រដ្ឋសភាគ្រោងនឹងប្រជុំសម្រេចលើការរៀបចំរចនាសម្ព័ន្ធស្ថាប័នមួយនេះនៅថ្ងៃស្អែកនេះ បន្ទាប់ពីប្រជុំសម្រេចលើសុពលភាពលើតំណាងរាស្ត្រថ្មី ដែលត្រូវបានស្នើផ្លាស់ប្ដូរជំនួសតំណាងរាស្ត្រមួយចំនួន ដែលលាលែងទៅកាន់តំណែងផ្សេងៗ។
ក្នុងសេចក្ដីប្រកាសព័ត៌មាននៅថ្ងៃនេះ រដ្ឋសភាបានសម្រេចលើសុពលភាពរបស់តំណាងរាស្ត្រថ្មី ៣៨រូប ដែលត្រូវគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ស្នើផ្លាស់ប្ដូរ។
អ្នកនាំពាក្យរដ្ឋសភា លោក ឡេង ប៉េងឡុង បានប្រាប់វីអូឌីតាមទូរស័ព្ទថា នៅថ្ងៃស្អែកនេះ រដ្ឋសភានឹងរៀបចំរចនាសម្ព័ន្ធគណៈកម្មការរបស់ស្ថាប័នមួយនេះ តាមរយៈការបោះឆ្នោតជ្រើសតាំងពីសមាជិកនៅក្នុងគណៈកម្មការនីមួយៗ។
លោកបានបន្តថា សភានឹងអាចដំណើរការបានហើយចាប់ពីថ្ងៃស្អែកនេះទៅ ដោយគេនឹងសម្រេចនូវការជ្រើសតាំងនូវសមាជិកគណៈកម្មការសភាទាំង ១០។
គណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែន ទទួលបានអាសនៈទាំង១២៥នៅក្នុងរដ្ឋសភានីតិកាលទី៦នេះ៕
