ពលរដ្ឋខ្មែរអាយុក្រោម ១៨ឆ្នាំជាច្រើននាក់ បានប្ដឹងថៅកែជនជាតិចិនម្នាក់ ដោយចោទថា បានវាយធ្វើបាប ប្រើអំពើហិង្សា និងបណ្ដេញពួកគេចេញពីការងារ។
គេហទំព័រអគ្គស្នងការនគរបាលជាតិចុះផ្សាយនៅថ្ងៃនេះថា កាលពីយប់ថ្ងៃទី៣១ ខែសីហា ឆ្នាំ២០១៨ បុគ្គលិកខ្មែរប្រុស-ស្រីចំនួន ១៤នាក់ ដែលទើបចូលធ្វើការបានចំនួន ៤ថ្ងៃនោះ បានដាក់ពាក្យបណ្ដឹងនៅប៉ុស្តិ៍នគរបាលស្ទឹងមានជ័យ១ ខណ្ឌមានជ័យ ដោយប្ដឹងថៅកែសិប្បកម្មធ្វើនំពងទា ជាជនជាតិចិនម្នាក់ឈ្មោះ ធួក គួង ពីបទប្រើហិង្សាទៅលើពួកគេ។
បើតាមការចុះផ្សាយរបស់អគ្គស្នងការនគរបាលជាតិ នៅយប់ថ្ងៃកើតហេតុនោះ យុវតីខ្មែរម្នាក់ឈ្មោះ ហៃ នីតា អាយុ ១៦ឆ្នាំ និងបងស្រីរបស់នាង បានយកខោអាវដែលបោករួចទៅហាលនៅលើដំបូលផ្ទះនៃសិប្បកម្មនេះ ហើយបន្ទាប់មក យុវជនម្នាក់ទៀតឈ្មោះ សឹង រតនៈ អាយុ ១៨ឆ្នាំ បានឈរជជែកគ្នាលេងជាមួយគ្នា និងបានជួយហាលខោអាវនាង។
ប៉ុន្ដែ ក្រោយមក ថៅកែសិប្បកម្មឈ្មោះ ធួក គួង បានស្ទុះទៅវាយ និងទះកំភ្លៀងយុវតីខាងលើ ហើយបានចោទពួកគេថា លួចមានស្នេហា និងបណ្ដេញពួកគេចេញពីសិប្បកម្មទាំងយប់។
ថៅកែសិប្បកម្មចិនរូបនេះ ថែមទាំងបានស្រែកគំរាមបុគ្គលិកផ្សេងទៀត ហើយបុគ្គលិកចំនួន ១៤នាក់ ក្នុងចំណោម ៣០នាក់ បានចេញពីកន្លែងសិប្បកម្មនេះដោយមិនបានទទួលប្រាក់កម្រៃ ដែលពួកគេធ្វើការ ៤ថ្ងៃនោះទេ។
បើតាមអគ្គស្នងការនគរបាលជាតិ នៅថ្ងៃទី១ កញ្ញា យុវជន-យុវតីទាំង ១៤នាក់ បានដាក់ពាក្យប្ដឹងនៅប៉ុស្ដិ៍នគរបាលស្ទឹងមានជ័យ ដើម្បីជួយរកយុត្តិធម៌ ហើយពួកគេក៏ត្រូវបានអាជ្ញាធរបញ្ជូនទៅស្រុកកំណើតវិញនៅស្រុកត្រាំកក់ ខេត្តតាកែវ។
ប៉ុន្ដែ អគ្គស្នងការនគរបាលជាតិមិនបានបញ្ជាក់ទេថា តើអាជ្ញាធរកម្ពុជានឹងមានវិធានការបែបណាក្នុងករណីនេះ និងចំពោះថៅកែជាជនជាតិចិននោះទេ៕