អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម បានផ្តល់ដំណឹងឲ្យប្រជាជនបញ្ឈប់ការប្រើប្រាស់ និងចែកចាយផលិតផលម្សៅទឹកដោះគោ Dumex Mamil Gold Infant Milk Formula Step 1 ដោយសារតែបានរកឃើញបាក់តេរីម្យ៉ាងក្នុងផលិតផលនេះ។
តាមសេចក្តីជូនដំណឹងរបស់អគ្គនាយកដ្ឋានកាំកុងត្រូលនៃក្រសួងពាណិជ្ជកម្មដែលចេញផ្សាយនៅថ្ងៃនេះ បានឲ្យដឹង អាជ្ញាធរកសិម្ហូបអាហារ និងបសុពេទ្យប្រទេសសិង្ហបុរី បានរកឃើញបាក់តេរី Cronobacter sakazakii នៅក្នុងគំរូផលិតផលម្សៅទឹកដោះគោសម្រាប់ទារក Dumex Mamil Gold Infant Milk Formula Step 1។ បាក់តេរីនេះ បណ្តាលឲ្យទារកមានជំងឺរលាកពោះវៀនធំ ពោះវៀនតូច រលាកស្រោមខួរ និងអាចឈានដល់ស្លាប់ផងដែរ។
សេចក្តីជូនដំណឹងដដែល អគ្គនាយកដ្ឋានកាំកុងត្រូល ក៏បានអំពាវនាវឲ្យប្រជាជន កុំឲ្យលក់ដូរ និងប្រើប្រាស់នូវផលិតផលម្សៅទឹកដោះគោនេះបន្តទៀត និងជួយសហការផ្តល់ព័ត៌មានដល់មន្រ្តីមានសមត្ថកិច្ច ក្នុងករណីបានជួបប្រទះ៕