អាជ្ញាធរត្រួតពិនិត្យសុវត្ថិភាពចំណីអាហារកម្ពុជា បានឲ្យដឹងថា ម្សៅទឹកដោះគោកូនក្មេងមួយប្រភេទផលិតឡើងដោយក្រុមហ៊ុន Dumex ដែលត្រូវបានអាជ្ញាធរសិង្ហបុរីហាមឃាត់នោះ មិនទាន់ត្រូវបានរកឃើញថា មានចែកចាយនៅលើទីផ្សារប្រទេសកម្ពុជានៅឡើយទេរហូតមកដល់ពេលនេះ។
អគ្គនាយកដ្ឋានកាំកុងត្រូលកម្ពុជា កាលពីថ្ងៃម្សិលមិញនេះ បានប្រកាសហាមឃាត់ប្រជាពលរដ្ឋកុំឲ្យទិញម្សៅទឹកដោះគោ Mamil Gold Infant Milk Formula Step 1 របស់ក្រុមហ៊ុន Danone Dumex បន្ទាប់ពីអាជ្ញាធរគ្រប់គ្រងសុវត្ថិភាពចំណីអាហារសិង្ហបុរី បានរកឃើញថា ម្សៅទឹកដោះគោមួយប្រភេទនេះ ផ្ទុកទៅដោយបាក់តេរី Cronobacter sakazakii ហើយត្រូវបានបញ្ជាឲ្យប្រមូលត្រឡប់មកវិញ។
ក្រោយពីបានចុះទៅត្រួតពិនិត្យតាមបណ្តាហាងមួយចំនួនរួចមក ខាងកាំកុងត្រូលពុំទាន់រកឃើញនូវផលិតផលម្សៅទឹកដោះគោ Dumex Mamil Gold Infant Milk Formula Step 1 នៅឡើយទេ នេះបើតាមការអះអាងរបស់ប្រធាននាយកដ្ឋានមន្ទីរពិសោធន៍ នៃអគ្គនាយកដ្ឋានកាំកុងត្រូល។
ទោះជាយ៉ាងណា ប្រធាននាយកដ្ឋានមន្ទីរពិសោធន៍ នៃអគ្គនាយកដ្ឋានកាំកុងត្រូល លោក ស៊ិន ស៊ីដេត បានឲ្យដឹងថា មកដល់ពេលនេះ ផលិតផលម្សៅទឹកដោះគោ Dumex Mamil Gold Infant Milk Formula Step 1 មិនទាន់មានលក់នៅកម្ពុជានោះទេ ហើយលោកក៏បានចុះត្រួតពិនិត្យតាមហាងមួយចំនួនរួចមកហើយ ប៉ុន្តែ មិនទាន់បានរកឃើញឡើយ។
ប្រធាននាយកដ្ឋានមន្ទីរពិសោធន៍ នៃអគ្គនាយកដ្ឋានកាំកុងត្រូល លោក ស៊ិន ស៊ីដេត
ប្រធាននាយកដ្ឋានមន្ទីរពិសោធន៍ នៃអគ្គនាយកដ្ឋានកាំកុងត្រូល លោក ស៊ិន ស៊ីដេត
កាលពីម្សិលមិញនេះ អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម បានប្រកាសប្រាប់ប្រជាជន ឲ្យបញ្ឈប់ការប្រើប្រាស់ និងចែកចាយផលិតផលម្សៅទឹកដោះគោ Dumex Mamil Gold Infant Milk Formula Step 1 បន្ទាប់ពីម្សៅទឹកដោះគោមួយប្រភេទនេះ ត្រូវបានអាជ្ញាធរប្រទេសសិង្ហបុរីរកឃើញបាក់តេរីម្យ៉ាងក្នុងផលិតផលនេះ។
ក្រុមហ៊ុន Danone Dumex បានប្រកាសនៅលើគេហទំព័ររបស់ខ្លួនថា ខ្លួនបានប្រមូលពីទីផ្សារត្រឡប់មកវិញហើយនូវម្សៅទឹកដោះគោប្រភេទនេះ បន្ទាប់ពីទឹកដោះគោប្រភេទនេះ ត្រូវបានរកឃើញថា ផ្ទុកទៅដោយបាក់តេរី Cronobacter Sakazakii។
ក្រុមហ៊ុនមានមូលដ្ឋាននៅសិង្ហបុរីមួយនេះ បានប្រកាសថា រហូតមកដល់ពេលនេះ អតិថិជនរបស់ខ្លួនពុំទាន់បានរាយការណ៍ត្រឡប់ទៅវិញអំពីបញ្ហាដែលកើតចេញពីការប្រើប្រាស់ម្សៅទឹកដោះគោនេះនៅឡើយទេ ហើយក៏ជំរុញទៅអតិថិជនរបស់ខ្លួនឲ្យយកម្សៅទឹកដោះគោមួយប្រភេទ ទៅដូរយកម្សៅទឹកដោះគោប្រភេទផ្សេងវិញផងដែរ៕