តួលេខរបស់រដ្ឋាភិបាល បានឲ្យដឹងថា ចំនួនភ្ញៀវទេសចរអន្តរជាតិចូលមកកម្ពុជា បានបន្តកើនឡើងនៅក្នុងរយៈពេល ៧ខែដើមឆ្នាំនេះ ដោយចំនួនភ្ញៀវទេសចរជនជាតិចិននៅតែនាំមុខដដែល។
តួលេខរបស់ក្រសួងទេសចរណ៍ដែលចេញនៅព្រឹកថ្ងៃនេះ បានឲ្យដឹងថា ភ្ញៀវទេសចរបរទេសសរុបជាង ៤៥មឺុននាក់ បានចូលមកកម្ពុជានៅក្នុងខែកក្កដា ឆ្នាំ២០១៨នេះ ឬកើនឡើងជិត ២ភាគរយ បើធៀបនឹងខែកក្កដា ឆ្នាំ២០១៧កន្លងមក។
តួលេខដដែលនេះ បានឲ្យដឹងថា ចំនួនភ្ញៀវទេសចរបរទេសសរុបជិត ៣.៥លាននាក់ បានចូលមកកម្ពុជានៅក្នុងរយៈពេល ៧ខែឆ្នាំ២០១៨នេះ ឬកើនឡើង ១១.១ភាគរយ បើធៀបនឹងរយៈពេលដូចគ្នាកាលពីឆ្នាំមុន។
តាមតួលេខក្រសួងទេសចរណ៍ ចំនួនភ្ញៀវទេសចរជនជាតិចិនដែលធ្វើដំណើរមកប្រទេសកម្ពុជា បានកើនឡើងពីចំនួនជាង ១០ម៉ឺននាក់កាលពីខែកក្កដាឆ្នាំមុន ទៅដល់ជាង ១៦មឺុននាក់ នៅខែកក្កដាឆ្នាំនេះ ឬមានកំណើនដល់ទៅ ៥៦.១ភាគរយ។
ប្រទេសកម្ពុជាទទួលបានភ្ញៀវទេសចរជាង ៥លាន ៦សែននាក់ កាលពីឆ្នាំ២០១៧កន្លងមក ក្នុងនោះភ្ញៀវជនជាតិមានដល់ទៅជាង ១លាន ២១ម៉ឺននាក់ ឬស្មើនឹង ២១.៦ភាគរយនៃចំនួនភ្ញៀវទេសចរបរទេសសរុបដែលបានមកដល់កម្ពុជា៕