ក្រុមហ៊ុន សហគ្រាស និងរោងចក្ររបស់អឺរ៉ុបដែលកំពុងធ្វើប្រតិបត្តិការណ៍នៅក្នុងប្រទេសចិនបានកំពុងពិចារណាប្តូរទីតាំងរបស់ខ្លួនពីប្រទេសចិនទៅកាន់ប្រទេសនានាក្នុងដើម្បីអាស៊ីអាគ្នេយ៍វិញ ដើម្បីបញ្ចៀសខ្លួនពីផលប៉ះពាល់នៃសង្រ្គាមពាណិជ្ជកម្មរវាងចិននិងអាមេរិក។ នេះបើតាមរបាយការណ៍សិក្សាស្រាវជ្រាវមួយរបស់សភាពាណិជ្ជកម្មសហភាពអឺរ៉ុបប្រចាំប្រទេសចិនដែលចេញផ្សាយកាលពីម្សិលមិញ។
របាយការណ៍សិក្សាស្រាវជ្រាវបង្ហាញថាតាមរយៈការស្ទង់មតិដែលធ្វើទៅលើម្ចាស់ក្រុមហ៊ុនអឺរ៉ុបដែលកំពុងរកស៊ីនៅប្រទេសចិនជិត២០០នាក់បង្ហាញថាក្នុងចំណោមពួកគេទាំងនោះមានប្រមាណជា៥៤ភាគរយយល់ថាការដំឡើងពន្ធគយរបស់អាមេរិកនឹងធ្វើឲ្យប៉ះពាល់ដល់សង្វាក់ផលិតកម្មទីផ្សារសកល ហើយពួកគេប្រមាណជា៧ភាគរយបានផ្លាស់ប្តូរនិងមានគម្រោងផ្លាស់ប្តូទីតាំងក្រុមហ៊ុនរបស់ខ្លួនពីប្រទេសចិនទៅប្រទេសផ្សេង។ការស្ទាបស្ទង់មតិនេះក៏បានបង្ហាញផងដែរថាក្រុមហ៊ុនអឺរ៉ុបចំនួន ៥,២ ភាគរយបានផ្លាស់ប្តូរឬកំពុងផ្លាស់ប្តូរមូលដ្ឋានផលិតកម្មរបស់ខ្លួន។
ប្រភពដដែលបន្តឲ្យដឹងថា ក្រុមហ៊ុនអឺរ៉ុបធំៗមានផែនការផ្លាស់ទីតាំងផលិតកម្មរបស់ប្រទេសនៅតំបន់អាស៊ីអាគ្នេយ៍ដូចជាប្រទេសវៀតណាមនិងហ្វីលីពីនដើម្បីចៀសវាងការយកពន្ធបន្ថែមលើផលិតសំខាន់ៗដែលត្រូវបាននាំចូលពីសហរដ្ឋអាមេរិកហើយត្រូវបានប្រើប្រាស់សម្រាប់ដំឡើងផលិតសម្រេចមួយចំនួន។
ការស្ទង់មតិនេះ ក៏បានបង្ហាញផងដែថាវានឹងធ្វើឲ្យចិនមានកំណើនសេដ្ឋកិច្ចយឺត ធ្វើឲ្យប្រជាជនប្រទេសនេះរាប់លាននាក់បាត់បង់ការងារ ការចំណាយក្នុងដំណើរការផលិតខ្ពស់ជាដើម។
អនុប្រធានសភាពាណិជ្ជកម្មអឺរ៉ុបប្រចាំប្រទេសចិន លោក Carlo Diego D ‘ Andrea លើកឡើងថាប្រសិនបើចិនអាចធ្វើកំណែទម្រង់សេដ្ឋកិច្ចរបស់ខ្លួនដោយកាត់បន្ថយការការពារសហគ្រាសដែលជារបស់រដ្ឋ នោះសង្គ្រាមពាណិជ្ជកម្មអាចនឹងធូរស្រាល។
កាលពីថ្ងៃអង្គារកន្លងទៅ លោកដូណាល់ ត្រាំ ប្រធានាធិបតីអាមេរិក បានប្រកាសដំឡើងពន្ធនាំចូល១០ភាគរយបន្ថែមទៀតលើទំនិញរបស់ចិនដែលមានតម្លៃរហូតដល់២០០ពាន់លានដុល្លាអាមេរិក។ ការអនុវត្តន៍ក្នុងការយកពន្ធបន្ថែមនេះនឹងចាប់ផ្ដើមនៅថ្ងៃចន្ទសប្តាហ៍ក្រោយនេះ។ លោកត្រាំក៏បានលើកឡើងផងដែរថាខ្លួនត្រូវតែធ្វើបែបនេះជាមួយចិន ហើយបើចិននៅតែគឃ្លើនដំឡើងពន្ធលើទំនិញរបស់អាមេរិកទៀតខ្លួននឹងដំឡើងពន្ធលើទំនិញទាំងអស់របស់ចិន។
ជាការឆ្លើយតប ចិនថាខ្លួននឹងធ្វើការសងសឹកវិញជាមួយអាមេរិកដោយការដំឡើងពន្ធបន្ថែមលើទំនិញអាមេរិកដែលនាំចូលប្រទេសខ្លួនដូចគ្នា៕
