នាយកវិទ្យាល័យស៊ីសុវត្ថិដែលត្រូវបានក្រុមគ្រូបង្រៀនសាលានេះទាមទារទៅក្រសួងអប់រំឲ្យមកកាន់ការងារជានាយកសាលាវិញនោះ ត្រូវបានក្រសួងអប់រំតម្រូវឲ្យសងលុយរដ្ឋដែលបាត់បង់ក្រោមការដឹកនាំរបស់លោក និងត្រូវទទួលខុសត្រូវផ្លូវច្បាប់ផងដែរ។
ក្នុងសេចក្ដីប្រកាសព័ត៌មានចុះថ្ងៃទី ២០ កញ្ញាឆ្នាំ២០១៨ ម្សិលមិញក្រសួងអប់រំបានលើកឡើងថា វិទ្យាល័យព្រះស៊ីសុវត្ថិក្រោមការដឹកនាំរបស់លោក មូល ស៊ុយហេង បានកើតមានបញ្ហាអសកម្មមួយចំនួនពាក់ព័ន្ធនឹងការគ្រប់គ្រង ការងាររដ្ឋបាល ការរៀន និងបង្រៀន និងការប្រើប្រាស់ថវិកាសាលារៀន ទាំងថវិការដ្ឋ និងថវិកាដៃគូអភិវឌ្ឍ។ ដោយមូលហេតុនេះហើយទើបក្រសួងធ្វើការផ្លាស់ប្ដូរលោកទៅកាន់នាយកដ្ឋានមធ្យមសិក្សាចំណេះដឹងទូទៅវិញ តែធ្វើឲ្យក្រុមគ្រូបង្រៀននៅសាលានេះតវ៉ា។
ក្នុងលិខិតនោះសរសេរថា៖
ដោយសារលោក មូល ស៊ុយហេង ទទួលបានការគាំទ្រពីសំណាក់គ្រូបង្រៀននេះជានាយកបន្តទៀតនោះ ក្រសួងក៏បានសម្រេចតាមការចង់បានរបស់ក្រុមគ្រូបង្រៀន តែតម្រូវឲ្យលោក មូល ស៊ុយហេង សងលុយរដ្ឋវិញ និងត្រូវទទួលខុសត្រូវចំពោះមុខច្បាប់ផងដែរ។ ខណៈក្រសួងនឹងបង្កើតក្រុមប្រឹក្សាភិបាលមួយបន្ថែមពីលើនាយកសាលាទៀតដើម្បីដឹកនាំសាលាផងដែរ។
អ្នកនាំពាក្យក្រសួងអប់រំលោក ឌី ខាំប៉ូលី បានឲ្យVOD ដឹងថា ការតម្រូវរបស់ក្រសួងនៅពេលនេះគឺ គ្រាន់តែជាការរកឃើញបឋមប៉ុណ្ណោះ ដែលមិនទាន់អាចមានវិធានការលើលោក មូល ស៊ុយហេង បាននៅឡើយ ទោះជាយ៉ាងណាក្រសួងកំពុងពិនិត្យបន្ថែមពីករណីទាំងនេះចំពោះនាយកសាលារូបនោះផងដែរ។
អ្នកនាំពាក្យក្រសួងអប់រំលោក ឌី ខាំប៉ូលី
ទោះជាយ៉ាងណាលោក ឌី ខាំប៉ូលី មិនទាន់អាចបញ្ជាក់បានទេថាតើទឹកប្រាក់តម្លៃប៉ុន្មានដែលក្រសួងតម្រូវឲ្យលោក មូល ស៊ុយហេង សងត្រលប់មកក្រសួងវិញនោះ ដោយថារង់ចាំការពិនិត្យពីក្រុមអធិការកិច្ចជាមុនសិន។
VOD មិនអាចទាក់ទងនាយកវិទ្យាល័យព្រះស៊ីសុវត្ថិលោក មូល ស៊ុយហេង បាននៅឡើយទេដោយទូរសព្ទលោកចុចចូលតែគ្មានអ្នកលើកទូរសព្ទ។
ប្រធានឯកទេសរូបវិទ្យាថ្នាក់ទី៩ នៃវិទ្យាល័យព្រះស៊ីសុវត្ថិលោកគ្រូ ហ៊ួត ប៊ុនហ៊ាង ដែលគាំទ្រលោកនាយកសាលាមិនមានការភ្ញាក់ផ្អើលចំពោះការតម្រូវឲ្យលោក មូល ស៊ុយហេង សងប្រាក់វិញនោះទេ ដោយជឿថាលោកមូល ស៊ុយហេង នឹងសងប្រាក់ទាំងនោះ។
ប្រធានឯកទេសរូបវិទ្យាថ្នាក់ទី៩ នៃវិទ្យាល័យព្រះស៊ីសុវត្ថិលោកគ្រូ ហ៊ួត ប៊ុនហ៊ាង
ទីប្រឹក្សាសមាគមគ្រូបង្រៀនឯករាជ្យលោក រ៉ុង ឈុន លើកឡើងថាតាមរយៈសេចក្ដីប្រកាសព័ត៌មាន ក្រសួងអប់រំហាក់គ្មានភាពប្រាកដប្រជានោះទេចំពោះចំណាត់ការលើលោក មូល ស៊ុយហេង ដោយលោកដាក់ការសង្ស័យទៅលើទំនោរនយោបាយច្រើនជាង។
ទីប្រឹក្សាសមាគមគ្រូបង្រៀនឯករាជ្យលោក រ៉ុង ឈុន
ក្រុមគ្រូបង្រៀននៅវិទ្យាល័យព្រះស៊ីសុវត្ថិ បានប្រមូលផ្ដុំតវ៉ាចាប់តាំងពីដើមសប្ដាហ៍នេះ ដោយជំទាស់ទៅនឹងការផ្លាស់ប្ដូរនាយកគ្រប់គ្រង លោក មូល ស៊ុយហេង និងការដាក់បញ្ចូលកម្មវិធីអប់រំថ្មីរបស់ក្រសួងនៅក្នុងសាលារៀនមួយនេះ តែបញ្ហានេះត្រូវបានដោះស្រាយកាលពីម្សិលមិញដោយមានការសម្របសម្រួលពីរដ្ឋមន្ត្រីក្រសួងអប់រំលោក ហង់ ជួនណារ៉ុន។
នាយកវិទ្យាល័យព្រះស៊ីសុវត្ថិលោក មូល ស៊ុយហេង បានកាន់តួនាទីជានាយកវិទ្យាល័យនេះអស់រយៈពេល១០ឆ្នាំមកហើយ បន្ទាប់ពីលោកត្រូវបានតែងតាំងជានាយកសាលានេះនៅឆ្នាំ២០០៨៕