កម្ពុជា ឥណ្ឌូណេស៊ី ប្រកាសរឹតចំណងការទូត និងសេដ្ឋកិច្ចបន្ថែមទៀត ខណៈទំនាក់ទំនងប្រទេសទាំងពីរឈានដល់៦០ឆ្នាំ។
ក្នុងសេចក្ដីប្រកាសចុះថ្ងៃទី១២ កញ្ញា ក្រសួងសេដ្ឋកិច្ចឲ្យដឹងថារដ្ឋមន្ត្រីក្រសួងលោក អូន ព័ន្ធមុនីរ័ត្ន បានព្រមព្រៀងជាមួយឯកអគ្គរដ្ឋទូតឥណ្ឌូណេស៊ីលោក សាឌីមែន ហាសេង (Sadiman Haseng) ក្នុងការជំរុញកិច្ចសហប្រតិបត្តិទ្វេភាគីរវាងប្រទេសទាំងពីរដែលរួមមាន ពាណិជ្ជកម្ម វប្បធម៌ ការវិនិយោគ ទេសចរណ៍ ជាពិសេសជំរុញការអភិវឌ្ឍសេដ្ឋកិច្ច និងទំនាក់ទំនងរវាងប្រជាជន នៃប្រទេសទាំងពីរតាមរយៈការបង្កើតយន្តការរួមក្នុងវិស័យពាក់ព័ន្ធ។
សេចក្ដីប្រកាសនោះក៏បានឲ្យដឹងផងដែរថាដើម្បីជំរុញទំនាក់ទំនងប្រទេសទាំងពីរឲ្យកាន់តែជិតស្និតថែមទៀតនោះកម្ពុជា និងឥណ្ឌូណេស៊ីនឹងរៀបចំខួបអនុស្សាវរីយ៍លើកទី៦០ នៃទំនាក់ទំនងការទូតរវាងប្រទេសប្រទេសទាំងពីរ ដោយមានការរៀបចំតាំងពិព័រណ៍ពាណិជ្ជកម្ម សិក្ខាសាលា ក៏ដូចជាពិនិត្យពីលទ្ធភាពរៀបចំឲ្យមានជើងហោះហើរត្រង់រវាងប្រទេសទាំងពីរផងដែរ។
បើតាមក្រសួងសេដ្ឋកិច្ចកំណើនពាណិជ្ជកម្មកម្ពុជា ឥណ្ឌូណេស៊ី ក្នុងឆ្នាំ២០១៧ មានទំហំ ៥៤២លានដុល្លារអាមេរិក ដែលកើនឡើងជាង២០ភាគរយពីឆ្នាំ២០១៦ ដែលមានចំនួន៤៥២លានដុល្លារអាមេរិក។
កម្ពុជា និងឥណ្ឌូណេស៊ី បានបង្កើតចំណងការទូតដំបូងរបស់ខ្លួននៅឆ្នាំ ១៩៥៧ ហើយនៅឆ្នាំ១៩៦០ ឥណ្ឌូណេស៊ីបានប្រកាសជាផ្លូវការលើសន្ធិសញ្ញាមិត្តភាពជាមួយកម្ពុជាដោយចងដោយច្បាប់មួយផងដែរ៕
