អតីតមេដឹកនាំបក្សប្រឆាំង លោក សម រង្ស៊ី បានរំឭកបក្សកាន់អំណាចឲ្យរៀបចំបោះឆ្នោតឡើងវិញ ទាំងរដ្ឋសភានិងព្រឹទ្ធសភា ទោះបីក្នុងរយៈពេលប៉ុន្មានសប្ដាហ៍ចុងក្រោយនេះមានអ្នកទោសនយោបាយដែលជាសមាជិកបក្សរបស់ខ្លួនត្រូវបានដោះលែងជាបន្តបន្ទាប់យ៉ាងណាក៏ដោយ។
គណបក្សសង្គ្រោះជាតិ ត្រូវតុលាការកំពូល ប្រកាសរំលាយកាលពីថ្ងៃទី១៦ខែវិច្ឆិកាឆ្នាំ២០១៧ ពោលគឺ មុនបោះឆ្នោតជ្រើសតាំងតំណាងរាស្ត្រនីតិកាលទី៦មកដល់។ ការរំលាយអតីតបក្សប្រឆាំងមួយនេះ បានជំរុញឲ្យបក្សកាន់អំណាច របស់លោក ហ៊ុន សែន ឈ្នះឆ្នោតគ្រប់គ្រងបានទាំងស្ថាប័នព្រឹទ្ធសភា និងរដ្ឋសភា។
លោក សម រង្ស៊ី អះអាងលើទំព័រហ្វេសប៊ុកថា មេដឹកនាំបក្សកាន់អំណាច លោក ហ៊ុន សែន បង្ខំចិត្តដោះលែងសកម្មជនរបស់ខ្លួន និងអ្នកទោសមនសិការពីពន្ធនាគារនាប៉ុន្មានថ្ងៃនេះដោយសារសម្ពាធអន្តរជាតិ។
អតីតមេដឹកនាំបក្សប្រឆាំងរូបនេះ បានទាមទារឲ្យបក្សកាន់អំណាចត្រូវរៀបចំការបោះឆ្នោត ព្រឹទ្ធសភា និង រដ្ឋសភា មកវិញ រួមទាំងលក្ខខណ្ឌមួយចំនួនទៀត ឈានទៅបើកផ្លូវឲ្យគណបក្សរបស់លោកបានចូលប្រឡូកក្នុងឆាកនយោបាយឡើងវិញ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ចាត់ទុកការលើកឡើងរបស់ លោក សម រង្ស៊ី នេះថា ជាការស្រមើស្រមៃហួសហេតុ ដែលគណបក្សលោកមិនអាចទទួលយកបាន ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន
ជាងនេះទៅទៀតនាយករដ្ឋមន្ត្រីលោក ហ៊ុន សែន ធ្លាប់អះអាងថា ការដោះលែងជនជាប់ចោទមួយចំនួន រួមទាំងសកម្មជនបក្សប្រឆាំងផង លោកថា ជាសន្តានចិត្តរបស់លោក ក្នុងនាមជាមេដឹកនាំ មិនមែនជាសម្ពាធពីអន្តរជាតិទេ និងបានចំអកថា ការដែលមេដឹកនាំរូបនេះ បន្តលើកឡើងពីសម្ពាធអន្តរជាតិ មកលើរដ្ឋាភិបាល ម្តងហើយម្តងទៀត ថាជាទង្វើចង់ឲ្យសកម្មជនរបស់ខ្លួននៅបន្តជាប់ឃុំ។
អ្នកតាមដាននយោបាយ លោក ឯម សុវណ្ណរា វិភាគថា បើអ្នកនយោបាយខ្មែរមិនអាចអង្គុយទល់មុខគ្នា ដើម្បីស្វែងរកដំណោះស្រាយបានទេ លោកថារចន្តនយោបាយពេលនេះ អាចនឹងរុញកម្ពុជា ឲ្យជួបវិបត្តិធ្ងន់ធ្ងរទៅថ្ងៃអនាគត។
អ្នកវិភាគរូបនេះយល់ថា គ្រប់ជំនួយនិងអំណោយផលផ្នែកពាណិជ្ជកម្មពីក្រុមប្រទេសលោកសេរីផ្តល់ឲ្យមកកម្ពុជា បានភ្ជាប់ទៅនឹងលក្ខខណ្ឌ នយោបាយបែបប្រជាធិបតេយ្យ។
អ្នកតាមដាននយោបាយ លោក ឯម សុវណ្ណរា
ក្នុងរយៈពេល២សប្ដាហ៍ចុងក្រោយនេះ អ្នកវិភាគបញ្ហាសង្គម សកម្មជនដីធ្លី អ្នកសារព័ត៌មាន និង អ្នកទោសនយោបាយ សរុបចំនួន១៩ ត្រូវបានលើកលែងទោសនិងដោះលែងចេញពីពន្ធនាគារជាបន្តបន្ទាប់។