តំណាងពលរដ្ឋមានជម្លោះដីធ្លីជាមួយបន្ទាយទាហានមួយក្នុងខណ្ឌពោធិ៍សែនជ័យ រាជធានីភ្នំពេញ អះអាងថា កូនប្រុសច្បងរបស់លោកនាយករដ្ឋមន្រ្តី ហ៊ុន សែន គឺ ហ៊ុន ម៉ាណែត ដែលទើបឡើងកាន់តំណែងជាមេបញ្ជាការកងទ័ពជើងគោក បានសន្យាដោះស្រាយបញ្ចប់វិវាទដីធ្លីរបស់ពួកគេ។
ពលរដ្ឋប្រមាណជិត ១០០នាក់ ដែលមានជម្លោះដីធ្លីជាមួយទាហានវរៈសេនាតូចការពារអាកាសលេខ៩១ ស្ថិតក្នុងភូមិព្រៃទា សង្កាត់ចោមចៅ បានផ្តុះការតវ៉ាជាថ្មីនៅថ្ងៃនេះ ដើម្បីទាមទារដីធ្លីពួកគេវិញ ខណៈជម្លោះនោះបានអូសបន្លាយជិត ២០ឆ្នាំមកហើយ។
ពលរដ្ឋម្នាក់វ័យជាង ៧០ឆ្នាំ អ្នកស្រី ម៉ាន ហ៊ន ដែលអះអាងថា បានរស់នៅក្នុងតំបន់មានជម្លោះនោះតាំងពី១៩៧៩នោះ បានប្រាប់វីអូឌីនៅកន្លែងតវ៉ាថា កាលឆ្នាំ១៩៨៧ មន្រ្តីទាហានជាន់ខ្ពស់ម្នាក់ បានខ្ចីដីអ្នកភូមិទំហំជាង ៩ហិកតា ដើម្បីបោះទីតាំងឲ្យពលទាហានឈរជើងនៅទីនោះ ដោយសន្យាសងពលរដ្ឋវិញ ក្រោយប្រទេសមានសុខសន្តិភាព។
អ្នកស្រីបន្តថា នៅឆ្នាំ២០០០ ក្រុមពលរដ្ឋបានទាមទារដីពួកគាត់មកវិញ បន្ទាប់ពីឃើញដីនោះត្រូវបានគេវាស់លក់ឲ្យឈ្មួញដើម្បី សាងសង់ផ្ទះជួល និងអគារផ្សេងៗ ប៉ុន្តែ ការតវ៉ាទាមទារនោះមិនទទួលដំណោះស្រាយនោះទេ ដែលបណ្តាលឲ្យអូសបន្លាយរហូតមកដល់សព្វថ្ងៃនេះ។
ពលរដ្ឋម្នាក់វ័យជាង ៧០ឆ្នាំ អ្នកស្រី ម៉ាន ហ៊ន ដែលអះអាងថា បានរស់នៅក្នុងតំបន់មានជម្លោះនោះតាំងពី១៩៧៩
ពលរដ្ឋម្នាក់ទៀត អ្នកស្រី ឃឹម រ៉េត និយាយថា រយៈពេលជិត ២០ឆ្នាំនេះ ក្រុមអ្នកភូមិបានស្វែងរកកិច្ចអន្តរាគមន៍ពីគ្រប់ស្ថាប័នរដ្ឋពាក់ព័ន្ធជាច្រើនឲ្យជួយដោះស្រាយ ដោយថា នៅពីឆ្នាំ២០១៧ លោកនាយករដ្ឋមន្រ្តី ហ៊ុន សែន បានបញ្ជាទៅក្រសួងការពារជាតិ ឲ្យដោះស្រាយបញ្ចប់បញ្ហានេះផងដែរ ប៉ុន្តែ មន្រ្តីថ្នាក់ក្រោយមិនអនុវត្តតាមនោះទេ។
ពលរដ្ឋម្នាក់វ័យជាង ៧០ឆ្នាំ អ្នកស្រី ម៉ាន ហ៊ន ដែលអះអាងថា បានរស់នៅក្នុងតំបន់មានជម្លោះនោះតាំងពី១៩៧៩
តំណាងពលរដ្ឋលោក អ្នកស្រី សួស ឥដ្ឋ បានឲ្យដឹងថា មេបញ្ជាការកងទ័ពជើងគោកដែលទើបឡើងកាន់តំណែងថ្មី លោក ហ៊ុន ម៉ាណែត បានទៅជួបតំណាងពលរដ្ឋផ្ទាល់នៅវរៈសេនាតូចការពារអាកាសលេខ៩១ នៃមូលដ្ឋានកងទ័ពការពារអាកាស។
បើតាមអ្នកស្រី សួស ឥដ្ឋ លោក ហ៊ុន ម៉ាណែត បានសន្យាចំពោះមុខតំណាងពលរដ្ឋថា លោកនឹងដោះស្រាយបញ្ចប់បញ្ហាវិវាទដីធ្លីនេះ ឲ្យបានឆាប់ប៉ុន្តែមិនអាចកាត់បន្ទាយទាហាននោះឲ្យពលរដ្ឋវិញបានទេ។
តំណាងពលរដ្ឋលោក អ្នកស្រី សួស ឥដ្ឋ
តំណាងពលរដ្ឋរូបនេះបន្តថា ពួកគាត់មិនទាន់សម្រេចថាយ៉ាងណាទេ ដោយរង់ចាំពិគ្រោះពិភាក្សាគ្នាសិន និងជូនដំណឹងទៅលោក ហ៊ុន ម៉ាណែត វិញពេលដែលមានការសម្រេចរួម។
ក្នុងលិខិតមួយចុះថ្ងៃទី១៤ ខែមិថុនា ឆ្នាំ២០១៧ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ស្នើទៅរដ្ឋមន្រ្តីក្រសួងការពារជាតិ លោក ទៀ បាញ់ ឲ្យប្រគល់ដីទំហំ ៤៣.៧៥០ ម៉ែត្រការ៉េ នៃវរៈសេនាតូចលេខ៩១ ទៅឲ្យប្រជាពលរដ្ឋ ៣៥គ្រួសារវិញ។
ប្រធានអាជ្ញាធរជាតិដោះស្រាយទំនាស់ដីធ្លី លោក ប៊ិន ឈិន ដែលកាន់តំណែងជារដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តីផងនោះ ក៏សុំឲ្យអភិបាលរាជធានីភ្នំពេញកាលពីឧសភា ឆ្នាំ២០១៨ ឲ្យចុះវាសវែងដីជូនពលរដ្ឋផងដែរ។
តំណាងពលរដ្ឋឲ្យដឹងថា ដីធ្លីដែលមន្រ្តីទាហានខ្ចីពលរដ្ឋដើម្បីដាក់ទាហាននោះ គឺមានទំហំ ៩ហិកតា ប៉ុន្តែ ក្រោយការជួបប្រជុំ ជាមួយលោក ហ៊ុន ម៉ាណែត នៅថ្ងៃនេះ គឺអាជ្ញាធរសម្រេចសង់មកវិញតែ ៤ហិកតាប៉ុណ្ណោះសម្រាប់ពលរដ្ឋពលរដ្ឋ ៣៥គ្រួសារ តំណាងឲ្យពលរដ្ឋ ១៤៥គ្រួសារដែលត្រូវទទួលបានចំណែកពីដីនោះ៕
