ក្រុមអង្គការសង្គមស៊ីវិលដែលធ្វើការផ្នែកឃ្លាំមើលសិទ្ធិមនុស្ស បានរកឃើញថា ការរំលោភបំពានសិទ្ធិសេរីភាពនៅកម្ពុជា បានកើនឡើងខ្លាំងចាប់តាំងពីការបោះឆ្នោតឃុំសង្កាត់ រហូតដល់ការបោះឆ្នោតថ្នាក់ជាតិកន្លងមកនេះ។
កាលពីម្សិលមិញ មជ្ឈមណ្ឌលសិទ្ធិមនុស្ស សមាគមការពារសិទ្ធិអាដហុក និងមជ្ឈមណ្ឌលសាមគ្គីភាព បានចេញផ្សាយរបាយការណ៍រួមគ្នាកម្រាស់ ១៦៦ទំព័រ ក្រោមចំណងជើងថា «ការឃ្លាំមើលសេរីភាពមូលដ្ឋាននៅកម្ពុជា» ដោយបានបង្ហាញពីករណីរំលោភសិទ្ធិមនុស្ស និងការរឹតត្បិតសិទ្ធិសេរីភាពជាមូលដ្ឋាននៅកម្ពុជា ដែលបានកត់ត្រាទុកចាប់ពីខែមេសាឆ្នាំ២០១៧ ដល់ខែមីនាឆ្នាំ២០១៨។
របាយការណ៍ឆ្នាំទី២នេះ រកឃើញថា ការរឹតត្បិតសិទ្ធិសេរីភាពជាមូលដ្ឋានបានកើតឡើង ៥៩៣ករណី ពោល គឺកើនឡើង ២០២ករណី បើធៀបនឹងរបាយការណ៍ឆ្នាំទី១ ដែលមានចំនួន ៣៩១ករណី ហើយភាគច្រើន គឺជាការរំលោភសិទ្ធិសេរីភាពក្នុងការបង្កើតសមាគម ការជួបជុំ និងសេរីភាពក្នុងការបញ្ចេញមតិ។
ក្រុមអង្គការសង្គមស៊ីវិលគូសបញ្ជាក់ក្នុងរបាយការណ៍ថា មូលហេតុនៃការរំលោភបំពានសិទ្ធិទាំងនេះ គឺបន្ទាប់ពីរដ្ឋាភិបាលធ្វើវិសោធនកម្មរដ្ឋធម្មនុញ្ញ និងច្បាប់មួយចំនួន ដូចជា វិសោធនកម្មច្បាប់គណបក្សនយោបាយដែលឈានទៅរំលាយគណបក្សប្រឆាំង ច្បាប់ដាក់ទោសអ្នកប្រមាថព្រះមហាក្សត្រ ការយីយាកាន់ខ្លាំងលើអង្គការសង្គមស៊ីវិល ការប្រើប្រាស់កម្លាំងរបស់អាជ្ញាធរបង្ក្រាបដោយហិង្សាលើការប្រមូលផ្ដុំតវ៉ា និងការបិទប្រព័ន្ធផ្សព្វផ្សាយជាដើម។
មន្ត្រីសម្របសម្រួលគម្រោងឃ្លាំមើលសេរីភាពមូលដ្ឋាន នៃមជ្ឈមណ្ឌលសិទ្ធិមនុស្សកម្ពុជា លោក ហ៊ុន ស៊ាងហាក់ មានប្រសាសន៍ថា អាជ្ញាធរបានធ្វើការរារាំងដល់ការជួបជុំ ឬប្រមូលផ្ដុំដោយសន្ដិវិធី រារាំងដល់ការបើកវគ្គបណ្ដុះបណ្ដាលសហគមន៍ និងបញ្ឈប់សកម្មភាពរបស់អង្គការសង្គមស៊ីវិល ដោយយកតាមច្បាប់ស្ដីពីអង្គការសមាគម និងការមិនបានជូនដំណឹងជាមុន។
ប៉ុន្ដែ លោកថា ការអនុវត្តរបស់អាជ្ញាធរបែបនេះ គឺជាការគំរាមកំហែងដល់សិទ្ធិសេរីភាពជាមូលដ្ឋាន និងមិនស្របទៅនឹងគោលការណ៍នៃច្បាប់អន្ដរជាតិនោះទេ។
មន្ត្រីសម្របសម្រួលគម្រោងឃ្លាំមើលសេរីភាពមូលដ្ឋាន នៃមជ្ឈមណ្ឌលសិទ្ធិមនុស្សកម្ពុជា លោក ហ៊ុន ស៊ាងហាក់
VOD បានទាក់ទងប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ប៉ុន្ដែ លោកថា ជាប់រវល់ប្រជុំ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ច្រានចោលរបាយការណ៍របស់អង្គការក្នុងស្រុកទាំងនេះថា មិនឆ្លុះបញ្ចាំងការពិត និងថា កម្ពុជាមិនត្រូវបានអង្គការសហប្រជាជាតិ ដាក់បញ្ចូលក្នុងប្រទេសដែលរំលោភសិទ្ធិមនុស្សនោះឡើយ។
របាយការណ៍ស្ដីពីបញ្ហាសិទ្ធិមនុស្ស និងសេរីភាពជាមូលដ្ឋានរបស់ក្រុមអង្គការក្នុងស្រុកទាំងនេះ បានលើកឡើងប្រហាក់ប្រហែលគ្នានឹងរបាយការណ៍ដែលរកឃើញដោយក្រុមអង្គការឃ្លាំមើលសិទ្ធិមនុស្សអន្ដរជាតិដទៃទៀត ដូចជា អង្គការសិទ្ធិមនុស្សអន្ដរជាតិ Human Rights Watch អង្គការលើកលែងទោសអន្ដរជាតិ អង្គការសហប្រជាជាតិ សហភាពអឺរ៉ុប និងអង្គការដែលធ្វើការលើផ្នែកសេរីភាពសារព័ត៌មាន។
ចំណែកអ្នករាយការណ៍ពិសេសអង្គការសហប្រជាជាតិទទួលបន្ទុកបញ្ហាសិទ្ធិមនុស្សកម្ពុជា លោកស្រី រ៉ូណា ស្មីត កាលពីថ្ងៃទី៧ខែកញ្ញាកន្លងទៅនេះ បានដាក់របាយការណ៍មួយបន្ថែមទៀតស្ដីពីបញ្ហាសិទ្ធិមនុស្ស និងការបោះឆ្នោតនៅកម្ពុជា ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ ដែលកំពុងរៀបចំកិច្ចប្រជុំចាប់ពីថ្ងៃទី១០ ដល់ថ្ងៃទី២៨ខែកញ្ញានេះ។
ក្នុងរបាយការណ៍បន្ថែមនោះ លោកស្រី រ៉ូណា ស្មីត រកឃើញថា ការបោះឆ្នោតជ្រើសតាំងតំណាងរាស្ដ្រនីតិកាលទី៦ កាលពីថ្ងៃទី២៩កក្កដាកន្លងទៅ គឺពោរពេញដោយរឹតត្បិត និងបង្ខិតបង្ខំពលរដ្ឋឲ្យចេញទៅបោះឆ្នោត ការយាយីក្រុមអង្គការសង្គមស៊ីវិល និងបណ្ដាញសារព័ត៌មាន និងការរារាំងអតីតគណបក្សប្រឆាំងដ៏ធំមួយមិនឲ្យចូលរួមបោះឆ្នោតជាដើម៕