លោកនាយករដ្ឋមន្រ្តី ហ៊ុន សែន នៅថ្ងៃនេះ បានផ្ញើសាររំលែកទុក្ខជូន លោក ង្វៀន សួនហ្វ៊ុក នាយករដ្ឋមន្រ្តីវៀតណាម ចំពោះមរណភាពលោកប្រធានាធិបតី ត្រាន់ ដាយក្វាង។
លោក ត្រាន់ ដាយក្វាង បានទទួលមរណភាពដោយសារជំងឺនៅព្រឹកថ្ងៃទី២១ ខែកញ្ញា ឆ្នាំ២០១៨ នៅក្នុងមន្ទីរពេទ្យមួយនៃប្រទេសវៀតណាម។
ក្នុងសាររំលែកទុក្ខ លោក ហ៊ុន សែន បានចូលរួមរំលែកទុក្ខក្រៀមក្រំ និងមានការសោកស្តាយដោយបាត់បង់មិត្តដ៏ល្អរបស់កម្ពុជា។
បើតាមការចុះផ្សាយរបស់សារព័ត៌មានVNExpressបានឲ្យដឹង លោក ត្រាន់ ដាយក្វាង បានធ្លាក់ខ្លួនឈឺធ្ងន់ធ្ងរតាំងពីឆ្នាំ២០១៧។ លោកបានព្យាបាលជំងឺរបស់លោកជាច្រើនដងមកហើយនៅក្នុងប្រទេសវៀតណាម និងប្រទេសជប៉ុន ក៏ប៉ុន្តែនៅតែមិនជាសះស្បើយនោះទេ រហូតមកដល់យប់ថ្ងៃទី២០ កញ្ញា ឆ្នាំ២០១៨នេះ ជំងឺរបស់លោកក៏រើឡើងវិញដែលត្រូវបានបញ្ជូនបន្ទាន់ទៅមន្ទីរពេទ្យ។ លោក ត្រាន់ ដាយក្វាង បានទទួលមរណភាពនៅម៉ោង ១០ និង ៥នាទីព្រឹក នៅឯមន្ទីរពេទ្យយោធា១០៨ ក្នុងទីក្រុងហាណូយប្រទេសវៀតណាម។
លោក ត្រាន់ ដាយក្វាង កើតនៅថ្ងៃ១២ ខែតុលា ឆ្នាំ១៩៥៦ក្នុងខេត្ត Ninh Binh។ លោកបានចូលបំរើជាប៉ូលីសតាំងពីអាយុ១៦ឆ្នាំ និងបានបំរើនៅក្នុងជួរប៉ូលីសរហូតដល់ពេលដែលលោកត្រូវបានបោះឆ្នោតជាប្រធានាធិបតីវៀតណាមនៅឆ្នាំ២០១៦។
