អង្គការមួយនៅថ្ងៃនេះ បានដឹកនាំបុរសប្រហែល២០០នាក់ ដើរហែក្បួន និងកាន់បដានៅតាមផ្លូវក្នុងភូមិមួយនាខេត្តបាត់ដំបង ដើម្បីអប់រំប្រជាពលរដ្ឋក្នុងតំបន់នោះឲ្យយល់ដឹងពីសមភាពយេនឌ័។
មន្ត្រីអង្គការដាយកូនៀ (Diakonia) លោក ជួប ស៊ុយ បានរៀបរាប់ថា ដើមចមដែលនាំឲ្យអង្គការរបស់លោក ធ្វើសិក្ខាសាលាស្តីពីភាពជាបុរសនិងដឹកនាំបុរសប្រមាណ២០០នាក់ ដែលមកពីរាជធានីភ្នំពេញ និងបណ្តាខេត្តនានាដើរហែក្បួនកាន់បដាបង្ហាញសារអប់រំខ្លីៗនៅភូមិថ្មី ឃុំបន្សាយក្រែង ស្រុកថ្មគោល ខេត្តបាត់ដំបង គឺដើម្បីបញ្រ្ជាបការយល់ដឹងទាក់ទងនឹងសមភាពយេនឌ័រទៅកាន់សាធារណៈក៏ដូចជាកាត់បន្ថយការប្រើហិង្សាក្នុងគ្រួសារ និងលើកកម្ពស់សិទ្ធិស្ត្រីជាដើម។
មន្ត្រីអង្គការដាយកូនៀ (Diakonia) លោក ជួប ស៊ុយ
តាមការពន្យល់របស់លោកជួប ស៊ុយ «សមភាពយេនឌ័រ» មានន័យថា បុរសនឹងស្ត្រីមានសិទ្ធិស្មើភាពគ្នាដោយមិនមានការរើសអើងឬប្រកាន់ថាការងារនោះជារបស់បុរស ឬជារបស់ស្ត្រីនោះឡើយ។
មកពីស្រុកពួក ខេត្តសៀមរាប លោក ប៉ាក់ ភួង បានរៀបរាប់ក្នុងកម្មវិធីនេះថា កន្លងមកលោកមិនដែលធ្វើការងារផ្ទះ ហើយលោកក៏ធ្លាប់ប្រើហិង្សាលើប្រពន្ធជាដើម។ ប៉ុន្តែលោកថា ក្រោយពីទទួលបានការអប់រំពីអង្គការបន្ទាយស្រី និងអង្គការដាយកូនៀ (Diakonia) ជិត១ឆ្នាំ ធ្វើឲ្យលោកចេះជួយគ្រួសារ និងធ្វើឲ្យជីវភាពរីកចំរើនជាងមុន។
ពលរដ្ឋមកពីស្រុកពួក ខេត្តសៀមរាប លោក ប៉ាក់ ភួង
អ្នកចូលរួមកម្មវិធីនេះម្នាក់ទៀតគឺលោក ស៊ីម ប៊ុនសាយ ដែលមកពីស្រុកបាវិល ខេត្តបាត់ដំបង ថ្លែងថា ក្រោយពីទទួលបានចំណេះដឹងផ្នែក «សមភាពយេនឌ័រ» លោកប្តេជ្ញាយកចំណេះដឹងនេះពង្រឹងក្នុងគ្រួសារឲ្យល្អ និងជួយផ្សព្វផ្សាយដល់អ្នកជិតខាងផងដែរ។
អ្នកចូលរួមកម្មវិធីនេះម្នាក់ទៀតគឺលោក ស៊ីម ប៊ុនសាយ ដែលមកពីស្រុកបាវិល ខេត្តបាត់ដំបង
សមាជិកក្រុមប្រឹក្សាស្រុកថ្មគោល ខេត្តបាត់ដំបង លោក សៅ សន្តោស មានប្រសាសន៍ថា នៅតំបន់ដែលលោកគ្រប់គ្រង ប្រជាពលរដ្ឋភាគច្រើនមិនទាន់យល់ដឹងច្រើនពី«សមភាពយេនឌ័រ»នោះទេ ប៉ុន្តែលោកថា ក្រោយពីទទួលបានព័ត៌មានពីអង្គការ ក្រុមការងារបស់លោកនឹងជួយផ្សព្វផ្សាយ និងពង្រឹងបន្ថែមជូនប្រជាពលរដ្ឋជុំវិញបញ្ហានេះ។
សមាជិកក្រុមប្រឹក្សាស្រុកថ្មគោល ខេត្តបាត់ដំបង លោក សៅ សន្តោស
គួរបញ្ជាក់ថា ចាប់ពីឆ្នាំ២០១៥ដល់ឆ្នាំ២០១៨នេះ អង្គការដាយកូនៀ (Diakonia) និងអង្គការបន្ទាយស្រី បានបើកវគ្គបណ្តុះបណ្តាលអប់រំ និងផ្សព្វផ្សាយពី «សមភាពយេនឌ័រ» ចំនួន៤ដងមកហើយ៕
