ក្រសួងអប់រំសម្រេចរក្សានាយកវិទ្យាល័យស៊ីសុវត្ថិនៅក្នុងតួនាទីជានាយកគ្រប់គ្រងដដែល បន្ទាប់ពីមានការតវ៉ាពីសំណាក់លោកគ្រូ អ្នកគ្រូ និងសិស្សនៃវិទ្យាល័យនេះ។
ក្រុមគ្រូបង្រៀននៅវិទ្យាល័យចំណាស់មួយនេះ បានប្រមូលផ្ដុំតវ៉ាចាប់តាំងពីដើមសប្ដាហ៍នេះ ដោយជំទាស់ទៅនឹងការផ្លាស់ប្ដូរនាយកគ្រប់គ្រង លោក មូល ស៊ុយហេង និងការដាក់បញ្ចូលកម្មវិធីអប់រំថ្មីរបស់ក្រសួងនៅក្នុងសាលារៀនមួយនេះ។
នៅព្រឹកនេះក្រោយពីមានការបោះឆ្នោតពីលោកគ្រូ អ្នកគ្រូវិទ្យាល័យនេះក្រោមការសម្របសម្រួលដោយរដ្ឋមន្ត្រីក្រសួងអប់រំលោក ហង់ ជួនណារ៉ុន នោះ លោក មូល ស៊ុយហេង ត្រូវបានគ្រូនៅសាលានេះផ្ដល់ការទុកចិត្តឲ្យធ្វើជានាយកសាលាបន្តទៀត។
ប្រធានឯកទេសរូបវិទ្យាថ្នាក់ទី៩ លោក ហ៊ួត ប៊ុនហ៊ាង បានឲ្យ VOD ដឹងថា ក្រោមការបោះឆ្នោតជាសម្ងាត់ លោកនាយក មូល ស៊ុយហេង ទទួលបានសំឡេងគាំទ្រ ៩៧ លើ ១៥១សំឡេង ដែលអនុញ្ញាតឲ្យលោកបន្តធ្វើជានាយកសាលានេះបន្តទៀត។
ប្រធានឯកទេសរូបវិទ្យាថ្នាក់ទី៩ លោក ហ៊ួត ប៊ុនហ៊ាង
លោក មូល ស៊ុយហេង ត្រូវបានក្រសួងអប់រំសម្រេចផ្ទេរមកកាន់នាយកដ្ឋានមធ្យមសិក្សានៃក្រសួងវិញ ដោយលើកឡើងថា លោកមានបទពិសោធន៍យូរឆ្នាំដែលអាចជួយដល់នាយកដ្ឋានបាន។
កាលពីម្សិលមិញគណៈគ្រប់គ្រងបណ្ដោះអាសន្នមួយត្រូវបានក្រសួងអប់រំសម្រេចបង្កើតឡើងនៅសាលានេះមុនពេលក្រសួងរើសនាយកសាលាថ្មី។
អ្នកនាំពាក្យក្រសួងអប់រំលោក ឌី ខាំប៉ូលី មានប្រសាសន៍ថា បន្ទាប់ពីមានការបោះឆ្នោតពីក្រុមលោកគ្រូអ្នកគ្រូនៃវិទ្យាល័យនេះហើយ លោកនាយក មូល ស៊ុយហេង នឹងត្រូវបានរក្សាក្នុងតួនាទីជានាយកសាលានេះដដែល តែត្រូវរង់ចាំលិខិតតែងតាំងជាថ្មីសិន ខណៈនៅពេលនេះគណៈគ្រប់គ្រងបណ្ដោះអាសន្ននឹងត្រូវមើលការខុសត្រូវសាលានេះជាបណ្ដោះអាសន្នសិន។
អ្នកនាំពាក្យក្រសួងអប់រំលោក ឌី ខាំប៉ូលី
នាយកវិទ្យាល័យព្រះស៊ីសុវត្ថិលោក មូល ស៊ុយហេង បានកាន់តួនាទីជានាយកវិទ្យាល័យនេះអស់រយៈពេល១០ឆ្នាំមកហើយ បន្ទាប់ពីលោកត្រូវបានតែងតាំងជានាយកសាលានេះនៅឆ្នាំ២០០៨៕
