ព្យុះទីហ្វុងមង្ឃុតត្រូវបានរាយការណ៍ថា បានបក់បោកកាត់ភាគខាងជើងប្រទេសហ្វីលីពីនហើយកាលពីថ្ងៃម្សិលមិញនេះ ដោយនាំមកជាមួយនូវទឹកភ្លៀងធ្លាក់ដ៏ជោគជាំ និងបង្កឲ្យដាច់ប្រព័ន្ធអគ្គិសនី និងបណ្ដាញទំនាក់ទំនង។
សារព័ត៌មានសិង្ហបុរី Channel News Asia បានចុះផ្សាយថា មហាព្យុះទីហ្វុងមង្ឃុត ដែលជាព្យុះដ៏ខ្លាំងក្លាបំផុតបោកបក់លើប្រទេសហ្វីលីពីននៅឆ្នាំនេះនោះ បានវាយប្រហារកោះលូហ្សូនទាំងមូល ដែលស្ថិតនៅភាគខាងជើងហ្វីលីពីន។
បើតាមសារព័ត៌មានដដែលនេះ ភ្លាមៗនេះ គ្មានសេចក្ដីរាយការណ៍អំពីទំហំនៃមហន្តរាយកើតចេញពីមហាព្យុះទីហ្វុងនេះឡើយ។
ព្យុះដ៏ខ្លាំងក្លានេះ ត្រូវបានព្យាករថា នឹងមកដល់តំបន់ភាគខាងត្បូងប្រទេសចិន និងវៀតណាមភាគខាងជើងនៅថ្ងៃនេះ បន្ទាប់ពីវាបោកបក់ក្នុងល្បឿន ៣០៥គីឡូម៉ែត្រក្នុងមួយម៉ោងកាត់ប្រទេសហ្វីលីពីន។
អាជ្ញាធរឧតុនិយមកម្ពុជា បានប្រកាសកាលពីប៉ុន្មានថ្ងៃមុនថា ប្រទេសកម្ពុជានឹងទទួលរងភ្លៀងធ្លាក់ច្រើនចាប់ពីថ្ងៃទី១៣ ខែកញ្ញា រហូតដល់សប្ដាហ៍ក្រោយ ខណៈដែលប្រទេសនេះទទួលរងឥទ្ធិពលនៃសម្ពាធទាបបង្កឡើងដោយព្យុះមង្ឃុតនេះ។
អាជ្ញាធរឧតុនិយមកម្ពុជា ក៏បានព្រមានផងដែរអំពីជំនន់ទឹកភ្លៀងនៅតាមបណ្ដាខេត្តជាប់ព្រំដែនកម្ពុជា-ឡាវ និងបណ្ដាខេត្តស្ថិតនៅតំបន់ទំនាបកណ្ដាលជាប់ព្រំប្រទល់កម្ពុជា-វៀតណាម៕
