិស័យចលនទ្រព្យមិនអូសបន្លាយយូរទេ។
អ្នកធ្វើការវិស័យអចលនទ្រព្យមកពីសហរដ្ឋអាមេរិកវិញអ្នកស្រី ម៉ាស្យា ខូលលីនម៉ូស
វិស័យអចលនទ្រព្យនៅកម្ពុជាត្រូវបានគេកត់សម្គាល់ថាមានកំណើនកើនឡើងពីមួយឆ្នាំទៅមួយឆ្នាំ ដោយឡែកក្នុងឆ្នាំ២០១៧ ក្រសួងរៀបចំដែនដីនគរូបនីយកម្ម និងសំណង់ បានអនុម័តលើគម្រោងសរុបចំនួន ៣ ៤១៨ នៅទូទាំងប្រទេស ខណៈតម្លៃសរុបទឹកប្រាក់ការវិនិយោគបានកើនឡើង រហូតដល់៦,៨ពាន់លានដុល្លារ។
