លទ្ធផលប្រឡងបាក់ឌុបឆ្នាំ២០១៨នេះ បង្ហាញថា សិស្សនៅរាជធានីភ្នំពេញ និងខេត្តសៀមរាប បាននាំមុខគេក្នុងការទទួលបានទិន្ទេស “A” បើប្រៀបនឹងបណ្ដាខេត្តក្រុងផ្សេងទៀតក្នុងប្រទេសកម្ពុជា។
យោងតាមលទ្ធផលប្រកាសដោយក្រសួងអប់រំ យុវជន និងកីឡានៅថ្ងៃទី៩ ខែកញ្ញានេះ សិស្សទទួលបាននិទ្ទេស “A” សរុបនៅទូទាំងប្រទេសមានចំនួន ២៩០នាក់ ក្នុងនោះ នៅរាជធានីភ្នំពេញ សិស្សនិទ្ទេស A មាន ១៣៥នាក់ នៅខេត្តសៀមរាបមានចំនួន ២១នាក់ ខេត្តកណ្ដាល ១៦នាក់ និងតាមពីក្រោយដោយខេត្តបាត់ដំបង និងតាកែវ ដែលមានចំនួន១៥នាក់។
ចំណែកនៅខេត្តកំពង់ចាម សិស្សទទួលនិទ្ទេស “A” មាន ១៣នាក់ ខេត្តកំពតមាន ១១នាក់ ត្បូងឃ្មុំ កំពង់ឆ្នាំង កំពង់ធំ និងបន្ទាយមានជ័យមាន ៩នាក់ដូចគ្នា ព្រៃវែងមាន៨នាក់ ក្រចេះមាន ៦នាក់ ពោធិ៍សាត់មាន៤នាក់ ស្វាយរៀង កំពង់ស្ពឺ និងព្រះសីហនុ មាន៣នាក់ដូចគ្នា ហើយរតនគិរី សិស្សនិទ្ទេស A មានតែម្នាក់ប៉ុណ្ណោះ។
យ៉ាងណាក៏ដោយ សិស្សទទួលបាននិទ្ទេស A នៅឆ្នាំ២០១៨នេះ មានចំនួនទាបជាងឆ្នាំមុន ពោលគឺនៅឆ្នាំនេះ សិស្សបាននិទ្ទេស A មានតែ ២៩០នាក់ ខណៈនៅឆ្នាំ២០១៧ សិស្សនិទ្ទេសមានដល់ទៅ ៤២៤នាក់ឯណោះ៕
