ក្រុមហ៊ុនឌុយមិចកម្ពុជា បានអះអាងថា ម្សៅទឹកដោះគោដែលត្រូវបានអាជ្ញាធរសិង្ហបុរីរកឃើញថា មានផ្ទុកបាក់តេរីនោះ មិនមាននៅលើទីផ្សារប្រទេសកម្ពុជានោះទេ ដោយថា វាផលិតឡើងសម្រាប់តែលក់នៅសិង្ហបុរីតែប៉ុណ្ណោះ។
អគ្គនាយកដ្ឋានកាំកុងត្រូលកម្ពុជា កាលពីចុងខែសីហាកន្លងមកនេះ បានហាមឃាត់ប្រជាពលរដ្ឋ កុំឲ្យប្រើប្រាស់ម្សៅទឹកដោះគោ Mamil Gold Infant Milk Formula Step 1 ដែលផលិតឡើងដោយក្រុមហ៊ុន Danone Dumex បន្ទាប់ពីអាជ្ញាធរគ្រប់គ្រងសុវត្ថិភាពចំណីអាហារសិង្ហបុរី បានរកឃើញថា ម្សៅទឹកដោះគោមួយប្រភេទនេះ ផ្ទុកទៅដោយបាក់តេរី Cronobacter sakazakii ហើយត្រូវបានបញ្ជាឲ្យប្រមូលត្រឡប់មកវិញ។
ក្នុងសេចក្ដីប្រកាសរបស់ខ្លួនកាលពីថ្ងៃទី១ ខែកញ្ញា ក្រុមហ៊ុន Dumex ប្រចាំនៅកម្ពុជា បាននិយាយថា ម្សៅទឹកដោះគោមួយប្រភេទនេះ មានលក់តែនៅក្នុងទីផ្សារប្រទេសសិង្ហបុរីតែប៉ុណ្ណោះ ហើយមិនមានលក់នៅក្នុងទីផ្សារកម្ពុជានោះឡើយ។
ប្រធាននាយកដ្ឋានមន្ទីរពិសោធន៍ នៃអគ្គនាយកដ្ឋានកាំកុងត្រូល លោក ស៊ិន ស៊ីដេត ក៏បានអះអាងប្រាប់វីអូឌីកាលពីចុងខែសីហាកន្លងមកថា មកដល់ពេលនេះ ផលិតផលម្សៅទឹកដោះគោ Dumex Mamil Gold Infant Milk Formula Step 1 មិនទាន់មានលក់នៅកម្ពុជានោះទេ ហើយលោកក៏បានចុះត្រួតពិនិត្យតាមហាងមួយចំនួនរួចមកហើយ ប៉ុន្តែ មិនទាន់បានរកឃើញឡើយ។
ក្រុមហ៊ុន Danone Dumex បានប្រកាសនៅលើគេហទំព័ររបស់ខ្លួនថា ខ្លួនបានប្រមូលពីទីផ្សារត្រឡប់មកវិញហើយនូវម្សៅទឹកដោះគោប្រភេទនេះ បន្ទាប់ពីទឹកដោះគោប្រភេទនេះ ត្រូវបានរកឃើញថា ផ្ទុកទៅដោយបាក់តេរី Cronobacter Sakazakii។
ក្រុមហ៊ុនមានមូលដ្ឋាននៅសិង្ហបុរីមួយនេះ បានប្រកាសថា រហូតមកដល់ពេលនេះ អតិថិជនរបស់ខ្លួនពុំទាន់បានរាយការណ៍ត្រឡប់ទៅវិញអំពីបញ្ហាដែលកើតចេញពីការប្រើប្រាស់ម្សៅទឹកដោះគោនេះនៅឡើយទេ ហើយក៏ជំរុញទៅអតិថិជនរបស់ខ្លួនឲ្យយកម្សៅទឹកដោះគោមួយប្រភេទ ទៅដូរយកម្សៅទឹកដោះគោប្រភេទផ្សេងវិញផងដែរ៕
